Hao for Iusim Gud Nius From God!
Disfala Niu Brochure Hem for Helpem Iumi Duim Return Visit and Startim Bible Study
1. Wanem niu brochure nao iumi kasem long Convention for helpem iumi duim olketa return visit and startim Bible study?
1 Long “Protectim Heart Bilong Iu!” Distrik Convention, iumi hapi tumas for kasem wanfala niu brochure for helpem iumi duim olketa return visit and startim Bible study. Disfala brochure Gud Nius From God! hem changem datfala Kasem brochure. Olketa leson insaed hem short nomoa. Diswan bae helpem iumi for startim olketa Bible study. Datfala Kasem brochure story abaotem olketa samting wea God laekem iumi for duim, wea olketa niu student maet faendem hard for followim. Bat disfala niu brochure hem mekhae long gud nius wea Bible storyim.—Acts 15:35.
2. Why nao olketa wakem Gud Nius brochure?
2 Why nao olketa wakem disfala brochure? Staka brata raonem world laekem wanfala simpol pablikeson wea bae helpem pipol for interest long truth, and wea bae lead go long wei for study insaed long Wanem Bible Teachim buk, datfala main buk bilong iumi for study witim pipol. Plande taem, pipol wea tingse wanfala buk hem big tumas for studyim bae willing for studyim wanfala brochure. Nara samting tu, hem isi for transleitim brochure long staka difren languis.
3. Long wanem wei nao disfala brochure hem difren from olketa nara pablikeson bilong iumi for study witim pipol?
3 Wanem Insaed Disfala Brochure: Olketa raetem olketa pablikeson bilong iumi for study witim pipol long wei wea pipol savve readim seleva and minim truth, nomata no eniwan study witim olketa. Bat disfala brochure hem no olsem. Olketa raetem long wei wea iumi nao mas study witim datfala student insaed disfala brochure. So, taem iumi offerim disfala brochure long eniwan, hem gud for storyim wan or tufala paragraf witim hem. Sapos haosholder hem busy or sapos iumi preach long bisnis territory, iumi still savve duim diswan bikos olketa paragraf hia short nomoa. Hem gud for startim study long leson 1, bat iumi savve start long eni leson long disfala brochure tu.
4. Hao nao disfala brochure helpem iumi for teach from Bible?
4 Long staka pablikeson bilong iumi, ansa for olketa kwestin hem stap long olketa paragraf. Bat, long disfala brochure, olketa ansa stap long Bible. Staka pipol laek for lane from Bible, and no from olketa pablikeson bilong iumi. Dastawe disfala brochure no talem toktok bilong olketa scripture insaed long paragraf. Student seleva nao mas readim olketa ansa from Bible bilong hem. Diswan helpem student for luksavve wanem hem lanem hem kam from God.—Isa. 54:13.
5. Why nao hem important for man wea conductim study for prepare gud?
5 Disfala brochure no story raonem olketa scripture wea stap long paragraf. Why nao olsem? Hao olketa wakem disfala brochure hem for encouragem student for askem kwestin, and for iumi iusim savve bilong iumi for teach. Dastawe hem important for iumi prepare gud for evri study. Bat iumi mas careful for no toktok tumas. Iumi laekem tumas for explainim olketa scripture bat iumi savve helpem student sapos iumi letem hem nao for explainim datfala scripture. Taem iumi askem olketa gudfala kwestin, iumi savve helpem hem for kasem stretfala mining bilong olketa scripture wea iumi readim.—Acts 17:2.
6. Hao nao iumi savve iusim disfala brochure: (a) sapos man hem daotem God and Bible? (b) long haos-tu-haos waka? (c) for askem stret long haosholder sapos hem laek for study? (d) taem iumi duim return visit?
6 Iumi savve offerim disfala brochure long enitaem nomata hem no buk for offerim long datfala month. Iumi savve iusim diswan for askem stret long haosholder sapos hem laek for study. And tu, olsem tok long distrik convention hem talem, wei for iusim disfala brochure taem iumi go bak long eniwan wea interest “bae barava helpem iu for enjoyim waka for duim return visit!”—Lukim olketa box long page 7-9.
