Showimaot Love Insaed Famili

Love hem olsem glue wea mekem famili stap strong tugeta. Sapos no eni love stap, famili bae stragol for garem wan mind and for waka tugeta. Hao nao olketa hasband, waef, and olketa parents savve showimaot love insaed lo famili?

Hasband wea garem love bae tingim wanem waef needim, hao hem ting lo samting, and feeling blo hem. (Eph 5:28, 29) Hem bae provaedem physical and spiritual need blo famili, and tu for garem Famili Worship evritaem. (1Ti 5:8) Wanfala waef wea lovem hasband blo hem bae stap anda lo hem and “barava respectim” hem. (Eph 5:22, 33; 1Pe 3:1-6) Tufala evriwan mas willing for forgivim each other. (Eph 4:32) Parents wea showimaot love bae interest lo each pikinini and teachim olketa for lovem Jehovah. (Diutronomi 6:6, 7; Eph 6:4) Olketa wanem challenge nao olketa pikinini feisim lo skul? Hao nao olketa deal witim pressure blo olketa narawan wea olketa sem age? Taem love hem stap insaed famili, evriwan bae feel sef and hapi.

WATCHIM DISFALA VIDEO GOHED SHOWIMAOT LOVE INSAED FAMILI, AND THEN ANSAREM OLKETA KWESTIN HIA:

• 

  Hao nao wanfala hasband wea showimaot love feedim and lovem waef blo hem?

• 

  Hao nao wanfala waef wea showimaot love hem barava respectim hasband blo hem?

• 

  Hao nao parents wea showimaot love teachim toktok blo God lo pikinini blo olketa?