Jehovah “Healim Olketa wea Heart blo Olketa Hem Brek”

1. Wat nao feeling blo Jehovah abaotem olketa servant blo hem?

TAEM Jehovah luk kam daon lo olketa servant blo hem lo earth, wat nao hem lukim? Hem lukim taem wea iumi hapi and taem iumi sorre. (Ps. 37:18) Jehovah hapi tumas taem hem lukim iumi traem best for servem hem, nomata iumi deal witim olketa sorre feeling. And winim datwan, hem barava laek for helpem and comfortim iumi.

2. Wat nao Jehovah duim for olketa wea heart blo olketa brek, and hao nao iumi savve kasem gud samting from wei wea hem kea?

² Psalm 147:3 storyim hao Jehovah ‘bandagem garekil’ blo olketa wea heart blo olketa hem brek. Disfala verse describem Jehovah olsem samwan wea tek kea lo olketa wea deal witim olketa sorre feeling. Bat wat nao iumi need duim for kasem gud samting from wei wea Jehovah kea for iumi? Tingim disfala example. Wanfala experience doctor savve duim staka samting for helpem wanfala person wea garekil. Bat for datfala person heal, hem need for followim gud instruction blo doctor. Lo disfala article, bae iumi storyim olketa toktok blo Jehovah lo Bible for olketa wea heart blo olketa hem brek and bae iumi storyim hao for followim loving advaes blo hem.

JEHOVAH REMINDIM IUMI DAT IUMI BARAVA IMPORTANT LO HEM

3. Why nao samfala feel iusles?

³ Iumi stap lo world wea no garem love, and sorre samting nao, staka pipol safa bikos olketa narawan duim samting wea mekem olketa for feel iusles. Wanfala sista wea nem blo hem Helena sei: “Mi growap insaed famili wea no garem love. Dadi blo mi raf tumas and evriday hem savve sei mifala iusles nomoa.” Olsem Helen, maet olketa narawan treatim iu nogud, tok spoelem iu olowe, or mekem iu feel olsem no eniwan fit for lovem iu. If olsem, maet bae hem hard for iu bilivim dat samwan really kea abaotem iu.

4. Olsem Psalm 34:18 storyim, wat nao mekem iumi sure Jehovah lovem iumi?

⁴ Nomata olketa narawan treatim iu nogud, iu savve sure dat Jehovah lovem iu and iu important lo hem. Jehovah hem “stap klosap lo olketa wea heart blo olketa brek.” (Readim Psalm 34:18.) If iu feel “discourage,” remember Jehovah lukim gud samting insaed heart blo iu and hem nao leadim iu kam lo hem. (John 6:44) Jehovah evritaem redi for helpem iu bikos hem barava lovem iu.

5. Wat nao iumi savve lanem from hao Jesus treatim pipol wea olketa narawan ting daonem?

⁵ Wei for ting raonem example blo Jesus savve teachim iumi abaotem feeling blo Jehovah. Taem Jesus lo earth, hem interest for helpem pipol wea olketa narawan ting daonem, and hem kaen lo olketa. (Matt. 9:​9-12) Taem wanfala woman wea hope for kasem healing for sik blo hem tasim kaleko blo Jesus, Jesus comfortim and praisem hem bikos lo faith blo hem. (Mark 5:​25-34) Lo perfect wei, Jesus barava showimaot olketa wei blo Dadi blo hem. (John 14:9) So iu savve sure dat iu important lo Jehovah and hem lukim olketa gud quality blo iu, includim faith and love blo iu for hem.

6. Wat nao samwan savve duim if hem feel iusles?

⁶ Bat hao sapos iu gohed for garem datfala tingting for feel iusles? Readim and ting raonem olketa verse lo Bible wea pruvim dat iu important lo Jehovah.b (Ps. 94:19) If iu fail for kasem wanfala goal or feel discourage bikos iu no duim staka samting olsem olketa narawan, no judgem iuseleva. Jehovah no expectim iu for duim moa samting winim wat iu fit for duim. (Ps. 103:​13, 14) If iu bin safa bikos iu kasem physical, emotional, or sexual abuse, no blamem iuseleva for wat datfala person duim lo iu. Datwan hem no fault blo iu! Remember, Jehovah bae judgem man wea duim rong samting, no victim. (1 Pet. 3:12) Sandra, wea olketa abusim taem hem pikinini sei, “Mi evritaem askem Jehovah for helpem mi garem balance tingting abaotem miseleva, and for garem sem tingting olsem hem.”

7. Hao nao iumi savve iusim wat iumi bin go thru lo hem for helpem narawan lo service blo Jehovah?

⁷ No daotem dat Jehovah savve iusim iu for helpem olketa narawan. Hem givim iu privilege for waka tugeta witim hem lo ministry. (1 Cor. 3:9) Wat iu bin go thru lo hem, savve helpem iu for minim olketa narawan and understandim feeling blo olketa. Taem olsem, iu savve duim staka samting for helpem olketa. Helen tu kasem help and distaem hem fit for helpem olketa narawan. Hem sei: “Bifor mi feel iusles, bat distaem mi feel samwan lovem mi and Jehovah iusim mi for helpem olketa narawan.” Helen hapi for serve olsem wanfala regular pioneer.

