Tru Wisdom Hem Singaot Big

1. Hao nao samfala ting lo tru wisdom? (Provebs 1:20, 21)

LO STAKA kantri, maet iu lukim olketa brata and sista duim pablik witnessing. Olketa smile and hapi for givim pablikeson for eniwan wea interest. Enitaem iu duim diswan? If olsem, maet datwan mekem iu tingim scripture lo Provebs, wea storyim wise toktok wea singaot big lo pablik ples for pipol herem. (Readim Provebs 1:20, 21.) “Waes toktok” or tru wisdom, hem wisdom blo Jehovah wea stap insaed lo Bible and olketa Bible pablikeson blo iumi. Pipol needim datfala wisdom mekem olketa savve kasem laef olowe. Iumi hapi taem samwan acceptim pablikeson blo iumi. Bat no evriwan acceptim. Samfala no laek for herem wanem Bible talem, and olketa narawan mekfani lo iumi. Samfala tingse Bible hem out-of-date. Samfala tok spoelem olketa raeteous standard wea Bible teachim, and tingse olketa wea followim savve ova tumas for judgem pipol. Nomata olsem, sapos olketa laekem Jehovah mek sure evriwan savve kasem tru wisdom. Hao nao hem duim datwan?

2. Hao nao iumi savve kasem tru wisdom, bat wat nao staka pipol disaed for duim?

² Bible nao wanfala samting wea Jehovah iusim for helpem pipol for kasem tru wisdom. Klosap evriwan garem Bible. And iumi garem tu olketa Bible pablikeson. Iumi tinghae lo Jehovah bikos iumi garem olketa pablikeson hia lo winim 1,000 languis. Olketa wea readim and followim wanem olketa lanem, bae kasem gud samting. Bat staka pipol disaed for no laek herem tru wisdom. Taem olketa mekem disison, olketa depend nomoa lo savve blo olketa seleva or savve blo olketa narawan. Olketa ting daonem iumi bikos iumi disaed for followim wanem Bible talem. Disfala study bae storyim why pipol garem tingting olsem. Firstaem, bae iumi storyim hao iumi savve kasem wisdom from Jehovah.

TAEM IUMI SAVVE LO TINGTING BLO JEHOVAH BAE IUMI GAREM WISDOM

3. Wat nao iumi savve duim for kasem tru wisdom?

³ Wisdom hem savve minim hao for iusim savve wea iumi garem for mekem olketa gud disison. Bat hem no datwan nomoa. Bible sei: “Wei for fraet lo Jehovah hem start blo wisdom, and savve blo Most Holy Wan hem nao wei for minim samting.” (Prov. 9:10, NWT) So bifor iumi mekem eni important disison, iumi mas mek sure hem followim tingting blo Jehovah, wea hem nao “savve blo Most Holy Wan.” Iumi savve kasem wisdom blo God taem iumi studyim Bible and olketa Bible pablikeson. Taem iumi duim datwan, bae iumi garem tru wisdom.​—Provebs 2:5-7.

4. Why nao Jehovah nomoa savve givim iumi tru wisdom?

⁴ Jehovah nomoa savve givim iumi tru wisdom. (Rome 16:27) Why nao iumi sei olsem? First samting, hem Creator, so hem savve gud lo evri samting wea hem creatim. (Sams 104:24) Mek-tu, evri samting wea Jehovah duim hem showimaot wisdom blo hem. (Rome 11:33) Mek-thri, pipol evritaem kasem gud samting taem olketa followim advaes blo Jehovah. (Provebs 2:10-12) If iumi laek for kasem tru wisdom, iumi mas acceptim thrifala samting hia and mek sure iumi tingim olketa samting hia bifor iumi duim eni samting and taem iumi mekem eni disison.

