Wanfala Spesol Waka Bae Kamap Long August!

1. Wanem spesol campaign nao bae gohed evriwea long world, from iumi klosap kasem 100 year from taem wea Kingdom hem start for rule?

¹ Klosap nao bae hem kasem 100 year from taem wea Kingdom bilong God hem start for rul. Dastawe hem barava fitim for iumi duim wanfala spesol campaign for praisem Jehovah! Long August, bae iumi givimaot evriwea long world wanfala niu tract wea garem title, “Wea Nao Iumi Savve Faendem Ansa for Olketa Important Kwestin Long Laef?” Disfala tract hem encouragem olketa reader for lukluk long Bible for kasem ansa for olketa important kwestin long laef and hem storyim hao jw.org savve helpem olketa.

2. Wanem nao iumi savve duim for “givim bigfala praise long Jehovah” long month bilong August?

² Givim Bigfala Praise: For helpem olketa pablisa duim moa samting long ministry long August, wanfala spesol arrangement bae kamap for eniwan wea laek for duim auxilary pioneer. Long datfala month, olketa pablisa wea baptaes savve duim auxiliary pioneer waka for 30 hour. Plande pablisa wea waka for selen or go long skul bae fit for auxilary pioneer bikos month bilong August hem garem faevfala Friday, Saturday, and Sunday. Sapos Bible student or pikinini bilong iu hem gohed gud long spiritual wei and laek for pablisa, hem gud for iu kwiktaem storyim datwan long chairman bilong olketa elder. Iumi bae kasem encouragement taem iumi lukim olketa hia joinim iumi long preaching waka long datfala spesol month. Plande regular pioneer savve holiday long August bihaen olketa kasem 840 hour for wanfala year. Bat long disfala year, maet olketa savve changem schedule bilong olketa mekem olketa savve joinim iumi long disfala spesol campaign. Hem gud for olketa famili savve story tugeta distaem abaotem wanem bae olketa duim for “givim bigfala praise long Jehovah” long month bilong August.—Ezra 3:11; Prov. 15:22.

3. Wanem nao iumi laekem for happen long disfala spesol campaign?

³ Nomata iumi givimaot olketa tract olsem bifor, iumi laekem disfala campaign for spesol and for hem samting wea iumi bae no savve forgetim. Bae iumi traem best for duim staka hour, and garem staka pablisa and auxiliary pioneer winim enitaem bifor! From iumi klosap kasem end bilong 2014 service year, iumi laekem Jehovah for blessim preaching waka wea gohed long full world long August, mekem datwan gohed gud winim enitaem bifor!—Matt. 24:14.