Waswe, Iu Savve Finis?

Hao nao archaeology pruvim dat Belshazzar hem wanfala king blo Babylon?

FOR staka year, pipol wea no trustim Bible sei King Belshazzar wea buk blo Daniel storyim, hem no really stap. (Daniel 5:1) Olketa ting olsem bikos olketa archaeologist no faendem eni pruv wea showimaot datwan. Bat, gogo lo 1854 datwan hem change. Why?

Lo datfala year, wanfala bigman blo Britain, John George Taylor, hem go lo old city blo Ur wea distaem hem part lo southern Iraq. Lo there, insaed wanfala bigfala taoa, hem faendem samfala smol clay cylinder. Olketa clay cylinder hia hem samting olsem 10 centimeter long, and hem garem olketa raeting lo hem. Raeting wea stap lo wanfala lo olketa clay cylinder hia hem wanfala prea wea olketa savve talem for King Nabonidus blo Babylon and firstborn son blo hem, Belshazzar. Taem olketa faendem datwan, nomata olketa man wea no trustim Bible agree hao datwan barava pruvim Belshazzar hem really stap bifor.

Nomata olsem, Bible no just storyim nomoa dat Belshazzar hem stap bat hem storyim tu hao hem wanfala king. Olketa wea no trustim Bible no bilivim datwan. Olsem example, lo samting olsem 1875, wanfala scientist lo England, William Talbot, storyim hao samfala pipol sei “Bel-sar-ussur [Belshazzar] hem rul lo semtaem witim dadi blo hem Nabonidus.” Bat hem sei, “No eni pruv stap.”

Bat olketa faendem pruv hao Belshazzar hem wanfala king taem olketa faendem olketa raeting wea stap lo olketa nara clay cylinder wea storyim wei wea King Nabonidus, dadi blo Belshazzar, hem no savve stap lo kapitol city for samfala year. Wanem nao savve happen taem King Nabonidus no stap? Encyclopaedia Britannica sei: “Taem Nabonidus go lo nara ples, hem givim paoa lo son blo hem Belshazzar for rul and for lukaftarem big haf lo army blo hem.” So lo olketa taem olsem, Belshazzar nao ruler lo Babylon. Dastawe, Alan Millard, wanfala archaeologist and man wea savve tumas lo languis hem sei hem fitim nomoa “for Bible buk Daniel kolem Belshazzar ‘king.’”

Bat, for olketa servant blo God, main samting wea pruvim iumi fit for trustim and bilivim hao buk blo Daniel kam from God, hem bikos datwan hem samting wea Bible seleva talem.—2 Tim. 3:16.