JEHOVAH LAEKEM IUMI FOR ACCEPTIM FORGIVENESS BLO HEM

8. Wat nao promis blo Jehovah lo Isaiah 1:18?

⁸ Samfala servant blo Jehovah barava feel sorre bikos olketa regretim wat olketa duim bifor. Maet hem samting wea olketa duim bifor or afta olketa baptaes. Bat hem gud for remember, Jehovah barava lovem iumi dastawe hem provaedem ransom. For sure, hem laekem iumi for acceptim disfala present. Jehovah promis dat afta iumi “stretem olketa samting”c witim hem, bae hem no tingim moa olketa sin blo iumi. (Readim Isaiah 1:18.) Iumi hapi tumas bikos loving Dadi blo iumi Jehovah no tingim moa olketa sin blo iumi! Lo semtaem, hem no forgetim olketa gud samting wea iumi duim.—Ps. 103:​9, 12; Heb. 6:10.

9. Why nao iumi shud duim best for focus lo wat iumi savve duim distaem and lo future?

⁹ If iu sorre bikos iu regretim wat iu duim lo past, duim best blo iu for focus lo wat iu savve duim distaem and lo future, winim wei for ting abaotem wat hem happen bifor. Tingim example blo aposol Paul. Hem regretim hao hem raf and persecutim olketa Christian, bat hem savve dat Jehovah forgivim hem. (1 Tim. 1:​12-15) So waswe, Paul gohed for ting abaotem olketa sin wea hem duim bifor? For sure Paul no duim datwan, lo sem wei wea hem no laek for ting abaotem staka samting wea hem archivem taem hem wanfala Pharisee. (Phil. 3:​4-8, 13-15) Instead, Paul strong for duim ministry and luk go lo future. Olsem Paul, hard for iu changem samting wea happen lo past. Bat iu savve iusim situation blo iu distaem for honorim Jehovah and luk forward for nambawan future wea hem promisim for iu.

10. Wat nao iumi savve duim if samting wea iumi duim lo past hem spoelem narawan?

¹⁰ Maet iu feel guilty lo samfala samting wea iu duim lo past wea spoelem olketa narawan. Wat nao iu savve duim? Duim best blo iu for stretem datfala situation, datwan includim wei for sei sorre. (2 Cor. 7:11) Askem Jehovah for helpem olketa wea safa bikos lo nogud samting wea iu duim. Hem savve helpem iu and olketa wea iu mekem olketa for feel nogud, for no givap and kasem bak peace.

11. Wat nao iumi savve lanem from example blo profet Jonah? (Lukim tu piksa.)

¹¹ Lane from olketa past mistek, and willing for letem Jehovah iusim iu for duim eni samting wea hem laekem. Tingim example blo profet Jonah. Instead for hem obeyim komand blo God for go lo Nineveh, Jonah ranawe lo opposite direction. Jehovah disciplinem Jonah, and hem lane from mistek blo hem. (Jonah 1:​1-4, 15-17; 2:​7-10) Jehovah no givap lo hem. God givim hem nara chance for go lo Nineveh, and Jonah kwiktaem for obey. Jonah no letem feeling for regretim olketa past mistek for stopem hem for acceptim datfala assignment from Jehovah.—Jonah 3:​1-3.

JEHOVAH IUSIM HOLY SPIRIT FOR COMFORTIM IUMI

12. Hao nao Jehovah givim iumi peace taem iumi deal witim wanfala barava hard taem? (Philippi 4:​6, 7)

¹² Jehovah savve iusim holy spirit for comfortim iumi taem iumi kasem wanfala barava hard taem or taem nogud samting hem happen. Tingim experience blo Ron and Carol. Son blo tufala hem suisaed. Tufala sei: “Mitufala go thru lo staka hard taem bifor, bat disfala situation hem barava worse. Staka taem mitufala no savve sleep lo naet so mitufala prea, and taem olsem, mitufala kasem datfala peace wea Bible describem lo Philippi 4:​6, 7.” (Readim.) If iu gohed for deal witim wanfala hard taem wea mekem heart blo iu for brek, storyim evriting lo Jehovah, nomata hao many taems iu duim datwan and nomata for hao long. (Ps. 86:3; 88:1) Gohed askem Jehovah for holy spirit. Hem bae no ignorem wat iu askem.—Luke 11:​9-13.