7. Hao nao iumi savve duim study long disfala brochure?
7 Hao for Duim Study: Long start bilong study, iumi savve readim kwestin wea olketa raetem long blak raeting. Then, readim paragraf and olketa scripture wea olketa raetem long italic raeting. Askem olketa kwestin for helpem haosholder savve long mining bilong olketa scripture. Then, bifor iumi go long next sekson, readim moa datfala kwestin long blak raeting mekem haosholder savve ansarem, and bae iumi fit for luksavve sapos hem minim long stretfala wei. Taem iumi just startim study, maet hem gud for storyim wanfala kwestin nomoa. Gogo, iumi savve storyim full leson.
8. Bifor iumi readim wanfala scripture, wanem nao iumi savve talem, and why nao olsem?
8 Olketa scripture wea garem word “readim” front long olketa, olketa nao ansarem kwestin long blak raeting. Bifor iumi readim wanfala scripture, iumi shud no talem kaen toktok olsem: “Aposol Paul hem sei” or, “Lukim profesi bilong Jeremiah.” Maet student tingse iumi talem toktok bilong olketa man nomoa. Bat hem gud for sei, “Bible hem sei” or “Lukim disfala profesi insaed long Bible.”
9. Waswe, iumi shud readim evri scripture long paragraf?
9 Waswe, iumi shud readim evri scripture long paragraf, or readim nomoa olketa scripture wea garem word “readim” front long olketa? Datwan hem depend long samfala samting. Gudfala reason stap why olketa putim olketa scripture long paragraf. Each scripture hem garem point wea hem gud for story abaotem. Samfala taem student no garem taem, no interest, or hem no savve read gud, so maet hem gud for readim nomoa olketa scripture wea garem word “readim” front long olketa.
10. Wanem taem nao hem gud for change go long Wanem Bible Teachim buk?
10 Change Go Long Wanem Bible Teachim Buk: Taem study hem gohed gud, iumi savve change go long Wanem Bible Teachim buk or gohed for iusim Gud Nius brochure. Pablisa bae luksavve wanem taem nao hem gud for change go long nara buk. Sapos iumi change go long Wanem Bible Teachim buk, waswe, iumi mas start long firstfala chapter? No eni rul for diswan. Each student hem difren. Nomata olsem, student savve kasem gud samting sapos iumi studyim Wanem Bible Teachim buk witim hem, wea storyim moa samting abaotem olketa sem subject.
11. Why nao iumi shud iusim gud disfala brochure for talemaot gud nius from God?
11 Long disfala world wea pipol no herem eni gud nius, iumi garem spesol privilege for talemaot nambawan nius. Gud nius hia nao Kingdom bilong God hem gohed for rul distaem and klosap nao hem bae mekem wanfala niu earth kamap wea evri samting bae raeteous! (Matt. 24:14; 2 Pet. 3:13) Iumi sure staka wea herem disfala message bae talem disfala sem toktok: “Leg bilong man wea talemaot gud nius abaotem olketa gudfala samting hem luk naes tumas long olketa maunten. Hem nao man wea talemaot peace, hem tekem kam gud nius abaotem olketa gudfala samting, hem talemaot wei for sev, and hem sei long Zion: ‘God bilong iu hem kamap king!’” (Isa. 52:7) Iumi laekem tumas for iusim disfala brochure for talem gud nius from God long pipol wea hambol!
[Piksa long page 7]
Sapos Pipol Daotem God and Bible:
● Long samfala ples, taem olketa pablisa iusim word “God” and “Bible” pipol savve les for lisin long olketa. Sapos iumi meetim man olsem, hem gud for storyim olketa topic wea pipol wari abaotem olsem wei for garem gudfala gavman, wanem nao famili savve duim for stap gud, and wanem nao future bilong olketa man. Bihaen iumi go bak tu-thri taem then iumi savve showim disfala Gud Nius brochure for helpem hem luksavve God really stap and iumi fit for trustim wanem Bible talem.
