LAEF BLO CHRISTIAN
Garem Tingting blo Jehovah Abaotem Iuseleva
“Jehovah hemi hapi tumas long yumi olketa pipol blong hem.” (Sams 149:4, SIPB) Nomata iumi no perfect, hem lukim olketa gudfala wei blo iumi and wanem iumi savve duim. Samfala taem, maet iumi faendem hem hard for garem balance tingting abaotem iumi seleva. Maet iumi stragol witim wei for feel iusles bikos lo hao olketa narawan treatim iumi. Or, if iumi gohed for tingim olketa mistek wea iumi duim bifor, datwan savve mekem iumi daotem sapos Jehovah hem really lovem iumi. Wat nao savve helpem iumi taem iumi experiencem kaen feeling olsem?
Tingim diswan, wat Jehovah lukim lo iumi hem winim wanem man savve lukim. (1Sa 16:7) Datwan minim Jehovah hem savve gud lo iumi winim iumi seleva. Iumi hapi bikos Bible hem olsem window wea hem mekem iumi for savve lo hao Jehovah ting lo iumi. Iumi savve luk thru lo datfala window taem iumi ting raonem olketa Bible verse and story wea showim hao Jehovah hem lovem tumas pipol blo hem.
WATCHIM VIDEO BARAVA SURE LO HEART BLO IU DAT JEHOVAH LOVEM IU, AND THEN ANSAREM OLKETA KWESTIN HIA:
Hao nao story blo datfala boy wea ranran and dadi blo hem, teachim iumi abaotem tingting wea Jehovah garem abaotem iumi?
If samwan hem duim wanfala serious sin and hem duim samting for fren bak moa witim Jehovah, wat nao savve helpem hem for sure dat God hem lovem hem?—1Jo 3:19, 20
Hao nao datfala brata kasem gud samting from wei for readim and ting raonem story blo David and Jehoshaphat?