Kamap Gud Long Ministry—Showimaot Interest Long Haosholder

Why Hem Important: Jesus tingim pipol and hem showimaot hem interest long olketa. Olsem example, wanfala taem hem luk olsem Jesus luksavve man wea earpas bae shame sapos pipol lukluk long hem taem Jesus healim hem, so Jesus tekem hem go long wanfala kwaet ples and healim hem. (Mark 7:31-35) Jesus showimaot hem tingim olketa disaepol long wei wea hem luksavve long wanem olketa fit for minim and no storyim staka samting long olketa. (John 16:12) Nomata bihaen Jesus go long heven, hem showimaot hem interest long pipol. (2 Tim. 4:17) From iumi olketa disaepol bilong Christ, iumi laek followim example bilong hem. (1 Pet. 2:21; 1 John 3:16, 18) And tu, iumi bae duim gud ministry bilong iumi sapos iumi tingim haosholder and trae for savve long wanem hem interest long hem and long olketa samting wea hem wari abaotem. Haosholder bae laek for lisin sapos hem luksavve iumi interest long hem, and hem no tingse iumi kam nomoa for storyim message from Bible or for givim pablikeson long hem.

Wanem for Duim:

Prepare gud firstaem. No fraet, smile, and tok kaen.
Garem wei for luksavve. Trae for luksavve sapos haosholder garem pikinini, hem interest long olketa plant, or hem interest long religion. Maet iu savve changem story bilong iu for fitim hem.
Askem tingting bilong haosholder and lisin gud long hem. Luk long hem taem hem story. Thankiu long hem taem hem talemaot tingting bilong hem. Trae for storyim samting wea iutufala agree long hem.
Redi for changem story. Maet iu savve duim datwan sapos haosholder interest or wari abaotem difren samting. Olketa tract, brochure, and magasin savve helpem iu for duim datwan bikos olketa story abaotem olketa difren subject. Sapos haosholder hem busy or hem redi for go long eni ples, luksavve long datwan and story lelebet taem nomoa.

Samting for Duim Disfala Month:

Iu savve practicem hao for changem story for fitim wanem haosholder talem long taem bilong famili worship or maet long taem iu duim ministry.
Brata wea leadim grup for field service savve storyim or arrangem for tufala pablisa duim demonstration long hao for showimaot interest long haosholder.