Hao Nao Prea Savve Helpem Iu?
Pamela go for lukim doctor taem hem kasem big sik. Hem prea lo God tu for strongim hem for deal witim disfala hard taem. Hao prea helpem hem?
Pamela sei: “Staka taem mi fraet tumas taem mi tekem treatment for cancer blo mi. Bat taem mi prea lo Jehovah God, mi garem peace and no fraet nao. Mi gohed kasem pain, bat prea helpem mi for garem stret tingting. Taem pipol askem mi hao nao mi feel, mi sei: ‘Mi no feel gud, bat mi hapi nomoa!’”
Iumi no need for weit kasem taem iumi kasem big sik bifor iumi prea. Iumi evriwan kasem olketa challenge, wea big and smol, and staka taem iumi needim help for deal witim datwan. Hao prea savve helpem iumi?
Bible sei: “Putim evri wari blo iu lo hand blo Jehovah and hem bae strongim iu. Hem bae nating letem gudfala man for foldaon.” (Psalm 55:22, NW) Datwan comfortim iumi! So hao nao prea savve helpem iu? Taem iu prea lo stretfala wei, God bae givim wat iu needim for deal witim hard taem wea iu feisim.—Lukim box “Gud Samting Iu Savve Kasem From Prea.”