Olketa Article wea Bae Helpem Iumi Long Ministry
1. Long wanem wei nao olketa article wea garem title, “A Conversation With a Neighbor” savve helpem iumi?
1 Samfala taem article wea garem title, “A Conversation With a Neighbor” savve kamap long olketa English copy bilong The Watchtower pablik magasin. Olketa article hia savve helpem iumi for storyim samting wea Bible teachim long wei wea mekem man interest. And tu, olketa savve helpem iumi for story long wei wea no spoelem feeling bilong haosholder. (1 Pet. 3:15) Hao nao iumi savve iusim olketa article hia long gudfala wei?
2. Hao nao iumi savve iusim olketa article hia long ministry?
2 Iusim Olketa Article Hia Long Ministry: Maet hem gud for iu keepim olketa copy bilong The Watchtower magasin wea garem disfala article insaed. Taem haosholder, eniwan wea interest, or Bible study askem iu wanfala kwestin or hem bilivim samting wea wanfala long olketa article hia storyim, givim hem copy bilong datfala magasin wea garem datfala article and askem hem sapos iutufala savve storyim tugeta. Sapos iu no garem copy bilong datfala magasin wea garem datfala article, iu savve daonlodim from jw.org.
3. Hao nao iumi savve storyim wanfala article witim haosholder?
3 Hao nao iu savve storyim wanfala article witim samwan? Samfala pablisa askem haosholder for readim big toktok bilong neiba and olketa seleva readim toktok bilong datfala Witness. Wei for duim olsem hem gud bikos hem mekem haosholder for ting raonem biliv bilong iumi long wei wea bae no mekem hem feel nogud.—Deut. 32:2.
4. Hao nao iumi savve iusim olketa article hia for trainim iumiseleva?
4 Trainim Iuseleva and Olketa Narawan: Taem iu readim olketa article hia, tingim olketa scripture, tokpiksa, and wei wea datfala Witness pruvim samting. Tingim wei wea hem story long kaenfala wei. Then iusim kaen wei for story olsem long ministry bilong iu. (Prov. 1:5; 9:9) Wanfala sista sei, “Taem mi readim olketa article hia hem olsem wanfala pioneer wea savve tumas for teach, hem helpem mi for talem samting wea barava fitim!”
5. Wanem nao iumi savve duim for helpem Bible study bilong iumi prepare for duim ministry?
5 Iu savve iusim tu olketa article hia for helpem Bible study prepare for ministry. Readim datfala article tugeta and student nao savve act olsem pablisa. Diswan bae helpem Bible study for tingim feeling bilong haosholder taem hem storyim biliv bilong hem. (Col. 4:6) Tru nao, olketa article hia hem wanfala long staka samting wea Jehovah givim for helpem iumi “duim gud” ministry bilong iumi.—2 Tim. 4:5.