Gohed Teachim Pipol for Kamap Disaepol
1. Wanem nao iumi mas duim for helpem pipol kasem laef?
1 Long 2014 service year report hem showimaot pipol bilong God waka hard for preachim gud nius abaotem Kingdom. (Matt. 24:14) Iumi helpem staka pipol for herem Bible message winim enitaem bifor long haos tu haos waka wea iumi duim, olketa spesol waka for givimaot olketa tract and olketa invitation, and long pablik witnessing. Bat for pipol kasem laef, iumi mas study witim olketa and helpem olketa for kamap disaepol bilong Jesus.—1 Tim. 2:4.
2. Olketa wanem kwestin nao iumi shud ting raonem?
2 Redi Evritaem for Offerim Bible Study: Taem samwan interest, waswe, iu raetem information abaotem hem and go bak kwiktaem for trae startim Bible study? Waswe, iu savve showim long man hao iumi duim Bible study long firstaem wea iu meetim hem? Waswe, iu savve offerim Bible study long olketa magasin route bilong iu? Waswe, iu showim tufala video hia Why Nao Hem Gud for Studyim Bible? and Hao Nao Mifala Conductim Wanfala Bible Study? long olketa wea iu waka witim, skulfren, neiba, relative, and eniwan wea iu savve long hem? Taem iu duim pablik witnessing, waswe, iu talem long olketa wea tekem pablikeson hao olketa savve studyim Bible sapos olketa laekem?
3. Wanem nao savve helpem iumi for teachim pipol for kamap disaepol?
3 Jehovah and Jesus Helpem Iumi: Taem Jesus givim komand for teachim pipol for kamap disaepol, hem sei “iufala go.” Datwan showimaot iumi mas waka hard for obeyim datfala komand. Bat Jesus promis for helpem iumi tu. (Matt. 28:19, 20) And tu, Jehovah trainim iumi, and givim iumi holy spirit and olketa tul for helpem iumi teachim pipol for savve long truth. (Zech. 4:6; 2 Cor. 4:7) Iumi savve prea long God for ‘givim paoa long iumi mekem iumi laek for duim’ disfala important waka.—Phil. 2:13.
4. Why nao hem important for iumi gohed teachim pipol for kamap disaepol?
4 Waka for preach hem mekem iumi barava hapi. Bat samting wea mekem iumi hapi tumas nao hem taem iumi teachim samwan for savve long truth and helpem hem for wakabaot witim iumi long road wea lead go long laef olowe. (Matt. 7:14; 1 Thess. 2:19, 20) Barava important samting nao, taem iumi gohed teachim pipol for kamap disaepol, datwan bae mekem Jehovah hapi bikos hem “no laekem eniwan for dae bat hem laekem evriwan for garem chance for repent.”—2 Pet. 3:9.