Gohed Strongim Hope blo Iumi

1. Wanem hope nao Jehovah givim lo iumi?

JEHOVAH givim iumi nambawan hope for laef olowe. Samfala hope for laef olowe lo heven and garem body wea no savve dae. (1 Cor. 15:50, 53) Bat staka garem hope for laef olowe lo earth. Olketa bae healthy and hapi tumas. (Rev. 21:3, 4) Nomata iumi luk forward for laef olowe lo heven or lo earth, datfala hope hem spesol lo iumi.

2. Why nao iumi sure hope blo iumi bae kamap tru?

² Taem Bible iusim datfala word “hope,” hem savve minim iumi “expectim olketa gud samting for happen.” Iumi sure hope blo iumi for future bae kamap tru bikos Jehovah nao promisim datwan. (Rome 15:13) Iumi savve lo olketa promis blo hem, and iumi savve wat hem promisim hem evritaem kamap tru. (Nambas 23:19) Iumi sure Jehovah laek for duim wanem hem promisim and hem garem paoa for duim datwan. So hope blo iumi hem samting wea iumi sure lo hem and hem tru.

3. Wat nao bae iumi storyim lo disfala article? (Sams 27:14)

³ Dadi blo iumi lo heven lovem iumi, and hem laekem iumi for trustim hem. (Readim Sams 27:14.) Taem iumi trustim Jehovah and sure lo hope wea iumi garem, iumi savve deal witim olketa hard taem and bae iumi no fraet and bae gohed hapi nomata wanem hem happen. Lo disfala article, bae iumi storyim hao hope wea iumi garem for future savve protectim iumi. Firstaem, bae iumi storyim hao hope hem olsem anka and helmet. Then, iumi bae storyim hao for iumi savve keepim hope blo iumi strong.

HOPE HEM OLSEM ANKA

4. Lo wanem wei nao hope hem olsem anka? (Hebrew 6:19)

⁴ Lo leta blo aposol Paul for olketa Hebrew Christian, hem storyim hao hope hem olsem anka. (Readim Hebrew 6:19.) Staka taem Paul travel lo sea, so hem savve hao olketa anka savve helpem ship for no drift. Wanfala taem hem go lo wanfala ship and olketa meetim wanfala strong wind. Lo datfala taem, hem lukim olketa crew torowem olketa anka lo sea for holem datfala ship for wind no tekem go lo reef. (Acts 27:29, 39-41) Olsem anka mekem ship stedy, hope blo iumi mekem iumi for no drift from Jehovah taem iumi feisim olketa hard taem wea olsem strong wind. Hope savve helpem iumi for no wari tumas taem iumi feisim olketa problem bikos iumi savve evri samting bae kamap gud moa. Tingim, Jesus sei bae iumi kasem persecution. (John 15:20) Dastawe hem gud for ting raonem olketa promis blo Jehovah for future mekem iumi no laek givap.

5. Nomata Jesus savve bae hem dae, hao nao hope strongim hem?

⁵ Tingim hao hope helpem Jesus for gohed faithful nomata hem mas safa and dae. Lo Pentecost 33 C.E., aposol Peter quotem wanfala profesi from buk blo Psalms wea storyim hope blo Jesus. Hem sei: “Mi garem hope bikos iu bae no leavim mi long grev, and iu bae no letem body bilong wakaman bilong iu wea faithful for rotten. . . . From iu hapi long mi, datwan bae mekem mi hapi tumas.” (Acts 2:25-28; Ps. 16:8-11, NWT) Nomata Jesus savve bae hem dae, hem garem strongfala hope hao God bae resurrectim hem, and hem luk forward for stap moa witim Dadi blo hem lo heven.—Heb. 12:2, 3.

6. Wat nao wanfala brata talem abaotem hope?

⁶ Hope blo iumi hem helpem staka brata and sista for no givap. Tingim example blo Leonard Chinn, wanfala faithful brata wea stap lo England. Lo taem blo World War I, gavman putim hem lo prison bikos hem no joinim army. For tufala month hem stap seleva lo wanfala cell, then bihaen olketa forcem hem for duim samfala waka wea hard tumas. Hem sei: “Wanem mi experiencem mekem mi luksavve hao hope blo iumi savve helpem iumi for no givap. Iumi garem example blo Jesus, olketa aposol, and olketa profet, and iumi garem olketa promis wea stap lo Bible. Evri samting hia givim iumi hope for future, and strongim iumi for no givap.” Hope hem olsem anka for Leonard, and for iumi tu.

