LAEF BLO CHRISTIAN
Jehovah Helpem Olketa wea Tingting blo Olketa Wikdaon
Evriwan savve sorre samfala taem. Feeling for sorre hem no samting wea showimaot iu wik lo spiritual saed. Jehovah tu hem experiencem wei for feel sorre samfala taem. (Ge 6:5, 6) Bat hao sapos staka taem iumi savve feel sorre tumas?
Prea lo Jehovah for help. Jehovah hem barava interest lo hao iumi feel and tingting blo iumi. Hem savve taem iumi hapi and taem iumi sorre. Hem minim tingting blo iumi and hao iumi feel abaotem wanfala samting. (Ps 7:9b) Samting wea barava important nao, Jehovah kea abaotem iumi and hem savve helpem iumi for deal witim olketa feeling for sorre or taem iumi maet depress.—Ps 34:18.
Protectim tingting blo iu. Olketa negative tingting savve affectim hapi blo iumi and worship blo iumi for Jehovah. From diswan, iumi mas protectim gud heart blo iumi, datwan minim for protectim iumiseleva.—Pr 4:23.
WATCHIM VIDEO HAO OLKETA BRATA AND SISTA GAREM PEACE NOMATA OLKETA KASEM SIK DEPRESSION, AND THEN ANSAREM OLKETA KWESTIN HIA:
Wat nao olketa samting wea Nikki duim for helpem hem deal witim datfala sik depression?
Why nao Nikki feel dat hem needim medical help?—Mt 9:12
Olketa wanem wei nao Nikki depend lo Jehovah for helpem hem?