[Piksa long page 8]
Preach Long Haos Tu Haos:
● “Mifala kam for storyim long pipol plan bilong God for olketa man. Waswe, iu tingse enitaem bae God hem finisim wei for safa? [Weit for hem ansa.] Disfala brochure garem olketa scripture insaed long Bible for ansarem datfala kwestin. [Givim brochure long hem, and readim firstfala paragraf long leson 1, and 1 Timothy 6:19.] From wanem iumi readim, waswe, iu ting God laekem iumi for garem gudfala future? [Weit for hem ansa.] Sapos iu laekem, iu savve tekem disfala brochure. Mi willing for kam bak for iumi storyim mek-tu paragraf for savve long ansa bilong disfala kwestin wea stap long Bible, ‘Wanem nao God bae duim for finisim wei for safa?’” Sapos haosholder no busy, iufala savve readim and storyim mek-tu paragraf and tufala scripture wea stap. Then markem taem for go bak for storyim mek-tu kwestin long datfala leson.
● “Staka pipol laek for prea long God, and staka taem olketa prea taem olketa kasem problem. Wanem nao tingting bilong iu abaotem wei for prea? [Weit for hem ansa.] Waswe, iu tingse God herem evri prea or nomoa? [Weit for hem ansa.] Disfala brochure garem olketa scripture insaed long Bible for ansarem olketa kwestin hia. [Givim hem wanfala brochure, and storyim firstfala paragraf long leson 12 and olketa scripture wea garem word “readim” front long olketa.] Hem wanfala barava spesol samting for God herem iumi taem iumi prea, iaman? Bat for kasem gudfala samting from wei for prea, iumi mas savve gud long God. [Go long leson 2 and readim olketa subheding.] Sapos iu laekem iu savve tekem disfala brochure, and mi willing for kam bak for iumi storyim olketa ansa for olketa interesting kwestin hia wea stap long Bible.”
● “Distaem pipol wari abaotem olketa samting wea gohed long world. Waswe, iu ting living bae kamap gud enitaem? [Weit for hem ansa.] Staka pipol sapraes for savve hao Bible garem gud nius wea savve givim hope long iumi. Disfala brochure garem olketa kwestin wea ansa bilong olketa stap long Bible.” Givim brochure long hem, and showim hem bak kava and askem hem for chusim wanfala kwestin wea hem laek savve long ansa bilong hem. Then tan go long datfala leson, and showim hem hao iumi duim study insaed. Markem taem for go bak for iutufala storyim next kwestin long datfala leson.
[Piksa long page 9]
Askem Stret for Study:
● “Mifala kam for offerim wanfala Bible study course long pipol. Disfala brochure garem 15-fala leson wea storyim olketa important kwestin wea ansa bilong olketa stap long Bible. [Showim hem front and bak kava.] Long tingting bilong iu, Bible hem buk wea isi for minim? [Weit for hem ansa.] Mi laek showim iu hao mifala savve studyim olketa leson insaed disfala brochure. [Tan go long leson 3 and storyim firstfala paragraf long kwestin 3, and readim Revelation 21:4, 5. Sapos fitim, storyim next paragraf and olketa scripture wea garem “readim” front long olketa.] Sapos iu laekem, mi willing for givim iu disfala brochure. Hem gud sapos iu trae studyim Bible. Then sapos iu laekem, iumi savve gohed long study. Mi willing for kam bak for iumi storyim firstfala leson. Lukim, hem wanfala page nomoa.”
[Piksa long page 9]
Iusim Brochure Taem Iu Duim Return Visit:
● Taem iumi duim return visit long man wea interest, maet iumi savve sei: “Mi hapi for lukim iu moa. Mi tekem kam disfala brochure for iu wea storyim olketa interesting kwestin and storyim ansa wea stap long Bible. [Givim hem brochure, and askem hem for luk long bak kava.] Which wan long olketa kwestin hia nao iu interest long hem? [Weit for hem ansa. Then tan go long leson wea hem chusim.] Bae mi showim iu hao for iusim disfala brochure for faendem ansa wea stap long Bible.” Storyim wan or tufala paragraf and readim olketa scripture wea garem “readim” front long olketa. Hem nao hao iu savve startim wanfala Bible study! Arrangem taem for go bak. Taem iutufala finisim datfala leson, iufala savve storyim nara leson moa wea hem chusim, or iufala savve start long leson 1 bilong brochure.