Kongregeson Barava Needim Help Bilong Iu
1 “Thankiu for evri samting wea iu duim for mifala. Mifala barava kasem gud samting from datwan.” Datfala toktok hem barava showimaot thankiu wea iumi feelim for olketa elder and ministerial servant. Taem organization bilong God gohed for grow, need hem stap for olketa mature brata serve long klosap 100,000 kongregeson long world distaem. Sapos iu wanfala brata, kongregeson needim help bilong iu.
2 “Reach Aot”: Hao nao iu savve reach aot for olketa nara privilege insaed kongregeson? (1 Tim. 3:1) Thru long wei for showimaot gudfala example long evri samting. (1 Tim. 4:12; Titus 2:6-8; 1 Pet. 5:3) Share evribit long preaching waka, and helpem olketa narawan for duim olsem tu. (2 Tim. 4:5) Showimaot interest long olketa brata and sista. (Rom. 12:13) Studyim gud Word Bilong God, and kamap moabeta long ‘wei wea iu teach.’ (Titus 1:9; 1 Tim. 4:13) Waka hard for duim gud eni assignment wea olketa elder givim long iu. (1 Tim. 3:10) Sapos iu wanfala famili hed, ‘leadim famili bilong iu long gudfala wei.’—1 Tim. 3:4, 5, 12.
3 For serve olsem wanfala elder or ministerial servant iu mas waka hard and willing for sakrifaesim plande samting. (1 Tim. 5:17) So, taem iu reach aot, servem olketa narawan long hambol wei. (Matt. 20:25-28; John 13:3-5, 12-17) Ting raonem example bilong Timothy, and duim best for followim datwan. (Phil. 2:20-22) Long sem wei wea gudfala fasin bilong Timothy mekem hem fit for duim moa waka, gudfala fasin bilong iu bae mekem iu fit for duim moa waka tu. (Acts 16:1, 2) Taem iu mekem grow olketa spiritual fasin wea iu needim for garem samfala moa privilege, and iu followim eni kaonsel for helpem iu kamap moabeta, ‘wei wea iu muv ahed bae showaot klia long evriwan.’—1 Tim. 4:15.
4 Parents, Trainim Olketa Young Wan for Help: Iu savve trainim olketa young wan for help taem olketa pikinini yet. Trainim olketa for lisin gud long olketa meeting, for preach, and for showimaot gudfala example long Kingdom Hall and long skul. Teachim olketa for tingim and helpem olketa narawan, and for duim olketa samting olsem help for klinim Kingdom Hall, helpem olketa olo, and olketa nara samting olsem. Diswan bae givim chance long olketa for kasem hapi wea kamaot from wei for give. (Acts 20:35) Kaen training olsem savve helpem olketa for kamap olketa pioneer, ministerial servant, and olketa elder long future.