Iusim Gud Wanem Bible Teachim Buk

Taem Bible study lanem tru samting wea Bible teachim and followim wanem hem lanem, bae hem laek for gohed duim wanem God laekem. (Ps. 1:1-3) Taem iumi iusim gud Wanem Bible Teachim buk, datwan savve helpem Bible study bilong iumi for gohed fren witim Jehovah.

Iusim Olketa Kwestin Long Start Bilong Chapter: Olketa kwestin hem stap long start bilong evri chapter wea ansa bilong olketa stap long datfala chapter. Hem gud for readim firstaem olketa kwestin hia for mekem Bible study luk forward long wanem iutufala bae studyim. Or iu savve askem hem for talem shortfala ansa for olketa kwestin hia. Sapos hem talem ansa wea no stret, iu no need for explainim long datfala taem. Ansa wea hem talem bae mekem iu luksavve long olketa point wea iu mas explainim gud taem iutufala studyim datfala chapter.—Prov. 16:23; 18:13.

Iusim Appendix: Sapos iu luksavve Bible study hem acceptim and minim gud subject wea iutufala studyim, encouragem hem for readim seleva appendix abaotem datfala subject tu. Long next study, maet iu savve askem hem sapos hem minim wanem hem readim or nomoa. Bat sapos iu luksavve hem need for minim gud moa datfala subject, iu savve storyim datfala appendix or samfala paragraf bilong datfala appendix. Hem gud for readim olketa paragraf and askem olketa kwestin wea iu redyim firstaem.

Iusim Review Box: Olketa review box wea stap long end bilong evri chapter hem garem ansa for olketa kwestin long start bilong chapter. Iu savve iusim disfala box for luksavve sapos Bible study hem minim and savve explainim olketa main point. Readim each point and scripture wea sapotim datfala point. Then askem hem for iusim olketa scripture hia for pruvim why datfala ansa hem stret.—Acts 17:2, 3.