Waswe, Iu Savve Finis?

Waswe, bae olketa lo Rome letem pipol for berem samwan wea olketa hangem lo post, olsem olketa duim lo Jesus?

STAKA pipol savve lo story lo Bible abaotem hao olketa hangem Jesus lo wanfala post between tufala criminal. (Matt. 27:35-38) Bat samfala pipol tingse hem no stret hao Bible sei bihaen Jesus dae, olketa redyim body blo hem and berem hem lo wanfala cave (or tomb).​—Mark 15:42-46.

Samfala no agree witim wanem olketa Gospel storyim and sei olketa lo Rome bae no letem pipol for berem Jesus lo wanfala tomb. Olketa tingse olketa lo Rome bae treatim hem difren bikos olketa sei hem wanfala criminal. Ariel Savar, wanfala journalist, storyim why olketa garem datfala tingting. Hem sei: “Olketa lo Rome bae nilam olketa criminal and olketa nara rabis man lo cross for panisim olketa. Samfala savveman tingse hem hard for olketa lo Rome showimaot respect lo body blo kaen man olsem and letem pipol for berem body blo hem lo tomb.” Olketa lo Rome laek for mek shame lo olketa criminal hia, so olketa savve leavim body blo olketa lo post for olketa wild animal kaikaim. Bihaen, bae olketa torowem eni part lo olketa body hia wea stap, insaed wanfala hol.

Olketa archaeologist faendem pruv wea showimaot olketa berem samfala Jew wea olketa hangem lo post firstaem. Lo 1968, olketa faendem olketa bon blo wanfala criminal insaed lo tomb blo wanfala Jew famili klosap lo Jerusalem. Olketa bon hia stap insaed lo box wea olketa kolem ossuary. Bon blo heel blo datfala man tu hem insaed datfala box. Olketa nilam datfala bon lo wanfala pis timba witim wanfala iron nila wea hem 11.5 centimeter long. Sabar sei: “Datfala bon hem blo Yehochanan, wanfala Jew man. Bon hia showimaot wanem olketa Gospel talem abaotem hao olketa berem Jesus, hem tru. . . . Datfala bon hem blo wanfala criminal wea olketa lo Rome letem olketa Jew for berem, lo taem blo Jesus.”

Datfala bon blo Yehochanan mekem samfala kwestinim wanem Bible sei abaotem hao olketa hangem body blo Jesus lo datfala post. Nomata olsem, datfala bon pruvim samfala criminal wea olketa hangem lo post, olketa berem body blo olketa and no just torowem lo hol nomoa. So iumi fit for trustim wanem Bible talem abaotem hao olketa berem body blo Jesus lo wanfala tomb. Pruv stap wea showimaot wanem Bible talem hem tru.

Nara samting tu, Jehovah hem profesi abaotem hao olketa bae berem body blo Jesus lo tomb blo wanfala rich man, and no eniwan savve stopem toktok blo God for kamap tru.—Aesaea 53:9; 55:11.