Showimaot Interest—Long Wei for Change Fitim Narawan
1 Aposol Paul showimaot gudfala example long wei wea hem evritaem changem story bilong hem abaotem gud nius for fitim ples and tingting bilong pipol wea lisin long hem. (1 Cor. 9:19-23) Iumi shud trae for duim sem samting. Wei for ting raonem firstaem olketa idea for startim story long Kingdom Ministry Bilong Iumi, savve plande taem helpem iumi for changem story bilong iumi fitim need bilong pipol long territory bilong iumi. Taem iumi kasem wanfala haos, iumi savve lukim samfala samting wea stap raonem haos wea showimaot interest bilong haosholder and iumi savve joinim olketa samting hia insaed story bilong iumi. Bat nara wei wea iumi savve change for fitim narawan long ministry hem stap.
2 Change Followim Story Bilong Haosholder: Taem iumi talemaot gud nius, plande taem iumi askem wanfala kwestin and invaetem olketa haosholder for story. Hao nao iu ting long samting wea haosholder talem? Waswe, iu kwiktaem sei thankiu for koment bilong hem nomoa and then gohed long story wea iu preparem kam finis? Or waswe, story bilong iu hem showimaot iu interest long samting wea haosholder talem? Sapos iu showimaot iu barava interest long story bilong pipol, maet iu fit for iusim olketa nara gudfala kwestin for kasem tingting bilong olketa. (Prov. 20:5) Taem iu duim olsem iu savve storyim wanfala part bilong kingdom message wea barava fitim samting wea man wea lisin interest long hem.
3 Diswan hem minim iumi mas willing for storyim olketa topic wea difren from topic wea iumi plan firstaem for storyim. Sapos iumi start for storyim wanfala problem wea kamap long nius bat haosholder storyim wanfala problem wea kamap long area bilong hem, or samting wea affectim hemseleva, wei wea iumi barava interest long need bilong haosholder bae muvim iumi for mekem main story bilong iumi from Bible join go long samting wea barava important long hem.—Phil. 2:4.
4 Changem Story Bilong Iumi: Taem haosholder askem wanfala kwestin, maet hem gud for storyim datwan long narataem bihaen iu garem chance for lukaotem samfala information moa abaotem datfala topic. Iumi savve givim tu olketa pablikeson wea explainim datfala topic long kliafala wei. Wei for followim evri samting hia showimaot iumi barava interest for helpem nara pipol for savve long Jehovah.—2 Cor. 2:17.