STUDY ARTICLE 22
Gudfala Advaes wea Savve Helpem Iumi lo Laef
“[Jehovah] nomoa hemi mekem iu waes.”—PROVEBS 2:6.
SONG 89 Lisin, Obey, and Kasem Blessing
ARTICLE BAE STORYIMa
1. Why nao iumi barava needim wisdom? (Provebs 4:7)
MASBI taem iu mekem eni important disison, iu askem God for givim iu wisdom bikos iu savve iu needim datwan. (Jas. 1:5) King Solomon storyim hao hem barava important for garem wisdom. (Readim Provebs 4:7.) Wisdom wea Solomon storyim hem no wisdom blo man, bat hem wisdom wea kam from Jehovah God. (Provebs 2:6) Bat waswe, wisdom blo God savve helpem iumi for deal witim olketa difren kaen problem wea iumi feisim distaem? Yes, and datwan nao bae iumi storyim lo disfala article.
2. Wat nao iumi savve duim for garem wisdom?
2 Wanfala samting wea savve helpem iumi for garem wisdom hem for studyim and followim advaes blo tufala man wea garem bigfala wisdom. Wanfala hem Solomon. Bible sei: “God hemi givim bikfala waes an barava gudfala tingting long King Solomon.” (Fas Kings 4:29) Then narawan hem Jesus wea barava wise winim eni nara man. (Matt. 12:42) Bible profesi olsem abaotem Jesus: “Bae spirit blong [Jehovah] nao hemi stap long hem. . . . Hemi mekem hem fo waes fogud an fo save fogud.”—Aesaea 11:2.
3. Wat nao bae iumi storyim lo disfala article?
3 From God givim wisdom lo Solomon and Jesus, tufala fit for givim olketa gudfala advaes abaotem olketa samting wea savve helpem iumi lo laef. Lo disfala article bae iumi storyim thrifala samting hia: Hao for garem balance tingting abaotem selen, waka for selen, and abaotem iumiseleva.
GAREM BALANCE TINGTING ABAOTEM SELEN
4. Waswe, laef blo Solomon and Jesus semsem?
4 Solomon hem rich tumas, hem stap lo naes haos, and hem garem evri material samting wea hem enjoyim. (Fas Kings 10:7, 14, 15) Bat Jesus no ownim eni haos and no garem staka material samting tu. (Matt. 8:20) Nomata olsem, tufala evriwan garem balance tingting abaotem material samting bikos tufala garem wisdom blo Jehovah God.
5. Hao nao tingting blo Solomon abaotem selen?
5 Solomon sei selen savve protectim iumi. (Eklesiastes 7:12) Iumi iusim selen for baem olketa samting wea iumi needim for laef, and maet samfala samting wea iumi laekem tu. Nomata Solomon hem rich and garem staka samting, hem luksavve olketa nara samting hem important winim selen. For example, hem sei: “Hem gud for man garem gudfala nem winim for hem kamap barava rich.” (Prov. 22:1, NWT) Solomon luksavve tu hao pipol wea laekem selen tumas maet olketa no hapi or no savve satisfae witim wanem olketa garem. (Eklesiastes 5:10, 12) And hem sei iumi shud no depend tumas lo selen, bikos nomata haomas selen iumi garem hem savve kwiktaem nomoa for finis.—Provebs 23:4, 5.
Sapos iumi aftarem olketa material samting, datwan savve mekem hem no isi for iumi busy lo Kingdom waka (Lukim paragraf 6-7)d
6. Hao nao tingting blo Jesus abaotem olketa material samting? (Matthew 6:31-33)
6 Jesus garem balance tingting abaotem material samting. Hem enjoyim naes kaikai and gudfala wine. (Luke 19:2, 6, 7) First mirakol wea hem duim, hem changem wata for kamap gudfala wine. (John 2:10, 11) And Bible sei lo day wea hem dae, hem werem kaleko wea barava expensive. (John 19:23, 24) Bat material samting no barava important lo laef blo Jesus. Hem sei lo olketa follower blo hem: “No eniwan savve waka for tufala boss . . . Iufala no savve worshipim God and long semtaem busy for kasem staka selen.” (Matt. 6:24) Jesus sei sapos Kingdom hem first samting lo laef blo iumi, Jehovah bae provaedem wanem iumi needim.—Readim Matthew 6:31-33.
7. Hao nao laef blo wanfala brata wea garem balance tingting abaotem selen?
7 Staka brata and sista kasem gud samting from olketa followim advaes lo Bible abaotem selen. Tingim example blo Daniel, wanfala singol brata. Hem sei: “Taem mi teenager mi disaed for iusim laef blo mi for Jehovah.” Daniel mekem laef blo hem simpol, so hem garem taem for duim staka samting lo waka blo Jehovah. Daniel sei tu: “Mi barava hapi lo disison blo mi. Hem tru, sapos mi busy for waka for selen maet mi rich, bat bae mi no garem olketa naes fren wea mi garem distaem. And tu, from mi busy for duim waka blo Jehovah, datwan mekem mi hapi tumas. Selen hem no savve mekem mi hapi olsem olketa blessing wea mi kasem from Jehovah.” Tru nao, bae iumi garem gudfala laef taem iumi busy for duim waka blo Jehovah and no busy for aftarem selen.
