Iusim Enjoyim Laef for Olowe! lo Ministry blo Iu

Iumi barava hapi for garem wanfala niu brochure and buk for conductim olketa Bible study! Iumi prea lo Jehovah for blessim hard waka blo iumi for helpem staka moa for kamap disaepol. (Mt 28:18-20; 1Co 3:6-9) Hao nao iumi savve iusim olketa niu tul hia?

Enjoyim Laef for Olowe! hem wanfala Bible Study course wea man savve barava tekpart insaed. Diswan hem wanfala niu wei for teach, so followim olketa idea hia taem iu prepare and conductim Bible study.a

• Readim leson, and story raonem olketa kwestin

• Readim olketa scripture wea olketa markem for readim, and helpem student for minim wanem datfala scripture storyim

• Pleim and discussim tugeta olketa video, iusim olketa kwestin wea stap finis

• Trae for finisim wanfala leson lo each study

Lo ministry, iusim firstaem datfala brochure for savve sapos man hem interest. (Lukim box “Hao for Iusim Enjoyim Laef for Olowe! Brochure lo Taem Iumi Preach.”) Sapos iutufala studyim finis datfala brochure and student laek for gohed, then givim buk and start lo leson 04. Sapos iu gohed study witim samwan lo Lanem Bible buk or Love Bilong God buk, change go lo Enjoyim Laef for Olowe! buk and ting raonem wea for iutufala start.

WATCHIM VIDEO WELKAM FOR BIBLE STUDY BLO IU, AND THEN ANSAREM OLKETA KWESTIN HIA:

• Wat nao bae olketa student lanem lo disfala niu buk?

• Why nao iu shud showim disfala video lo olketa niu Bible student?

• Olketa wanem goal nao iu shud encouragem student blo iu for markem and for kasem?—Lukim chart “Point for Tingim and Goal for Each Sekson.”