5. Wat nao happen taem pipol no acceptim wisdom blo Jehovah?

⁵ Staka pipol lo world sei evri samting lo nature hem design lo barava spesol wei, bat olketa no biliv lo Creator. Olketa narawan biliv lo God, bat olketa tingse olketa standard lo Bible hem out-of-date and olketa disaed nomoa for duim wanem olketa seleva laekem. From pipol depend nomoa lo wisdom blo olketa and no wisdom blo God, waswe, world hem kamap wanfala gud ples for stap? Waswe, olketa hapi or garem hope for future? Olketa samting iumi lukim lo world distaem hem showimaot diswan hem tru: “No eni wisdom, no eni wei for luksavve, and no eni advaes hem stap wea winim Jehovah.” (Prov. 21:30, NWT) Datwan mekem iumi barava laek depend lo wisdom blo Jehovah! Bat staka pipol no laek duim datwan. Why nao olsem?

WHY NAO PIPOL SAVVE LES LO TRU WISDOM?

6. Olsem Provebs 1:22-25 storyim, hu nao olketa wea les lo tru wisdom?

⁶ Staka pipol no laek for lisin lo tru wisdom wea “kolaot long bik rod.” Bible storyim thrifala grup blo pipol wea les lo wisdom: ‘Olketa wea no garem savve,’ ‘olketa wea mekfani lo pipol,’ and ‘olketa wea karangge.’ (Readim Provebs 1:22-25.) Iumi bae storyim why olketa hia les lo wisdom blo God and iumi bae storyim tu hao for iumi no olsem olketa.

7. Why nao samfala disaed for ‘no garem savve’?

⁷ ‘Olketa wea no garem savve,’ hem olketa wea bilivim nomoa evri samting wea olketa herem and wea isi nomoa for laea lo olketa. (Provebs 14:15) Staka taem iumi meetim kaen pipol olsem lo ministry. Tingim hao staka million pipol bilivim evri samting wea olketa bigman lo religion and politik talem lo olketa. Samfala hia barava feel nogud taem olketa luksavve hao olketa bigman hia laea lo olketa. Bat olketa wea Provebs 1:22 storyim, hem olketa wea disaed for no laek garem savve. (Jeremaea 5:31) Olketa duim nomoa wanem olketa seleva laekem, and no laek for lanem wanem Bible talem or obeyim olketa standard lo Bible. Staka pipol garem sem tingting olsem wanfala woman lo Quebec, Canada, wea strong lo religion blo hem. Hem sei lo wanfala Witness, “If priest hem laea lo mifala, datwan hem rong blo hem, no mifala!” Iumi no laek olsem olketa hia wea savve lo stret samting, bat olketa disaed for no duim!​—Provebs 1:32; 27:12.

8. Wat nao savve helpem iumi for kasem wisdom?

⁸ Bible encouragem iumi for no olsem olketa wea no laek for garem savve, bat for “mas garem tingting bilong man wea mature.” (1 Cor. 14:20) Iumi kasem wisdom taem iumi followim olketa Bible principle. If iumi duim datwan, bae iumi lukim hao Bible helpem iumi for mekem olketa wise disison and misstim olketa problem. Hem gud for tingim sapos iumi gohed for kamap mature. For example, if iu studyim Bible and go lo olketa meeting, bat iu no dedicate lo Jehovah and baptaes yet, hem gud for ting raonem wanem iu shud duim mekem iu kasem datfala goal. If iumi baptaes finis, waswe, iumi kamap gud lo wei for preach and teachim gud nius lo pipol? Waswe, olketa disison wea iumi mekem hem showimaot iumi followim olketa Bible principle? Waswe, iumi deal witim olketa narawan olsem hao Jesus duim? If iumi need for changem samting lo laef blo iumi, followim olketa reminder blo Jehovah wea “mekem man wea no garem savve for kamap wise.”​—Ps. 19:7, NWT.

9. Wat nao ‘olketa wea mekfani lo pipol’ duim wea showimaot olketa les lo tru wisdom?

⁹ Mek-tu grup blo pipol wea les lo tru wisdom hem ‘olketa wea mekfani lo pipol.’ Samfala taem iumi story witim olketa pipol olsem lo ministry. Olketa laek tumas for mekfani lo pipol. (Sams 123:4) Bible sei lo olketa last day, staka pipol bae mekfani lo olketa gudfala samting. (2 Pet. 3:3, 4) Olsem tufala son-in-law blo Lot, distaem samfala no laek for lisin lo olketa warning from God. (Gen. 19:14, NWT) Staka mekfani lo olketa wea followim olketa Bible principle. Olketa duim olsem bikos olketa laekem “nomoa olketa nogud samting wea olketa seleva laek duim wea God no hapi long hem.” (Jude 7, 17, 18) Samting wea Bible talem abaotem olketa hia, hem fitim tu olketa apostate and olketa wea no laek obeyim Jehovah!

