Hao for Iusim Tract for Startim Story

Start lo January 2018, front page blo Laef and Ministry Meeting Buk garem olketa idea for ministry. Main samting wea iumi kasem encouragement for duim nao hem for story witim pipol and no for just givim buk. For helpem olketa pablisa duim olsem, olketa video abaotem idea for ministry showim hao for iusim Bible nomoa for startim story. Waswe, diswan minim iumi no iusim olketa pablikeson taem iumi preach lo haos tu haos? Nomoa! Olsem example, gudfala wei for startim story hem for iusim olketa tract. Iumi savve followim idea lo daon taem iumi iusim olketa tract:

1. Askem kwestin lo front page wea man savve chusim ansa.

2. Antap lo next page, showim hem ansa blo kwestin from Bible. Sapos fitim, readim and storyim samfala information insaed tract.

3. Givim tract lo haosholder, and encouragem hem for readim full tract lo taem wea fitim hem.

4. Bifor iu go, showim kwestin anda lo “Samting for Tingim” and markem taem for go bak and storyim ansa from Bible.

Taem iu go bak, ansarem kwestin and leavim nara kwestin for storyim next taem. Maet iu savve chusim wanfala kwestin from website blo iumi or from pablikeson wea tract storyim lo last page. Lo taem wea fitim, showim hem Gud Nius From God! brochure or eni nara study pablikeson lo Teaching Toolbox.