7. Hao nao olketa hard taem savve strongim hope blo iumi? (Rome 5:3-5; James 1:12)

⁷ Taem iumi no givap nomata iumi kasem hard taem, and iumi luksavve hao Jehovah helpem and hapi lo iumi, datwan strongim hope blo iumi. (Readim Rome 5:3-5; James 1:12.) So distaem hope blo iumi hem strong winim taem iumi start for acceptim truth. Satan laekem iumi for givap taem iumi kasem olketa hard taem, bat Jehovah bae helpem iumi for no givap.

HOPE HEM OLSEM HELMET

8. Hao nao hope hem olsem helmet? (1 Thessalonica 5:8)

⁸ Bible talem tu hao hope hem olsem helmet. (Readim 1 Thessalonica 5:8.) Soldia werem helmet for protectim hed blo hem from eni samting wea olketa enemy iusim for spoelem hem. From iumi insaed wanfala spiritual faet, iumi need for protectim mind blo iumi from olketa nogud samting wea Satan iusim. Hem iusim staka samting and olketa idea for spoelem tingting blo iumi. Olsem helmet protectim hed blo soldia, hope blo iumi hem protectim tingting blo iumi for gohed faithful lo Jehovah.

9. Wat nao happen lo olketa wea no garem hope?

⁹ Hope blo iumi for laef olowe savve helpem iumi for mekem olketa wise disison. If hope blo iumi hem no strong and iumi start for tingim nomoa wat iumiseleva laekem, maet bae iumi forgetim hope blo iumi. For example, tingim samfala Christian lo Corinth bifor. Olketa no garem faith lo disfala important promis blo God, wea hem nao resurrection hope. (1 Cor. 15:12) Paul talem hao olketa wea no garem hope for future duim nomoa wat olketa seleva laekem. (1 Cor. 15:32) Distaem staka wea no garem hope lo olketa promis blo God duim nomoa wanem hem mekem olketa hapi. Bat iumi no olsem olketa, iumi trustim olketa promis blo God for future. Hope blo iumi hem olsem helmet bikos hem protectim mind blo iumi and helpem iumi for no tingim iumiseleva, wea datwan savve spoelem frenship blo iumi witim Jehovah.​—1 Cor. 15:33, 34.

10. Hao nao hope blo iumi savve protectim iumi from olketa tingting wea no tru?

¹⁰ Hope blo iumi savve protectim iumi tu for no tingse hard tumas for iumi mekem Jehovah hapi. For example, samfala maet ting: ‘Mi no fit for followim olketa standard blo God. Hard tumas for mi kasem laef olowe. Bae God no acceptim mi.’ Hem nao wanem Eliphaz talem lo Job. Eliphaz sei: “Waswe, eni man hemi save stret fogud?” Then hem sei olsem abaotem God: “Nomata olketa [“holy wan,” NWT], God hemi no trastem olketa nomoa.” (Job 15:14, 15) Datwan hem no tru! Tingim, Satan nao laekem iu for tingse iu iusles nomoa. Hem savve if iu garem tingting olsem, hope blo iu bae hem no strong. So rejectim olketa laea blo Satan and trustim olketa promis blo Jehovah. Hem laekem iu for kasem laef olowe and hem bae helpem iu for kasem datwan.​—1 Tim. 2:3, 4.

GOHED STRONGIM HOPE BLO IUMI

11. Why nao iumi need patient taem iumi weitim olketa promis God for kamap tru?

¹¹ Samfala taem maet iumi start for lus hope. Maet iumi no patient nao for weit lo God. Bat, bikos Jehovah stap for olowe, maet wat iumi tingse hem longtaem lo iumi, hem short taem nomoa lo Jehovah. (2 Pet. 3:8, 9) Hem bae duim wat hem promisim lo taem wea hem disaedem wea barava fitim, bat no lo taem wea maet iumi expectim. Wat nao savve helpem iumi for no lus hope taem iumi patient for weit lo God for mekem olketa promis blo hem kamap tru?—Jas. 5:7, 8.

12. Olsem Hebrew 11:1, 6 storyim, hao nao faith hem join witim hope?

¹² For strongim hope blo iumi, iumi need for gohed fren gud witim God, bikos hem nao bae mekem hope blo iumi kamap tru. Bible sei for iumi garem hope, iumi mas garem faith hao Jehovah stap and biliv hao hem bae “givim gud samting long olketa wea barava lukaotem hem.” (Readim Hebrew 11:1, 6.) Sapos iumi bilivim Jehovah stap, iumi bae barava sure hem bae mekem olketa promis blo hem kamap tru. Bae iumi storyim samfala samting wea iumi savve duim for strongim frenship blo iumi witim Jehovah, and datwan savve strongim hope blo iumi.

