Hao for Iusim Idea for Ministry

Start kam lo January 2018, iumi garem olketa idea for ministry lo front page blo Christian Laef and Ministry Bilong Iumi—Meeting Buk. Hao nao iumi savve followim olketa idea hia?

Lo Student Assignment: Iu shud iusim firstfala kwestin, scripture, and kwestin for next visit from idea for ministry. Bat iu no need for talem sem toktok wea iu herem lo video. Iu savve duim difren wei for preach, difren introduction, and difren toktok. And tu, iu savve offerim wanfala pablikeson from Teaching Toolbox, nomata instruction for datfala part no talem datwan.

Lo Ministry: Iumi no need for barava followim idea for ministry lo front page from hem olketa idea nomoa. Sapos iu iusim story and scripture from datfala Preach part and haosholder showimaot hem interest and laek gohed story, iu savve gohed storyim information lo Return Visit part. Iu savve changem eni samting lo idea for ministry or iusim idea blo iuseleva. Or iu savve storyim wanfala subject from idea for ministry from nara month bifor or wanfala difren scripture wea pipol lo territory bae interest lo hem. Maet pipol lo territory blo iu interest for storyim samting lo nius or nara samting wea just happen. Nomata wanem iumi disaed for storyim lo pipol, goal blo iumi hem for “sharem gud nius witim nara pipol.”—1Co 9:22, 23.