10. Olsem Sams 1:1 storyim, wanem nao iumi savve duim mekem iumi no olsem olketa wea laek for mekfani lo pipol?

¹⁰ Wanem nao iumi savve duim mekem iumi no olsem olketa wea laek for mekfani lo pipol? Wanfala wei hem for no associate witim olketa wea savve tok daonem olketa samting. (Readim Sams 1:1.) Diswan minim iumi mas no lisin and readim eniting wea kam from olketa apostate. Iumi mas careful nogud iumi komplenim nomoa evri samting, and no trustim Jehovah and olketa direction from organization blo hem. For iumi no duim datwan, iumi need for tingim olketa kwestin hia: ‘Waswe, mi evritaem talem negative toktok abaotem niu direction and niu wei wea iumi minim wanfala scripture? Waswe, mi laek tumas for luk for olketa mistek blo olketa brata wea lead lo kongregeson?’ If iumi laek for mekem Jehovah hapi, iumi mas kwiktaem stop for duim olketa samting olsem.​—Provebs 3:34, 35.

11. Hao nao ‘olketa wea karangge’ ting lo olketa raeteous standard blo Jehovah?

¹¹ Mek-thri grup blo olketa pipol wea les lo tru wisdom, hem ‘olketa wea karangge.’ Olketa karangge bikos olketa no laek followim olketa raeteous standard blo God, and duim nomoa wat olketa seleva tingse hem stret. (Provebs 12:15) Olketa againstim Jehovah wea givim tru wisdom. (Sams 53:1) Taem iumi meetim olketa lo ministry, staka taem olketa barava tok spoelem iumi bikos iumi followim olketa standard lo Bible. Bat olketa hard for helpem iumi for garem gudfala laef. Bible sei: “[“Tru wisdom,” NWT] hemi dip tumas fo krangge man. Hemi no save tok gudfala long miting blong olketa bikman.” (Provebs 24:7) Olketa wea karangge no savve storyim eni gudfala advaes. Dastawe Jehovah warnim iumi for mas “stap farawe long krangge man”!​—Provebs 14:7.

12. Wat nao savve helpem iumi for no olsem olketa wea karangge?

¹² Iumi no laek for olsem olketa wea les lo advaes blo God, bat iumi laek for gohed followim olketa wei blo God and olketa raeteous standard blo hem. For helpem iumi duim datwan, iumi savve comparem wat hem happen lo olketa wea obey and olketa wea no obey. Iumi lukim hao karangge pipol kasem staka problem bikos olketa no followim wise advaes blo Jehovah. Bat iu luksavve laef blo iu hem gud bikos iu obeyim God.​—Sams 32:8, 10.

13. Waswe, Jehovah forcem iumi for obeyim olketa wise advaes blo hem?

¹³ Jehovah mek sure evriwan savve kasem wisdom blo hem, bat hem no forcem for eniwan. Nomata olsem, hem storyim wat hem happen lo pipol wea no lisin lo wisdom blo hem. (Provebs 1:29-32) Olketa wea disaed for no obeyim Jehovah bae “kaikaim frut blong ravis wei” blo olketa. Olketa bae kasem trabol, safa bikos lo wanem olketa chus for duim, and gogo God bae finisim olketa. Bat olketa wea obeyim olketa wise advaes blo Jehovah kasem gud samting. Bible sei: ‘Olketa wea lisin long mi, bae olketa stap gud olowe. Ya, bae olketa no fraetem enisamting.’​—Provebs 1:33.

TRU WISDOM HELPEM IUMI

14-15. Wat nao iumi lanem from Provebs 4:23?

¹⁴ Taem iumi followim wisdom blo God, bae iumi evritaem kasem gud samting. Olsem iumi storyim finis, Jehovah mek sure evriwan savve kasem wisdom blo hem. For example, insaed Bible buk Proverbs, Jehovah givim staka wise advaes wea savve evritaem helpem iumi. Distaem bae iumi storyim fofala example lo olketa wise advaes hia.

