Iusim jw.org Long Ministry Bilong Iumi

Web site bilong iumi hem wanfala nambawan tul wea savve helpem pipol “long evri farawe ples long earth” for herem gud nius. (Acts 1:8) Staka pipol no savve yet long jw.org, so iumi mas storyim diswan long olketa.

Wanfala traveling overseer daonlodim datfala video Why Nao Hem Gud for Studyim Bible? long mobile bilong hem and showim datwan long staka pipol. Olsem example, taem hem preach long haos tu haos hem savve sei: “Mi kam for helpem pipol for savve long ansa bilong thrifala important kwestin olsem: Why nao staka nogud samting happen long world? Wanem nao God bae duim for stretem olketa samting hia? And hao nao iumi savve deal witim olketa samting wea happen distaem? Disfala short video ansarem olketa kwestin hia.” Then hem pleim datfala video and hem lukluk sapos haosholder hem interest. Staka pipol hapi for lukim video hia bikos hem naes tumas. Bihaen datwan hem sei: “Olsem iu herem, mifala savve arrange for wanfala Jehovah’s Witness kam for studyim Bible witim iu. From mi long hia nao, mi savve showim iu hao mifala duim datfala study.” Sapos haosholder laekem datwan, then hem showim hem hao for duim study long Gud Nius brochure. Sapos haosholder no garem inaf taem, hem sei hem bae kam bak next taem for showim hem. Taem hem go long ples wea hem savve kap tea lelebet, hem savve story witim narawan and gogo hem savve showim datfala video long hem. Waswe, iu iusim jw.org long ministry bilong iu?