Wat Nao Savve Helpem Iumi for Garem Gud Laef?

Olketa article bifor diswan storyim hao pipol waka hard for garem gud laef taem olketa trustim olketa samting olsem fate, hae education, selen, and for duim gud samting for narawan. If iu duim olketa samting hia for garem gud laef, hem olsem iu laek for go lo wanfala ples bat iu iusim wanfala rong map. Hao, datwan minim no eni samting stap for helpem iu garem gud laef? Nomoa!

KASEM BEST ADVAES FROM CREATOR

Taem iumi mekem disison, iumi savve askem advaes from samwan wea mature and wise winim iumi. Olsem tu, iumi savve kasem best advaes for garem gud laef from samwan wea stap longtaem kam finis and wea barava wise winim iumi. Iumi savve readim olketa advaes blo hem lo wanfala buk wea olketa raetem winim 3,500 year go finis. Datfala buk nao hem Bible.

Why nao iumi fit for trustim Bible? Bikos hem kam from samwan wea stap longtaem kam finis and wise winim eniwan lo universe. Bible sei hem “Man hu hemi bin stap kam fo evritaem olowe” and bae hem “gohed fo stap olowe nao.” (Daniel 7:9; Sams 90:2) Hem nao “mekem skae wetem evrisamting wea hemi stap long hem, an hemi mekem tu disfala wol.” (Aesaea 45:18) Hem talem iumi hao nem blo hem nao, Jehovah.—Aesaea 42:8.

Bible no sei wanfala culture or tribe hem gud winim narawan. Datwan hem bikos Bible kam from Creator blo iumi. Olketa advaes lo Bible fitim iumi evriwan. Hem stap lo staka languis and olketa distributim lo staka ples winim eni nara buk.a So pipol evriwea savve readim Bible and hem savve helpem olketa. Olketa samting hia agree witim disfala toktok lo Bible wea sei:

“God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.”—ACTS 10:34, 35.

Olsem parents wea lovem and laek for helpem pikinini, Jehovah God hem Dadi wea lovem iumi and givim kam Bible for helpem iumi. (2 Timothy 3:16) Iu savve trustim toktok blo hem wea stap lo Bible bikos hem nao wakem iumi and hem savve lo wanem bae mekem iumi hapi.

IUMI SAVVE TRUSTIM BIBLE

Iumi savve trustim wanem Bible talem abaotem future bikos samting olsem 2,000 year go finis hem storyim olketa samting wea bae happen lo world and wei blo pipol wea iumi lukim distaem.

OLKETA SAMTING WEA BAE HAPPEN

“Bae pipol long wanfala ples faetem pipol long nara ples and pipol long wanfala kantri faetem pipol long nara kantri. Olketa bigfala earthquake bae sekem staka ples, and olketa barava nogud sik and olketa taem bilong bigfala hangre bae kasem plande pipol.”—LUKE 21:10, 11.

WEI BLO PIPOL

“Long olketa last day bae hem barava difren and bae evri samting hem hard tumas. Pipol bae tingim olketa seleva nomoa, laekem tumas selen, tok praod, mekhae long olketa seleva, tok spoelem God and man, and no obeyim dadi and mami. Olketa bae no savve tinghae, bae no faithful, no garem love insaed long famili, and no willing for agree. Olketa bae laea for spoelem narawan, no savve kontrolem seleva, raf, and no laekem gud samting. Olketa bae spoelem fren bilong olketa, bighed, and praod tumas. Olketa bae no lovem God, bat bae interest nomoa for enjoyim seleva.”—2 TIMOTHY 3:1-4.

Hao nao Bible savve storyim olketa samting wea happen distaem? Maet iu tu bae agree witim wanem Leung, from Hong Kong talem. Hem sei: “Longtaem kam finis Bible storyim olketa profesi hia. No eni man savve talem wanem bae happen lo future and bae hem kamap tru. So Bible mas kam from samwan wea barava wise winim iumi.”

Staka profesi wea Bible storyim hem happen finis.b Datwan pruvim Bible hem toktok blo God. Jehovah sei: “Mi nomoa mi God, an no eni narafala god moa hemi stap olsem mi. Longtaem bifoa yet, mi talemaot finis olketa samting wea hemi hapen.” (Aesaea 46:9, 10) So iumi fit for trustim wanem Bible talem abaotem future.

BIBLE SAVVE HELPEM IU DISTAEM AND FOR OLOWE

Taem iu followim olketa advaes lo Bible, bae hem helpem iu. Bae iumi storyim samfala example.

GAREM BALANCE TINGTING ABAOTEM WAKA AND SELEN

“Hemi moabeta fo yumi waka lelebet an garem lelebet samting nomoa, winim yumi garem staka samting from yumi barava wakahad tumas olsem yumi aftarem nomoa win.”—EKLESIASTES 4:6.

HAO FAMILI SAVVE HAPI

“Evriwan long iufala mas lovem waef bilong hem olsem hem lovem hemseleva, and tu, waef mas barava respectim hasband bilong hem.”—EPHESUS 5:33.

HAO FOR STAP GUD WITIM NARAWAN

“Yu no kros, an yu no wari, tufala samting ya i wei fo mekem trabol hemi kasem yu nomoa ya.”—SAMS 37:8.

If iu followim wanem Bible talem bae iu garem gud laef distaem and lo future. Bible storyim samfala naes promis blo God for future

EVRIWAN BAE STAP GUD AND GAREM PEACE

“Olketa ya i hapi, bikos olketa stap gudfala.”—SAMS 37:11.

EVRIWAN BAE GAREM HAOS AND KAIKAI

“Bae olketa pipol save bildim olketa haos blong olketa, an olketa seleva nao bae i stap insaet . . . An bae olketa save plantem olketa plantesin long grep, an olketa seleva tu bae i dringim waen long hem.”—AESAEA 65:21, 22.

NO ENIWAN BAE SIK OR DAE

“No eniwan bae dae and no enitaem bae pipol sorre or krae or feelim pain tu.”—REVELATION 21:4.

Wat nao iu savve duim for kasem datkaen laef? Next article bae storyim datwan.

a For savve lo samfala samting moa abaotem hao olketa transleitim and distributim Bible, go lo www.jw.org and go lo WANEM BIBLE TEACHIM > HISTORY & BIBLE.

b For savve lo samfala samting moa, lukim chapter 9 lo buk The Bible—God’s Word or Man’s? wea Olketa Jehovah’s Witness pablisim. Hem stap online lo www.jw.org. Go lo LIBRARY > BOOKS & BROCHURES.