Kamap Gud Long Ministry—Wanem for Duim Taem Haosholder Hem Kros

Why Hem Important: Staka pipol wea iumi meetim long ministry olketa savve tok kaen long iumi. Bat Jesus sei samfala bae heitim iumi. (John 17:14) Dastawe iumi shud no sapraes sapos samfala haosholder kros. Taem iumi meetim kaen man olsem, iumi laek duim samting wea mekem Jehovah hapi. (Rome 12:17-21; 1 Pet. 3:15) Wei for duim olsem bae stopem datwan for no worse go moa. Wanem iumi duim bae givim gudfala witness long haosholder and olketa narawan, and maet olketa willing for lisin taem olketa Witness visitim olketa moa.—2 Cor. 6:3.

Wanem for Duim:

Showimaot gudfala wei and kaen long olketa. Diswan savve help for daonem kros. No tingse hem kros long iu. (Eccl. 7:9) Maet hem feel nogud bikos hem kasem samfala problem, or iu kam long taem wea hem no fitim hem. Nomata sapos hem feel nogud long message bilong iumi, maet datwan hem bikos hem bilivim samting wea no stret abaotem iumi.—2 Cor. 4:4.
Tok kaen long hem. (Prov. 15:1) Maet iu wekapem hem, or disturbim hem. Nomata iumi no sei iumi sorre for waka wea iumi duim, maet hem gud for iumi sei sorre from iumi kam long taem wea no fitim. Maet hem kros bikos hem bilivim wanfala laea story abaotem iumi. Sapos olsem, iu savve sei: “Mi minim why datwan hem mekem iu feel nogud. Bat luk olsem samting wea iu herem abaotem mifala hem no tru. Waswe, hem olraet for mi explainim long iu?” Or maet hem no agree witim wanem iumi bilivim abaotem blood or wei for disfellowshipim man. Sapos olsem, iu savve sei: “Mi minim why datwan mekem iu feel nogud. Samfala talem sem samting olsem iu tu. Waswe, mi savve showim iu from Bible why mifala bilivim datwan?”
Sapos datfala man hem barava kros, maet hem gud for iu go from hem and no trae for talem eni samting. Sapos hem talem stret hem no laekem olketa Witness for kam bak moa long haos bilong hem, talem hem iumi bae respectim wanem hem disaedem.

Samting for Duim Disfala Month:

Long famili worship bilong iu, practicem wanem for duim taem haosholder hem kros.
Bihaen iu lusim haosholder wea hem kros, story witim partner bilong iu abaotem wanem nao best samting for duim long taem olsem.