HAO FOR LUSIM WEI FOR HEIT

1 | No Fevarem Eniwan

Wat Bible Teachim:

“God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.”—ACTS 10:34, 35.

Wat Hem Minim:

Jehovaha God no judgem iumi followim kantri wea iumi kam from, kala skin, or culture blo iumi. Bat hem lukluk lo tingting and wat iumi laekem. Bible sei, “man hemi lukluk long body nomoa, bat mi [Jehovah] mi lukluk insaet long haat blong hem.”—Fas Samuel 16:7.

Wat Iu Savve Duim:

Nomata iumi no savve lukim wat nao insaed heart blo pipol, iumi savve followim example blo God for no fevarem eniwan. Traem best for luk lo wei blo each wan and no ting dat from hem kam from wanfala grup blo pipol, bae hem olsem olketa tu. If iu luksavve iu garem negative feeling abaotem olketa narawan, maet from olketa kam from difren kantri or garem difren kala skin, prea lo God and askem hem for helpem iu lusim datkaen feeling. (Sams 139:23, 24) If iu barava askem Jehovah for helpem iu for no fevarem eniwan, hem bae herem prea blo iu and helpem iu.—1 Peter 3:12.

a Jehovah hem nem blo God.—Psalm 83:18, NWT.

“No enitaem bifor mi story gud witim wanfala whiteman . . . Mi insaed nao lo wanfala famili evriwea lo world wea lovem each other.”—TITUS

Experience—TITUS

Lusim Wei for Heit

Titus joinim wanfala raf grup wea no agree lo olketa law for separatem blak and white pipol. Hem sei: “Mifala savve go lo olketa ples lo taon wea olketa blakman shud no go lo hem, olsem lo olketa hotel and olketa bar just for startim faet.” Titus sei from hem heitim olketa narawan, datwan mekem hem for raf tumas, and hem sei tu: “Sapos mi argue witim eniwan, nomata hem man or woman, mi nao first wan for hitim hem.”

Titus start for change taem hem study witim Olketa Jehovah’s Witness. Wat hem readim lo Bible barava changem tingting blo hem. Datfala promis for future wea sei “no eniwan bae dae and no enitaem bae pipol sorre or krae or feelim pain” barava encouragem hem.—Revelation 21:3, 4.

Firstaem, Titus faendem hem no isi for aotem feeling for heit. Hem sei “hem hard tumas for changem tingting and wei blo hem.” Bat scripture wea helpem hem nao Acts 10:34, 35 wea sei God no fevarem eniwan.

Wanem gud samting nao Titus kasem? Hem sei: “Mi luksavve Olketa Jehovah’s Witness nao tru religion bikos olketa lovem each other nomata olketa kam from difren kantri or garem difren kala skin. Nomata mi no baptaes yet, wanfala whiteman lo kongregeson invaetem mi for go kaikai lo haos blo hem. Mi hard for bilivim datwan. No enitaem bifor mi story gud witim wanfala whiteman, bat distaem mi kaikai lo haos blo wanfala whiteman. Mi insaed nao lo wanfala famili evriwea lo world wea lovem each other.”