Redi Evritaem for Offerim Bible Study
1. Wanem nao hem minim for followim toktok bilong Jesus long Matthew 28:19, 20?
1 Jesus talem iumi for mekem pipol “kamap disaepol . . . , teachim olketa.” (Matt. 28:19, 20) Dastawe iumi laek for redi evritaem for offerim Bible study, and no long olketa weekend wea olketa markem nomoa. Olketa idea hia savve helpem iu.
2. Hu nao iumi savve offerim Bible study long olketa?
2 Offerim Bible Study: Taem iumi evritaem offerim Bible study, iumi bae garem chance for garem wanfala study. (Eccl. 11:6) Waswe, iu traem finis wei for ask stret for startim study? Wanfala kongregeson long America traem finisim disfala idea for full month. Olketa hapi tumas bikos olketa startim 42 niufala Bible study! No tingse olketa wea iu visitim savve finis iu willing for studyim Bible witim olketa. Taem iu duim return visit, hem gud for iu offerim study. Sapos olketa no acceptim, no givap. Iu savve gohed helpem olketa for interest long Bible. Waswe, iu askem finis olketa neiba bilong iu, relative, pipol wea iu waka witim, skul witim, sapos olketa laek for studyim Bible? Iu savve askem tu olketa Bible study bilong iu sapos olketa garem eni fren or relative wea laek for studyim Bible.
3. Wanem samting nao iumi garem wea helpem iumi for startim olketa Bible study, and wanem taem nao iumi savve iusim?
3 Samting for Helpem Iumi: Wanfala samting for helpem iumi startim olketa Bible study hem disfala tract, Waswe, Iu Laek for Savve Abaotem Tru Samting? Iu savve givim disfala tract long haosholder nomata olketa tekem literature or nomoa. Iu savve iusim disfala tract taem iu preach long bisnis territory, street witnessing, putim long leta wea iu raetem, and taem iu duim return visit. Iu savve lusim tu long olketa haos wea no eniwan stap. Iu savve tekem tu taem iu go long pablik transport, go long stoa or market, and long ples for waka. Last page long tract hem explainim arrangement for Bible study and hem storyim disfala buk Wanem Bible Teachim.
4. Hao nao iumi savve iusim Savve Abaotem Tru Samting tract for startim study?
4 Bihaen iu givim tract long man, showim olketa kwestin wea stap long front page and askem hem, “Wanem kwestin nao iu barava interest long hem?” Then lukluk and storyim ansa long disfala tract, and readim or storyim last page, wea explainim arrangement abaotem Bible study. Then iu savve showim hem hao disfala buk, Wanem Bible Teachim hem minim go moa datfala subject. Offerim datfala buk and markem taem for go bak and story moa.
5. Why nao iumi shud redi evritaem for offerim Bible study?
5 Long territory bilong iumi, samfala pipol stap wea laek for savve long tru samting wea Bible teachim. Taem iumi redi evritaem for offerim Bible study, iumi bae barava hapi long wei for helpem olketa narawan for followim datfala road for kasem laef.—Matt. 7:13, 14.