Hope Long Jehovah, and No Fraet

“Hope long Jehovah; no fraet and mekem heart bilong iu hem strong. Tru nao, hope long Jehovah.”—PSALM 27:14.

1. Why nao hope hem barava important, and wanem nao samfala difren mining bilong datwan insaed long Bible?

TRUFALA hope hem olsem wanfala braet laet. Hem helpem iumi for no tingting olowe long olketa hard samting wea iumi kasem distaem, bat for feisim olketa gudfala samting wea bae kamap long future witim fasin for no fraet and hapi. Jehovah nomoa savve givim iumi trufala hope, and hem iusim Bible for duim datwan. (2 Timothy 3:​16) Tru nao, datfala word “hope” hem kamap winim 160 taem insaed Bible, and hem minim wei for luk forward long gudfala samting and for biliv strong iu bae kasem datwan, and hem savve minim tu, samting wea iu luk forward long hem.a Kaen hope olsem hem moabeta winim wei wea man hope krangge nomoa for samting wea hem laek garem bat bae hard for hem kasem.

2. Hope hem affectim laef bilong Jesus long wanem wei?

² Taem Jesus kasem olketa test and hard samting, hem no tingim datwan tumas bat hem hope long Jehovah. “From datfala hapi wea stap front long hem, hem safa long wanfala post wea olketa nilam hem long hem, hem no wari for kasem shame, and hem sidaon long raet saed long throne bilong God.” (Hebrews 12:2) Jesus evritaem obeyim God, from hem barava ting strong long chance wea hem garem for showimaot hao Jehovah nomoa fit for haefala ruler bilong universe, and for mekhae long wei wea nem bilong God hem holy. Hem duim olsem nomata hem mas safa long bigfala wei.

3. Wanem nao mekem hope hem important long laef bilong olketa servant bilong God?

³ King David story abaotem wei wea hope and fasin for no fraet hem join tugeta taem hem sei: “Hope long Jehovah; no fraet and mekem heart bilong iu hem strong. Tru nao, hope long Jehovah.” (Psalm 27:14) Sapos iumi laekem heart bilong iumi for strong, iumi mas no letem hope bilong iumi for kamap samting wea no important long iumi bat for evritaem rememberim datfala hope and tinghae long hem. Sapos iumi duim olsem, bae datwan helpem iumi followim example bilong Jesus for no fraet, and strong for duim disfala waka wea hem komandim olketa disaepol bilong hem for duim. (Matthew 24:14; 28:19, 20) Tru nao, Bible talem hao hope hem wanfala barava important fasin wea olketa servant bilong God showimaot long bigfala wei, witim faith and love tu.​—1 Corinthians 13:13.

Waswe, Iu “Garem Strongfala Hope”?

4. Olketa anointed Christian and olketa “nara sheep” barava luk forward long wanem?

⁴ Pipol bilong God luk forward for nambawan future. Olketa anointed Christian luk forward for serve witim Christ long heven, and olketa “nara sheep” hope for “kamap free from wei for slave long sin and kasem datfala nambawan freedom olsem olketa pikinini bilong God” long earth. (John 10:16; Romans 8:​19-​21; Philippians 3:​20) Insaed datfala “nambawan freedom” hem wei for kamap free from sin and no kasem olketa barava nogud samting wea kamaot from datwan. Tru nao, Jehovah, wea givim “evri gudfala and perfect present” bae no savve givim present wea nogud, bat hem givim nomoa best wan long olketa loyal servant bilong hem.​—James 1:​17; Isaiah 25:8.

5. Hao nao iumi savve “garem strongfala hope”?

⁵ Hao important nao shud Christian hope long laef bilong iumi? Long Romans 15:13, hem sei: “Mi prea long God wea givim hope for barava mekem iufala hapi and garem peace from iufala biliv, mekem iufala garem strongfala hope from paoa bilong holy spirit.” Tru nao, hope hem no olsem wanfala kandol wea laet smol long dark ples, bat hem olsem braet laet bilong sun long morning. Disfala hope wea braet tumas hem mekem man garem peace, hem hapi, laef bilong hem garem mining, and hem no fraet. Lukim hao taem iumi bilivim samting wea Word bilong God talem and kasem holy spirit bilong hem, iumi “garem strongfala hope.” Romans 15:4 hem sei: “Evri samting olketa raetem bifor hem for teachim iumi, mekem wei wea iumi stand strong, and comfort wea iumi kasem from olketa Scripture hem savve givim iumi hope.” Dastawe hem gud for askem iuseleva olsem: ‘Waswe, mi gohed for mekem hope bilong mi strong long wei for kamap gudfala student bilong Bible, and readim evriday? Waswe, mi prea evritaem for spirit bilong God?’​—Luke 11:13.