GAREM BALANCE TINGTING ABAOTEM WAKA FOR SELEN
8. Hao nao iumi savve Solomon garem balance tingting abaotem waka? (Eklesiastes 5:18, 19)
8 Solomon sei hapi wea iumi kasem from hard waka blo iumi hem ‘present from God.’ (Readim Eklesiastes 5:18, 19.) Hem sei tu: “Wakahad an bae yu garem gud samting.” (Provebs 14:23) Solomon savve diswan hem tru, bikos hem man for waka hard. Hem buildim olketa haos and olketa taon, plantim olketa grape planteison, and wakem olketa garden and olketa pool for watarem garden. (Fas Kings 9:19; Eklesiastes 2:4-6) Datwan hem big waka and masbi hem hapi from wanem kamaot from datwan. Bat Solomon luksavve for hem barava hapi hem need for duim olketa spiritual samting tu. For example, hem leadim waka for buildim wanfala nambawan temple for Jehovah, wea datfala project hem gohed for sevenfala year! (Fas Kings 6:38; 9:1) From Solomon duim staka difren samting lo laef blo hem, gogo hem luksavve samting wea important nao hem for duim wanem Jehovah laekem. Hem sei: “Yu bin herem evri toktok nao, an las toktok nomoa hemi olsem, Yumi mas tinghae long God, an mas obeim toktok blong hem.”—Eklesiastes 12:13.
9. Hao nao Jesus showimaot hem garem balance tingting abaotem waka?
9 Jesus hem man for waka. Taem hem young hem duim carpenter waka. (Mark 6:3) From Jesus insaed big famili, masbi parents blo Jesus tinghae lo hem from hem givim samfala selen for sapotim famili. And tu, from Jesus hem perfect, olketa samting wea hem wakem hem mas barava gud so staka pipol bae laek for peim! Nomata Jesus enjoyim and busy lo waka blo hem, hem markem taem for duim olketa spiritual samting. (John 7:15) Taem hem duim ministry blo hem, hem sei lo olketa wea lisin lo hem: “Iufala mas no waka for kaikai wea savve rotten, bat iufala mas waka for kaikai wea no savve rotten and wea mekem man laef olowe.” (John 6:27) And lo Sermon lo Maunten Jesus sei: “Hipimap riches long heven.”—Matt. 6:20.
Hao nao iumi savve balancem waka for selen and olketa spiritual samting? (Lukim paragraf 10-11)e
10. Wat nao wanfala challenge wea maet kamap saed lo waka?
10 Taem iumi followim advaes lo Bible, datwan bae helpem iumi for garem balance tingting abaotem waka for selen. Bible sei olketa Christian “mas garem waka” and duim gud datfala waka. (Eph. 4:28) Staka taem olketa boss hapi from iumi honest, waka hard, and duim gud waka blo iumi. Datwan maet mekem iumi laek for duim extra waka from iumi laekem boss for tinghae lo iumi Olketa Jehovah’s Witness. Bat sapos iumi duim datwan, maet iumi no garem inaf taem for spendem witim famili or for duim olketa spiritual samting. So maet iumi need for changem samfala samting mekem iumi balance.
11. Wat nao William lanem abaotem hao for garem balance tingting abaotem waka?
11 William, wanfala young brata, storyim wanfala elder wea hem waka for hem bifor, wea garem balance tingting abaotem waka for selen. Hem sei: “[Disfala brata] showimaot nambawan example lo waka blo hem. Hem man for waka hard, and olketa kastoma blo hem hapi bikos hem duim gudfala waka. Bat bihaen lo waka, hem no tingim waka moa. Hem spendem taem witim famili blo hem and duim olketa samting for Jehovah. And iu savve, mi lukim datwan mekem hem hapi tumas!”b
GAREM BALANCE TINGTING ABAOTEM IUMISELEVA
12. Hao nao tingting blo Solomon abaotem hemseleva firstaem, bat gogo wat nao happen?
12 Taem Solomon faithful yet lo Jehovah, hem no tinghae tumas lo hemseleva. From hem young hem luksavve hem no savve lo staka samting and hem askem Jehovah for wisdom. (Fas Kings 3:7-9) And tu, taem Solomon start for rul hem luksavve hem nogud for man hem praod. Hem sei: “Praod fastaem, bagarap bihaen. Bikhed fastaem, foldaon bihaen.” (Provebs 16:18) Bat gogo, Solomon no followim advaes blo hemseleva. Hem kamap praod and no followim samfala law blo God. For example, wanfala law sei Israelite king “mas no garem plande waef, bikos sapos hemi tekem plande woman, bae olketa woman ya i tanem tingting blong hem.” (Diutronomi 17:17) Solomon no followim datfala law and garem 700 waef and 300 concubine, wea staka lo olketa worshipim olketa nara god! (Fas Kings 11:1-3) Maet Solomon tingse bae evri samting olraet nomoa. Bat gogo Solomon kasem nogud samting from hem no obeyim Jehovah.—Fas Kings 11:9-13.