13. Hao nao holy spirit savve helpem iumi for gohed faithful for worshipim Jehovah? (Ephesus 3:16)

¹³ Hao, iu go thru lo wanfala hard taem wea mekem iu barava stress? Holy spirit savve strongim iu for gohed faithful for worshipim Jehovah. (Readim Ephesus 3:16.) Tingim experience blo wanfala sista wea nem blo hem Flora. Taem hem and hasband blo hem serve olsem missionary, hasband blo hem no faithful lo hem, and tufala divorce. Flora sei: “Mi feel sorre tumas from hasband blo mi no faithful, and mi no savve stop for ting abaotem datwan. Mi prea lo Jehovah for givim holy spirit lo mi mekem mi no givap. Jehovah comfortim mi, and helpem mi deal witim datfala situation wea lo firstaem hem hard tumas for mi.” Flora luksavve God helpem hem for gohed trustim hem and helpem hem lo eni hard taem wea hem kasem. Flora sei: “Toktok lo Psalm 119:32 hem encouragem mi, wea sei: ‘Bae mi laekem tumas for followim olketa komandment blo iu. Bikos iu mekem spes for hem insaed heart blo mi.’”

14. Wat nao iumi savve duim for kasem holy spirit?

¹⁴ Afta iu askem God for givim holy spirit lo iu, wat nao iu savve duim? Duim olketa samting wea bae helpem iu for kasem holy spirit. Diswan includim wei for attendim olketa meeting and preaching waka. Readim Bible evriday mekem mind blo iu fulap lo tingting blo Jehovah. (Phil. 4:​8, 9) Taem iu readim Bible, faendem olketa story abaotem pipol wea kasem hard taem and ting raonem hao Jehovah helpem olketa for no givap. Sandra hem safa bikos hem kasem staka hard taem. Hem sei: “Story blo Joseph barava encouragem mi. Hem no letem olketa hard taem and injustice wea hem feisim for spoelem relationship blo hem witim Jehovah.”—Gen. 39:​21-23.

JEHOVAH IUSIM OLKETA BRATA AND SISTA FOR COMFORTIM IUMI

15. Hu nao savve comfortim iumi, and hao nao olketa savve helpem iumi? (Lukim tu piksa.)

¹⁵ Taem iumi safa, olketa brata and sista savve “barava comfortim” iumi. (Col. 4:11) Love wea olketa brata and sista showimaot, hem pruvim dat Jehovah lovem iumi. Olketa brata and sista comfortim iumi taem olketa willing for lisin, or sapotim iumi taem olketa spendem taem witim iumi. Olketa maet sharem wanfala encouraging scripture or prea witim iumi.d (Rome 15:4) Samfala taem, maet wanfala brata or sista remindim iumi lo tingting blo Jehovah and datwan savve helpem iumi for gohed balance. Samfala taem olketa savve helpem iumi lo olketa nara wei tu, olsem for provaedem kaikai taem iumi kasem hard taem.

16. Wat nao iumi savve duim mekem olketa brata and sista helpem iumi?

¹⁶ Samfala taem, maet iumi nao need for askem olketa brata and sista for help. Olketa lovem iumi and laek for helpem iumi. (Prov. 17:17) Bat maet olketa no savve hao iumi feel or wat iumi needim. (Prov. 14:10) If iu stragol for deal witim sorre feeling, storyim datwan witim olketa mature fren blo iu. Talem olketa wat nao savve helpem iu. Iu maet story witim wanfala or tufala elder wea iu klos lo olketa. Samfala sista kasem comfort taem olketa story witim nara mature sista.

17. Wat nao samfala challenge wea savve stopem iumi for kasem encouragement, and hao nao iumi savve winim datwan?

¹⁷ Traem best for no isolatim iuseleva. Olketa sorre feeling wea iu garem maet mekem iu no laek for spendem taem witim olketa narawan. Samfala taem, maet olketa brata and sista no understandim iu or talem toktok wea maet mekem iu feel nogud. (Jas. 3:2) No letem olketa challenge olsem for stopem iu for kasem encouragement wea iu needim from olketa narawan. Wanfala elder wea garem depression, wea nem blo hem Gavin, hem sei: “Staka taem mi no feel laek for story witim olketa frens blo mi.” Nomata olsem, Gavin no letem datfala feeling for winim hem, and hem kasem gud samting taem hem associate witim olketa narawan. Wanfala sista wea nem blo hem Amy sei: “Bikos lo wat mi go thru lo hem bifor, hem no isi for mi trustim pipol. Bat mi gohed lane for lovem and trustim olketa brata and sista olsem hao Jehovah trustim olketa. Mi savve taem mi duim datwan, hem mekem Jehovah hapi and mi tu hapi.”

OLKETA PROMIS BLO JEHOVAH LO FUTURE SAVVE COMFORTIM IUMI

18. Wat nao iumi luk forward for hem lo future, and wat nao iumi savve duim distaem?

¹⁸ Iumi barava luk forward lo future bikos iumi savve hao klosap nao Jehovah bae completely healim iumi lo physical wei and saed lo feeling. (Rev. 21:​3, 4) Lo datfala taem, evri sorre feeling wea iumi bin kasem bifor bae “no kamap tu lo heart.” (Isa. 65:17) Olsem iumi bin storyim finis, distaem Jehovah hem gohed for “bandagem garekil” blo iumi. So gohed for mekius lo evri samting wea Jehovah provaedem for comfortim and helpem iu. No enitaem daotem dat hem barava kea for iu.—1 Pet. 5:7.