Kamap Gud Long Ministry—Gohed Story Long Man wea Laek Stopem Story

Why Hem Important: Tingim sapos iu savve wanfala natural disaster hem klosap for happen. Pipol bae dae sapos olketa no ranawe go long sef ples. Iu go long neiba bilong iu for warnim hem bat hem stopem story bilong iu and hem sei hem busy. Bae iu no givap for trae helpem hem, iaman? Staka pipol long territory no interest bikos olketa no luksavve message wea iumi talemaot savve sevem laef bilong olketa. Maet olketa busy taem iumi kasem olketa. (Matt. 24:37-39) Or maet olketa herem samfala story abaotem iumi wea no tru. (Matt. 11:18, 19) Maet olketa tingse Olketa Jehovah’s Witness semsem nomoa olsem olketa nara religion wea duim olketa nogud samting. (2 Pet. 2:1, 2) Sapos haosholder no interest stretawe, iumi shud no givap.

Wanem for Duim:

Ting raonem firstaem samting pipol savve talem for stopem story and tingim tu hao nao bae iu ansarem olketa.
Sapos haosholder talem samting for stopem story, tok kaen taem iu gohed story long hem. Iu savve praisem hem. Olsem example, sapos hem sei hem garem religion finis, iu savve sei, “Mi hapi for meetim man olsem iu wea interest long olketa spiritual samting.” Taem iu talem haosholder iu minim feeling bilong hem or samting wea kasem hem, datwan savve helpem iu for gohed preach long hem. Olsem example, sapos hem sei hem busy, iu savve sei: “Sapos olsem, bifor mi go, mi laek for givim iu diswan.” Or sapos haosholder hem sei hem no interest, iu savve askem hem wanfala kwestin. Iu savve sei, “Mi laek for savve nomoa, waswe, iu no interest long Bible or iu no interest long religion?”
Garem wei for luksavve. Jehovah no forcem pipol for obeyim hem. (Deut. 30:19) Man seleva mas ansa long Jehovah for wanem hem chus for duim. (Gal. 6:5) Sapos haosholder hem les for herem story bilong iumi, hem gud for iumi lusim hem. Taem iumi showimaot iumi tingim feeling bilong hem, maet hem lisin taem nara pablisa kam story long hem long narataem.—1 Pet. 3:15.

Samting for Duim Disfala Month:

Bihaen iu story witim haosholder wea trae for stopem story bilong iu, storyim wanem iu savve duim long taem olsem witim brata or sista wea iu waka witim.