Wanem Nao Iu Savve Lanem From Olketa Original Song?

Olketa wanem original song video nao iu laekem tumas? Why nao olsem? Waswe, iu luksavve video showim samting wea happen lo laef? Olketa garem difren theme and music, so evriwan bae laekem. Iumi barava enjoyim olketa original song video, bat iumi savve lanem samting tu from olketa song hia.

Evri original song teachim iumi gud samting wea iumi savve followim lo laef blo iumi and lo ministry. Samfala song hem abaotem wei for welkamim narawan, wan mind, fren gud tugeta, no fraet, showimaot love, and for garem faith. Olketa nara song hem abaotem wei for kam bak lo Jehovah, forgivim narawan, faithful evriday, and for aftarem olketa spiritual goal. Wanfala song hem abaotem wei for kontrolem hao for iusim mobile phone. Wanem nao iu lanem from olketa original song?

LUKIM ORIGINAL SONG VIDEO HELPEM MI FOR NO FRAET, THEN ANSAREM OLKETA KWESTIN HIA:

• Lo video, wanem nao samfala difren samting wea olketa brata and sista feisim wea olketa mas showimaot olketa no fraet?

• Wanem nao showimaot olketa brata and sista trustim Jehovah?—Jenesis 14:20

• Wanem nao iumi evriwan klosap tumas for feisim?

• Wanem nao bae helpem iumi for no fraet nomata wanem nao iumi feisim?—Mektu Kings 6:16