Gohed Prea for Kasem Blessing From God

God givim iumi olketa man wanfala spesol present, wea hem nao for prea. Datwan mekem iumi fit for story and talem feeling blo iumi lo hem. Profet David prea olsem: “Oltaem, yu ansarem olketa prea blong mifala. Evriwan long evri ples bae i kam fo mekem sakrifaes go long yu.” (Sams 65:2) Bat wanem nao iumi savve duim for God herem prea blo iumi and for kasem blessing blo hem?

HAMBOL AND PREA FROM HEART

Olketa prea wea iu talem hem mekem iu fit for ‘talemaot olketa trabol blong iu long God.’ (Sams 62:8) Olmaeti God hapi for herem olketa prea wea iu talem from heart.

IUSIM NEM BLO GOD TAEM IU PREA

God garem staka title, nomata olsem, hem garem nem blo hem. Bible sei: “Mi nao [Jehovah], an hem nao nem blong mi!” (Aesaea 42:8) Datfala nem Jehovah hem stap samting olsem 7,000 taems lo olketa Holy Raeting. Staka profet iusim nem blo God taem olketa prea. Abraham sei: “[Jehovah], . . . mi mas toktok moa [witim iu].” (Jenesis 18:30) Iumi tu shud iusim nem blo God, Jehovah, taem iumi prea.

PREA LO LANGUIS BLO IU

God minim tingting and feeling blo iumi nomata wanem languis iumi story lo hem. Bible sei: “God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.”—Acts 10:34, 35.

Bat, for iumi kasem blessing from God, iumi no prea nomoa bat need for duim nara samting tu. Lo next article, bae iumi storyim wanem iumi need for duim.