6. For keepim faith bilong iumi strong, wanem nao iumi mas keakea long hem?

⁶ Jesus, wea hem Man wea showimaot nambawan example for iumi, hem barava kasem strong from Word bilong God. Wei for lukluk gud long example bilong hem bae mekem ‘soul bilong iumi no kamap taed and wikdaon.’ (Hebrews 12:3) Sapos iumi start for no tingting strong evritaem long hope wea God givim, or sapos olketa samting wea world mekhae long hem or olketa material samting pullim tingting bilong iumi, datwan savve mekem iumi kamap taed long spiritual wei. Gogo, diswan bae mekem iumi lusim strong and fasin for no fraet wea iumi needim for gohed duim stretfala samting. Sapos iumi garem kaen tingting olsem, maet gogo, faith bilong iumi hem olsem wanfala ship wea bangam reef and pisis nao. (1 Timothy 1:​19) Long narasaed, trufala hope hem strongim faith bilong iumi.

Barava Needim Faith for Garem Hope

7. Why nao hope hem barava important for mekem man garem faith?

⁷ Bible hem sei: “Faith hem wei wea man sure bae hem kasem samting wea hem hope for hem, and hem kliafala pruv bilong really samting nomata hem no lukim yet.” (Hebrews 11:1) So, hope hem no samting wea join witim faith nomoa; hem wanfala barava important part bilong faith. Tingim Abraham. Taem Jehovah promis for givim wanfala pikinini long hem and waef bilong hem Sarah, tufala olo tumas nao, and hem luk olsem datwan bae hard for happen. (Genesis 17:​15-​17) Wanem nao Abraham duim? “Nomata hem luk olsem no eni hope stap, hem garem hope wea mekem hem garem faith hao hem savve kamap dadi bilong plande nation.” (Romans 4:18) Tru nao, hope wea God givim long Abraham mekem hem garem barava strongfala faith hao hem bae garem pikinini. Samting wea kamaot from diswan nao hem wei wea faith bilong hem strongim hope bilong hem. Tru nao, diswan mekem Abraham and Sarah no fraet for lusim hom and olketa relative and stap insaed olketa tent long nara kantri go kasem taem tufala dae!

8. Hao nao fasin for stand strong hem strongim hope bilong iumi?

⁸ Abraham mekem hope bilong hem strong taem hem obeyim Jehovah evribit, nomata long olketa taem wea hem hard tumas for duim datwan. (Genesis 22:​2, 12) Olsem tu, taem iumi obey and gohed strong for duim service bilong Jehovah, iumi savve sure iumi bae kasem reward. Paul hem sei: “Fasin for no givap mekem wei for God acceptim iumi; wei for God acceptim iumi lead go long hope, and datfala hope hem no savve fail.” (Romans 5:4, 5) Dastawe Paul hem sei tu: “Mifala laekem evriwan long iufala for showimaot semkaen fasin for waka hard mekem iufala savve garem full trust long datfala hope go kasem end.” (Hebrews 6:11) Kaen wei for trust olsem wea kamaot from wei for fren witim Jehovah savve helpem iumi for no fraet, and hapi tu, taem iumi feisim eni hard samting wea kamap.

“Hapi Long Datfala Hope”

9. Wanem nao iumi savve duim evritaem wea bae helpem iumi for “hapi long datfala hope”?

⁹ Hope wea God givim long iumi hem winim eni samting wea iumi savve kasem from world. Psalm 37:34 hem sei: “Hope long Jehovah and keepim wei bilong hem, and hem bae givim earth long iu olsem blessing. Taem wicked pipol finis evribit, iu bae lukim.” Tru nao, iumi garem staka reason for “hapi long datfala hope.” (Romans 12:⁠12) Bat, for duim datwan, iumi mas tingim hope bilong iumi evritaem. Waswe, iu evritaem ting raonem datfala hope wea God givim long iu? Waswe, iu savve ting raonem hao wanday iu bae stap long Paradaes, bae iu healthy fogud, no wari, stap witim pipol wea iu lovem, and duim waka wea mekem iu barava satisfae? Waswe, iu ting raonem olketa piksa abaotem Paradaes wea insaed olketa pablikeson bilong iumi? Diskaen wei for ting raonem samting hem olsem wanfala man wea klinim eyeglass bilong hem mekem hem savve lukim klia wanfala barava naes ples. Sapos hem no duim datwan from eyeglass hem dirty, bae gogo, hem no lukluk klia nao long datfala naes ples. Then maet olketa narafala samting savve pullim interest bilong hem. Bae hem nogud sapos datwan hem happen!

10. Hao nao wei wea iumi luk forward long reward hem showimaot iumi fren gud witim Jehovah?

¹⁰ Hem tru, main reason iumi servem Jehovah hem bikos iumi lovem hem. (Mark 12:30) Nomata olsem, iumi shud barava luk forward long datfala reward. Tru nao, Jehovah laekem iumi for duim datwan! Hebrews 11:6 hem sei: “Sapos man no garem faith hem hard nao for mekem [God] hapi, bikos man wea kam long God mas bilivim hao hem stap and hem kamap datwan for givim reward long olketa wea barava lukaotem hem.” Why nao Jehovah laekem iumi for ting long hem olsem Man for givim reward? Bikos taem iumi duim olsem, iumi showimaot iumi savve gud long Dadi bilong iumi long heven. Hem barava kaen tumas and lovem olketa pikinini bilong hem. Tingim hao sapos iumi no garem “wanfala future and wanfala hope,” bae iumi no hapi and bae hem isi for feel wikdaon.​—Jeremiah 29:11.

