Waswe, Famili Bilong Iu Redi for Stap Laef?
1 Olketa profesi long Bible wea kamap tru barava showimaot klosap nao disfala rabis world bae finis. Distaem iumi stap long barava nogud taem wea klosap semsem olsem taem bilong Flood long taem bilong Noah. (Matt. 24:37-39) Taem datfala rabis world bilong bifor hem finis, Noah stap laef bikos hem “evritaem duim wanem trufala God laekem.” (Gen. 6:9) Masbi Noah lanem famili bilong hem abaotem wanem Jehovah laekem bikos olketa tu stap laef long taem bilong datfala Flood. Hao nao iumi savve followim example bilong Noah mekem iumi and famili bilong iumi redi for stap laef taem disfala rabis world hem finis?
2 Preach Abaotem Samting wea Raeteous: For samting olsem 40 or 50 year Noah hem gohed strong for “preach abaotem samting wea raeteous.” (2 Pet. 2:5) Nomata maet pipol long taem bilong Noah stap anda long paoa bilong olketa bighed angel or nomoa, masbi olketa tok spoelem preaching waka wea hem duim. Staka taem iumi meetim pipol wea no laek herem iumi and tok spoelem preaching waka wea iumi duim. Diswan showimaot disfala rabis world klosap for finis. (2 Pet. 3:3, 4) Pipol long taem bilong Noah no laek for herem hem, bat staka pipol distaem hapi for herem iumi and kam for worshipim Jehovah. (Isa. 2:2) Iumi bae sevem ‘iumiseleva and olketa wea lisin long iumi’ sapos iumi gohed strong. (1 Tim. 4:16) Toktok and example bilong olketa dadi and mami savve helpem pikinini for luksavve preaching waka hem barava important!—2 Tim. 4:2.
3 Hem Duim “Evri Samting”: Noah and famili bilong hem stap laef bikos olketa barava followim toktok bilong Jehovah. (Gen. 6:22) Distaem tu hem important for iumi mas ‘willing for obeyim’ wanem Bible and datfala faithful slave talem. (Jas. 3:17) Samfala pikinini wea big finis storyim hao dadi bilong olketa obeyim wanem organization bilong Jehovah talem. Hem duim Famili Worship evri week and hem tekem famili long preaching waka evri Saturday or Sunday. Evri week hem trae for tekem wanfala pikinini long preaching waka. Wei wea hem gohed strong for duim “evri samting” helpem sixfala pikinini bilong hem for kamap olketa faithful wakaman bilong Jehovah.
4 Seknomoa disfala rabis world bae finis. (Luke 12:40) Sapos iumi followim example bilong Noah and showimaot faith, iumi and famili bilong iumi bae redi and stap sef!—Heb. 11:7.