Explainim Biliv Bilong Iumi Abaotem 1914

Bible encouragem iumi for ‘redi evritaem for ansarem kwestin’ abaotem biliv bilong iumi, and ‘taem iumi duim olsem, iumi mas hambol and showimaot bigfala respect.’ (1 Pet. 3:15) Maet hem no isi for iumi explainim olketa deep samting long Bible, olsem hao nao iumi savve Kingdom hem start for rul long 1914. For helpem iumi, tufala article stap long Wastaoa wea garem title “Tufala Story Tugeta—Long Wanem Taem Nao Kingdom Bilong God Hem Start for Rul?” Long tufala article hia, Clayton duim olketa samting for pullim interest bilong man wea hem story witim. Iusim olketa kwestin hia for ting raonem wanem hem duim.

Hao nao Clayton . . .

• helpem story bilong tufala for gohed long wei for praisem Justin?—Acts 17:22.

• showimaot hem hambol taem hem explainim biliv bilong hem?—Acts 14:15.

Hao nao Clayton helpem Justin for minim story long wei for . . .

• reviewim olketa point wea hem storyim finis bifor hem storyim olketa nara point?

• storyim samfala point and then askem hem sapos hem minim wanem tufala storyim finis?

• no storyim staka subject wantaem?—John 16:12.

Iumi tinghae long wei wea Jehovah, datfala “Nambawan Teacher,” helpem iumi savve hao for explainim olketa deep samting long Bible long olketa wea barava laek for savve long datwan!—Isa. 30:20.