13. Wat nao iumi savve lanem from example blo Jesus?
13 Jesus no tinghae lo hemseleva, bat hem hambol. Bifor Jesus kam lo earth hem duim staka nambawan samting for Jehovah. Jehovah iusim Jesus “for wakem evri nara samting long heven and long earth.” (Col. 1:16) Taem Jesus hem baptaes, luk olsem hem ting go bak lo olketa samting wea hem duim taem hem stap witim Dadi blo hem lo heven. (Matt. 3:16; John 17:5) Bat datwan no mekem Jesus for praod, and hem no tingse hem gud winim narawan. Hem talem olketa disaepol hao hem ‘no kam lo earth for olketa narawan mas waka for helpem hem, bat hem kam for helpem olketa, and for givim laef blo hem for baem bak staka pipol.’ (Matt. 20:28) Jesus sei tu, hem no savve duim eni samting followim tingting blo hemseleva. (John 5:19) Jesus hem barava hambol! Hem showimaot nambawan example for iumi.
14. Olsem Jesus storyim, hao nao tingting blo Jehovah abaotem iumi?
14 Jesus teachim olketa follower blo hem for garem balance tingting abaotem olketa seleva. Wantaem, Jesus talem olketa: “[God] kaontem finis tu evri hair long hed bilong iufala.” (Matt. 10:30) Sapos iumi tingse hard for Jehovah lovem iumi, disfala toktok shud encouragem iumi bikos hem showimaot iumi barava important lo Jehovah. Jehovah laekem iumi for worshipim hem and laekem iumi for stap olowe lo niu world, so no daotem love blo hem for iumi.
Sapos iumi no garem balance tingting abaotem iumiseleva, wat nao samfala blessing wea iumi maet misstim? (Lukim paragraf 15)f
15. (a) Wat nao wanfala Wastaoa encouragem iumi for duim? (b) Olsem piksa lo page 24 showim, wat nao samfala blessing iumi bae misstim sapos iumi tingim iumiseleva nomoa?
15 Wanfala Wastaoa lo 2005 encouragem iumi for garem balance tingting abaotem iumiseleva. Hem sei: “Hem nogud for iumi tinghae tumas lo iumiseleva and kamap praod, and tu, hem nogud for iumi ting daonem iumiseleva and tingse iumi iusles. Bat iumi mas garem balance tingting abaotem iumiseleva and luksavve lo olketa samting wea iumi fit for duim and no fit for duim. Wanfala sista sei olsem: ‘Mi no iusles, and mi no spesol tu. Mi garem olketa gudfala wei and samfala wik point tu, semsem olsem evri narawan.’”c So hem barava important for garem balance tingting abaotem iumiseleva.
16. Why nao Jehovah givim iumi olketa gudfala advaes?
16 Jehovah iusim Bible for givim iumi staka gud advaes bikos hem lovem iumi and laekem iumi for hapi. (Aesaea 48:17, 18) Best disison iumi savve mekem for iumi hapi hem for gohed duim wanem Jehovah laekem. Sapos iumi duim datwan, bae iumi no garem olketa problem olsem olketa narawan wea no garem balance tingting abaotem selen, waka for selen, or olketa seleva. So iumi laek for mekem olketa wise disison and duim olketa samting wea mekem Jehovah hapi!—Provebs 23:15.
SONG 94 Tinghae Long Bible
a From Jehovah God givim wisdom lo Solomon and Jesus, datwan mekem tufala barava wise. Lo disfala article, bae iumi storyim samfala gud advaes wea Solomon and Jesus givim abaotem hao for garem balance tingting saed lo selen, waka for selen, and abaotem iumiseleva. And tu, bae iumi storyim experience blo samfala brata and sista wea kasem gud samting from olketa followim advaes lo Bible abaotem olketa samting hia.
b Lukim article lo The Watchtower blo February 1, 2015 wea garem title “How to Enjoy Hard Work.”
c Lukim article lo Wastaoa blo August 1, 2005 wea garem title “Bible Savve Helpem Iu for Really Hapi.”
d OLKETA PIKSA: Tufala piksa hia showim John and Tom, tufala young brata wea stap lo sem kongregeson. John spendem staka taem for lukaftarem car blo hem. Tom iusim car blo hem for tekem olketa narawan for preaching and for olketa meeting.
e OLKETA PIKSA: John waka ovataem. Hem laek mekem boss blo hem for hapi, so evritaem boss askem John for waka ovataem, John duim datwan. Lo sem evening, Tom, wea hem wanfala ministerial servant, go witim wanfala elder lo shepherding kol. Tom talem boss blo hem finis hem no savve waka ovataem lo samfala evening bikos hem bae duim samfala samting lo kongregeson.
f OLKETA PIKSA: John tingim hemseleva nomoa. Tom wea interest for duim olketa spiritual samting garem samfala niu fren from hem waka lo wanfala Assembly Hall project.