13. Hao nao iumi savve fren gud witim God?

¹³ Prea lo Jehovah, and readim Bible. Iumi savve fren gud witim Jehovah nomata iumi no lukim hem. Iumi savve story lo hem lo prea, and trustim hao hem lisin lo iumi. (Jeremaea 29:11, 12) Iumi herem toktok blo God taem iumi readim Bible and ting raonem. Taem iumi read abaotem hao Jehovah kea for olketa wea faithful lo hem bifor, datwan bae strongim hope blo iumi. Bible sei: “Evri samting wea olketa raetem bifor hem for teachim iumi. Hem givim iumi hope bikos olketa Holy Raeting hia helpem iumi for no givap and comfortim iumi.”​—Rome 15:4.

14. Why nao hem gud for ting raonem wanem Jehovah duim for olketa narawan?

¹⁴ Ting raonem hao Jehovah evritaem duim wanem hem promisim. Tingim wanem God duim for Abraham and Sarah. Tufala barava olo and no fit for garem pikinini. Nomata olsem, God promis hao tufala bae garem pikinini. (Gen. 18:10, NWT) Hao nao datwan helpem Abraham? Bible sei: “Abraham garem faith and barava bilivim hem bae kamap dadi bilong pipol long plande kantri.” (Rome 4:18) Nomata hem no savve hao nao datfala promis blo God bae kamap tru, hem trustim God bae duim wanem Hem promisim. Abraham no lus hope. (Rome 4:19-21) Olketa story olsem savve helpem iumi for trustim olketa promis blo Jehovah, nomata maet iumi tingse hem hard for happen.

15. Why nao hem gud for ting raonem olketa samting wea God duim for iu?

¹⁵ Ting raonem olketa samting wea Jehovah duim for iu. Ting raonem olketa gud samting wea iuseleva kasem finis from olketa promis lo Bible wea iu lukim hem kamap tru. For example, Jesus promis hao Dadi blo hem bae provaedem olketa samting wea iumi needim. (Matt. 6:32, 33) And tu, Jesus sei hao Jehovah bae givim holy spirit lo iu sapos iu askem hem. (Luke 11:13) Jehovah duim olketa samting hia wea hem promisim. Iuseleva savve ting raonem tu olketa nara samting wea hem duim finis for iu. For example, hem promis for comfortim iu, forgivim iu, and provaedem spiritual kaikai for iu. (Matt. 6:14; 24:45; 2 Cor. 1:3) Taem iu ting raonem olketa samting wea Jehovah duim finis for iu, datwan bae strongim hope blo iu lo olketa samting wea hem bae duim for iu lo future.

HAPI LO HOPE BLO IUMI

16. Why nao hope hem wanfala spesol present?

¹⁶ Hope for laef olowe hem wanfala spesol present from God. Iumi luk forward for wanfala nambawan future, and iumi sure bae God mekem datwan for happen. Hope blo iumi hem olsem anka wea helpem iumi for stedy mekem iumi savve deal witim olketa hard taem, persecution, and nomata iumi feisim dae. Hope blo iumi hem olsem helmet wea protectim tingting blo iumi mekem iumi savve rejectim olketa nogud samting and duim olketa gud samting. Hope blo iumi helpem iumi for fren gud witim God and mekem iumi luksavve lo bigfala love wea hem garem for iumi tu. Iumi kasem gud samting taem iumi gohed for strongim hope blo iumi.

17. Why nao hope blo iumi savve mekem iumi for hapi?

¹⁷ Lo leta blo Paul for olketa Christian lo Rome, hem encouragem olketa for ‘hapi long hope wea olketa garem.’ (Rome 12:12) Masbi Paul hapi bikos hem sure sapos hem gohed faithful, hem bae kasem laef olowe lo heven. Iumi tu savve hapi lo hope blo iumi bikos iumi barava sure hao Jehovah evritaem duim wanem hem promisim. Olsem wanfala psalm sei, ‘man wea [“hope,” NWT] long Jehovah bae hapi, bikos Jehovah gohed olowe fo kipim olketa promis blong hem.’​—Sams 146:5, 6.