Olketa Young Brata, Waswe, Iufala Laek for Kasem Samfala Responsibility?
1. Wanem taem nao wanfala young brata savve start for followim wanem 1 Timothy 3:1 talem?
1 “Sapos man hem laek for elder, gud samting nao hem laek for duim.” (1 Tim. 3:1) Scripture hia hem encouragem olketa brata for trae for kasem responsibility long kongregeson. Waswe, olketa wea big finis nomoa savve duim datwan? Nomoa, hem gud for start for duim datwan nomata iu young tumas. Taem iu duim olsem iu savve kasem training and showimaot iu fit for kamap ministerial servant taem iu big. (1 Tim. 3:10) Sapos iu wanfala young brata wea baptaes finis, wanem nao iu savve duim for kasem responsibility long kongregeson?
2. Wanem nao iu savve duim for garem tingting for laek helpem olketa brata and sista?
2 Showimaot Iu Willing: Sapos iu laek for kasem responsibility long kongregeson, iu shud ting long datwan olsem chance for duim gud samting, no for kasem position. So iu mas garem tingting for laek helpem olketa brata and sista. Wanfala wei for duim diswan hem for ting raonem nambawan example bilong Jesus. (Matt. 20:28; John 4:6, 7; 13:4, 5) Askem Jehovah for helpem iu for tingim olketa narawan. (1 Cor. 10:24) Iu savve duim samting for helpem olketa wea olo or sik long kongregeson. Iu savve volunteer for katem grass or klinim area raonem Kingdom Hall, or duim eni nara samting for keepim gud Kingdom Hall. Iu savve duim volunteer tok long Theocratic Ministry Skul. Iu bae hapi taem iu willing for duim samting for helpem olketa narawan.—Acts 20:35.
3. Why nao hem important for strong long spiritual wei, and wanem nao man savve duim for kamap spiritual man?
3 Strong Long Spiritual Wei: Main important samting nao for man wea kasem responsibility long kongregeson, hem no for hem garem bigfala savve bat hem mas strong long spiritual wei. Wanfala spiritual man hem trae for garem tingting bilong Jehovah and Jesus abaotem olketa samting. (1 Cor. 2:15, 16) Hem showimaot olketa gudfala wei. (Gal. 5:22, 23) Hem busy long preaching waka and Kingdom nao hem first samting long laef bilong hem. (Matt. 6:33) Sapos iu evritaem duim study seleva datwan bae helpem iu for showimaot olketa gudfala wei. Diswan hem minim for readim Bible evriday and for readim evri Wastaoa and Awake! magasin. Hem important tu for prepare for olketa meeting and go evritaem long meeting. (Ps. 1:1, 2; Heb. 10:24, 25) Taem Paul encouragem Timothy for kamap strongfala Christian hem sei: “Lukluk gud evritaem . . . long samting wea iu teachim.” (1 Tim. 4:15, 16) So traem best for duim gud olketa tok wea iu kasem long Theocratic Ministry Skul. Prepare firstaem for ministry and evritaem duim preaching waka. Markem and waka hard for kasem olketa spiritual goal, olsem for kamap pioneer, waka long Bethel, or for attendim Bible Skul for Olketa Singol Brata. Taem iu strong long spiritual wei datwan bae helpem iu for “ranawe from olketa samting wea young pipol laekem.”—2 Tim. 2:22.
4. Why nao hem important for man faithful and for olketa narawan savve trustim hem?
4 Faithful and Fit for Trustim: From olketa aposol savve olketa brata wea sharem kaikai for olketa Christian long first century olketa faithful and fit for trustim, olketa aposol no need for wari sapos olketa bae duim datfala waka or nomoa. Datwan mekem olketa aposol savve duim olketa nara important waka. (Acts 6:1-4) So taem iu kasem assignment long kongregeson, traem best bilong iu for duim gud datwan. Followim example bilong Noah wea duim evri samting wea God talem long hao for wakem datfala ark. (Gen. 6:22) Jehovah tinghae long man wea showimaot hem faithful and strong long spiritual wei.—1 Cor. 4:2; lukim box “Training Savve Helpem Olketa Young Brata.”
5. Why nao olketa young brata shud traem best for kasem samfala responsibility?
5 Distaem staka pipol kam insaed long organization, olsem Bible talem bae happen. (Isa. 60:22) Klosap 250,000 pipol baptaes evri year. From staka niu wan kam insaed long organization, kongregeson needim olketa spiritual man wea fit for lukaftarem olketa. Distaem staka waka hem stap for duim long organization bilong Jehovah. (1 Cor. 15:58) Olketa young brata, waswe, iufala laek for kasem samfala responsibility? Sapos olsem, gud samting nao iufala laek for duim!
[Blurb long page 2]
From staka niu wan kam insaed long organization, kongregeson needim olketa spiritual man wea fit for lukaftarem olketa
[Box long page 3]
Training Savve Helpem Olketa Young Brata
Taem olketa elder givim olketa assignment and trainim olketa young brata wea fit, datwan bae helpem olketa. Bihaen wanfala meeting, circuit overseer encouragem wanfala pablisa and tufala sidaon front long stage. Hem lukim wanfala young boy standap klosap, so hem askem sapos boy hia laek for story witim hem. Datfala boy sei hem kasem assignment for klinim stage bihaen evri meeting. Nomata parents bilong hem redi for go, hem laek for duim assignment bilong hem firstaem. Datfala circuit overseer hem kwiktaem muv taem hem luksavve long datwan. Circuit overseer sei: “Olketa elder long datfala kongregeson evritaem tingting for trainim olketa young brata wea fit. Olketa elder givim olketa assignment for trainim olketa. So taem mi visitim datfala kongregeson staka taem olketa savve recommendim wanfala young brata for kamap ministerial servant.”