¹⁵ Protectim tokpiksa heart blo iu. Bible sei: “Kontrolem [or “protectim,” NWT] . . . haat blong yu, laef blong yu hemi kamaot long hem.” (Provebs 4:23) Ting abaotem hao iumi savve protectim really heart blo iumi. Iumi need for kaikaim healthy kaikai, duim exercise, and no duim olketa samting wea savve spoelem health blo iumi. Lo sem wei, iumi need for duim samting tu for protectim tokpiksa heart blo iumi. Iumi need for readim Bible evriday. Iumi prepare for and attendim olketa Christian meeting, and iumi tek part lo olketa. Evritaem busy for duim ministry. And no duim olketa samting wea bae spoelem tingting blo iumi olsem olketa nogud entertainment and for associate witim nogud pipol.

16. Hao nao advaes lo Provebs 23:4, 5 helpem iumi?

¹⁶ Satisfae witim wanem iu garem. Bible talem disfala advaes: “Nogud yu hadwaka tumas fo kamap risman. . . . Lukluk long risis blong yu, an seknomoa hemi finis, bae hemi flae go olsem bed.” (Provebs 23:4, 5) Hem isi tumas for pipol lusim riches or olketa material samting. Bat staka wea rich and wea poor wari tumas abaotem selen. Gogo, olketa savve duim olketa samting wea spoelem nem, famili, frens, and health blo olketa. (Provebs 28:20; 1 Tim. 6:9, 10) Bat wisdom helpem iumi for garem balance tingting abaotem selen. And datwan bae helpem iumi for no greedy, bat satisfae and hapi nomoa witim wanem iumi garem.​—Eklesiastes 7:12.

17. Olsem Proverbs 12:18, NWT talem, hao nao iumi savve garem “tongue blo olketa man wea wise”?

¹⁷ Tingting gud bifor iu toktok. If iumi no careful, toktok blo iumi savve mekem narawan feel nogud. Bible sei: “Toktok blo man wea no tingting gud firstaem hem olsem sword wea katem man, bat tongue blo olketa man wea wise savve healim man.” (Prov. 12:18, NWT) Iumi bae stap gud witim olketa narawan if iumi no gossip abaotem olketa. (Provebs 20:19) Sapos iumi laekem toktok blo iumi for helpem pipol and no mekem olketa feel nogud, iumi shud evritaem studyim Bible and ting raonem wanem iumi readim. (Luke 6:45) Taem iumi duim datwan, Bible sei bae iumi talem olketa “waes toktok” wea savve strongim olketa narawan.​—Provebs 18:4.

18. Hao nao advaes lo Provebs 24:6 savve helpem iumi for duim gud ministry?

¹⁸ Followim direction. Bible givim disfala gud advaes: “Yu wande mekem woa, planem gudfala fastaem. Yu wande winim woa, lisin long plande advaes.” (Provebs 24:6) Tingim hao taem iumi followim disfala principle datwan savve helpem iumi for kamap gud lo preaching and teaching waka blo iumi. Iumi laek for followim direction wea iumi kasem lo hao for duim ministry, and no duim wanem iumiseleva nomoa laekem. Iumi kasem olketa gudfala idea lo olketa Christian meeting from olketa tok and olketa presentation. And tu, organization blo Jehovah provaedem staka gud tul for iumi iusim, olsem olketa pablikeson and video for helpem pipol for minim Bible. Waswe, iu lane for iusim gud olketa tul hia?

19. Wat nao tingting blo iu abaotem wisdom wea Jehovah givim? (Provebs 3:13-18)

¹⁹ Readim Provebs 3:13-18. Iumi barava hapi for kasem olketa wise advaes wea stap lo Bible! Iumi barava needim datwan for mekem iumi hapi. Lo disfala article, iumi storyim fofala example nomoa lo olketa wise advaes wea stap lo buk blo Provebs. Bat full Bible garem wisdom from Jehovah. Iumi laek followim datfala tru wisdom lo evri samting iumi duim. Staka pipol les lo wisdom blo God, bat iu savve barava sure taem iu followim wisdom blo God “bae yu hapi.”