HAO FOR LUSIM WEI FOR HEIT

2 | No Changem Bak Nogud Samting

Wat Bible Teachim:

“Sapos eniwan duim nogud samting long iufala, iufala no changem bak. . . . Traem best bilong iufala for stap gud witim olketa narawan. . . . bikos olketa Holy Raeting talem finis: ‘Jehovah hem sei, mi nao bae changem bak nogud samting. Mi nomoa savve duim diswan.’”—ROME 12:17-19.

Wat Hem Minim:

Hem normal for iumi kros taem narawan duim nogud samting lo iumi. Bat God no laekem iumi for changem bak datwan. Hem laekem iumi for patient bikos hem promis klosap nao bae hem stretem evri nogud samting.—Sams 37:7, 10.

Wat Iu Savve Duim:

Taem iumi changem bak nogud samting, hem just mekem wei for heit worse go moa. So if eniwan duim nogud samting lo iu, no changem bak. Trae for kontrolem iuseleva and no duim eni nogud samting. Samfala taem hem gud for no tingting tumas abaotem samting wea happen. (Provebs 19:11) Bat samfala taem hem gud for reportim datwan. For example, if iu victim blo wanfala crime, iu savve reportim lo olketa police or olketa wea garem paoa for deal witim datwan.

Man wea changem bak nogud samting hem spoelem hemseleva

Hao if no eni nara wei stap for stretem datfala problem? Or hao if iu duim finis evri samting wea iu fit for duim for stretem datwan? No changem bak nogud samting bikos datwan bae mekem datfala problem for worse go moa. Bat sapos iu no changem bak nogud samting wea happen, hem bae help for stopem wei for heit. Hem gud for trustim God nao bae stretem datfala problem for iumi. Bible sei “yu mas trastem hem, nao bae hemi helpem yu.”—Sams 37:3-5.

Experience—ADRIÁN

Lusim Wei for Changem Bak Nogud Samting

Taem Adrián teenager, hem man for faet and raf tumas. And hem man for changem bak nogud samting wea eniwan duim lo hem. Hem sei: “Staka taem mifala savve faet lo gun and from datwan, samfala taem mi garekil and leidaon hafded lo street.”

Adrián start for studyim Bible taem hem 16 years. Hem sei: “Taem mi gohed for studyim Bible, mi luksavve mi mas changem wei blo mi.” Hem mas lusim wei for heit and no raf lo eniwan. Scripture wea barava helpem hem nao Rome 12:17-19 wea sei for no changem bak nogud samting. Hem sei: “Mi start for luksavve Jehovah bae stretem olketa nogud samting wea happen lo taem wea hem markem. Isisi mi lusim nao olketa nogud wei blo mi.”

Wanfala evening, samfala boy blo wanfala gang wea olketa enemy bifor attakim Adrián. Leader blo datfala gang tok kros “Feisim mi! Adrián sei: “Semtaem nomoa mi laek for faet nao.” Bat instead for hem faet bak, hem talem wanfala short prea lo Jehovah and lusim datfala ples.

Adrián sei: “Lo next day mi meetim leader blo datfala gang lo road. Taem mi lukim hem mi laek for killim hem, bat mi prea lo Jehovah for helpem mi no duim datwan. Datfala boy kam lo mi and mi sapraes taem hem sei: ‘Sorre tumas for samting wea mi duim lo iu last naet. Mi no laek for duim kaen samting olsem, mi laek for olsem iu tu. Mi laek for studyim Bible.’ Mi hapi tumas mi kontrolem kros blo mi. Bihaen datwan, mi start for studyim Bible witim hem.”