Iusim Web Site Bilong Iumi for Teachim Pikinini Bilong Iu
1. Why nao hem gud for famili iusim disfala sekson wea garem title “Children” long Web site bilong iumi?
1 Olketa wakem Web site bilong iumi, jw.org, long wei wea hem mekem evriwan interest for iusim. For helpem olketa pikinini and dadi and mami bilong olketa for fren gud tugeta and for fren witim Jehovah, iu savve go long datfala Web site long English languis, and then go long Bible Teachings > Children. (Deut. 6:6, 7) Hao nao iu savve iusim disfala sekson for teachim pikinini bilong iu?
2. Hao nao dadi and mami savve chusim samting for studyim wea bae fitim age bilong pikinini?
2 Tingim Wanem Fitim Pikinini: Evri pikinini no semsem. (1 Cor. 13:11) So hao nao dadi and mami savve chusim samting for studyim wea bae fitim age bilong pikinini? Hem gud for dadi and mami tingim diswan: ‘Wanem nao olketa pikinini bilong mi bae interest long hem? Waswe, pikinini bae minim diswan? Sapos mifala studyim disfala subject, waswe, bae pikinini sidaon kwaet and lisin gud?’ Insaed disfala sekson “Children,” iu savve go long “My Bible Lessons” and iusim olketa story long there for teachim olketa pikinini wea no winim thri year yet. Samfala famili go long “Teach Your Children” and iusim olketa Bible story wea stap long there. Bae iumi storyim tu olketa nara samting wea iu savve iusim long disfala sekson.
3. Hao nao dadi and mami savve iusim olketa story and activity long datfala sekson “Famili Worship Project” for helpem olketa pikinini?
3 Family Worship Projects: Sapos iu go long disfala sekson bae iu lukim olketa project wea savve helpem parents for study witim olketa pikinini. Bihaen iu chusim wanfala project, clickim “Download” button for readim “Parents’ Guide” wea bae helpem dadi and mami for savve hao for iusim olketa story and olketa activity. Long olketa project hia, iu savve iusim “Picture Activity” for teachim olketa smol pikinini and iu savve helpem olketa big pikinini for duim “Study Activity.” Nomata wanem nao age bilong olketa pikinini, evriwan savve duim samting insaed wanfala project.
4. Wanem nao iumi savve lukim long datfala sekson, “Become Jehovah’s Friend”?
4 Become Jehovah’s Friend: Taem iu go long disfala sekson bae iu lukim olketa video, song, and activity wea savve helpem dadi and mami for teachim pikinini for savve long toktok bilong God wea stap long Bible. (Deut. 31:12) Olketa short video savve helpem pikinini for lanem olketa important samting. Olketa activity, olsem olketa game, savve helpem pikinini for luksavve olketa mas duim olketa samting hia. Olketa pikinini savve laekem tumas for singsing and olketa song savve helpem olketa for tingim evritaem wanem olketa lanem. From diswan, Web site bilong iumi garem olketa Kingdom song and olketa savve putim olketa niu song wea olketa raetem for olketa pikinini long Web site bilong iumi.
5. Why nao olketa dadi and mami mas askem Jehovah for helpem olketa for teachim pikinini tru samting long Bible?
5 Jehovah laekem iufala olketa dadi and mami for lukaftarem gud olketa pikinini bilong iufala. So iufala savve askem hem for helpem iufala for teachim olketa tru samting long Bible long olketa pikinini bilong iufala. (Judg. 13:8) Jehovah bae helpem iufala for trainim olketa pikinini for mekem olketa ‘wise and datwan savve sevem olketa bikos olketa garem faith long Christ Jesus.’—2 Tim. 3:15; Prov. 4:1-4.