11. Hao nao hope wea kam from God hem helpem Moses for disaedem olketa samting long wisefala wei?

¹¹ Wei wea Moses gohed for tingim evritaem hope wea hem kasem from God, hem nambawan example for iumi. From Moses growap olsem “son bilong dota bilong Pharaoh,” hem garem paoa, hae position, and hem savve mekius long olketa richfala samting long Egypt. Waswe, hem aftarem olketa samting hia or hem servem Jehovah? Moses showimaot fasin for no fraet taem hem chus for servem Jehovah. Why nao olsem? From hem “barava luk forward long reward wea hem bae kasem.” (Hebrews 11:24-​26) Tru tumas, Moses hem no ting nating long hope wea Jehovah givim long hem.

12. Why nao Christian hope hem olsem wanfala helmet?

¹² Aposol Paul talem hao hope hem olsem wanfala helmet. Tokpiksa helmet bilong iumi hem protectim tingting bilong iumi, wea mekem iumi fit for disaedem olketa samting long wisefala wei, markem olketa samting wea moa important, and gohed for faithful. (1 Thessalonians 5:8) Waswe, iu evritaem werem tokpiksa helmet bilong iu? Sapos olsem, iu olsem Moses and Paul wea hope, “no long riches wea bae finis, bat long God, wea givim iumi evri samting for mekem iumi hapi.” Tru nao, for no followim samting wea pipol long world duim, wea minim iumi rejectim wei for aftarem olketa samting for iumiseleva, iumi mas garem fasin for no fraet. Bat gudfala samting nao bae iumi kasem sapos iumi duim datwan! Tru tumas, hem no wise for tingim nomoa laef wea iumi garem distaem. Hem moabeta for tingim datfala “really laef” wea olketa wea hope long Jehovah and lovem hem bae kasem long future.​—1 Timothy 6:​17, 19.

“Mi Bae Nating Lusim Iu”

13. Wanem promis nao Jehovah talem long olketa servant bilong hem wea loyal?

¹³ Masbi pipol wea putim hope long olketa samting bilong disfala world barava fraet taem olketa lukim olketa nogud samting wea happen distaem. (Matthew 24:8) Bat olketa wea hope long Jehovah no garem kaen wei for fraet olsem. Olketa bae gohed for “stap sef and no fraetem bigfala trabol.” (Proverbs 1:​33) From olketa no hope long disfala world, olketa hapi tumas for followim disfala kaonsel bilong Paul: “Living bilong iufala mas kamap free from wei for lovem selen, taem iufala satisfae long samting wea stap distaem. From hem talem finis: ‘Mi bae nating lusim iu and bae nating forgetim iu.’”—Hebrews 13:5.

14. Why nao olketa Christian mas no warim tumas olketa material samting wea olketa needim?

¹⁴ Disfala scripture mekem iumi barava sure hao God bae lukaftarem iumi. Jesus talem iumi tu abaotem love wea God garem for iumi taem hem sei: “Gohed for aftarem kingdom and raeteous fasin bilong hem firstaem, and iufala bae kasem olketa narafala samting hia [olketa material need bilong iumi]. So, no wari abaotem next day, from next day bae garem wari bilong hemseleva.” (Matthew 6:33, 34) Jehovah savve hem no isi for iumi strong for aftarem Kingdom bilong hem and long semtaem lukaftarem physical need bilong iumi. So iumi mas trustim evribit wei wea hem fit and laek for givim wanem iumi needim.​—Matthew 6:​25-​32; 11:28-​30.

15. Hao nao olketa Christian savve garem ‘simpol eye’?

¹⁵ Taem iumi garem ‘simpol eye,’ datwan showimaot iumi depend long Jehovah. (Matthew 6:​22, 23) Man wea garem simpol eye hem honest, gudfala samting nao muvim hem for duim samting, hem no greedy, and hem no selfish for aftarem samting wea hemseleva laekem. For garem simpol eye hem no minim for garem living wea poor or iumi les for duim samting for kasem olketa physical need bilong iumi. For garem simpol eye hem minim for garem “gudfala tingting” taem wei for servem Jehovah nao hem main samting long laef bilong iumi.​—2 Timothy 1:7.

16. For garem simpol eye, why nao man needim faith and fasin for no fraet?

¹⁶ Man needim faith and fasin for no fraet for gohed garem simpol eye. Olsem example, sapos boss sei iu mas waka long taem bilong olketa Christian meeting, waswe, bae iu strong for duim samting wea God sei hem important? Sapos iumi daotem wei wea Jehovah bae fulfillim promis bilong Hem for lukaftarem olketa servant bilong Hem, then samting Satan savve duim nomoa hem for putim moa hevi long iumi and then bae iumi stop nao for attendim evri meeting. Tru tumas, sapos iumi short long faith bae iumi letem Satan nao for markem olketa samting wea important long laef bilong iumi, no Jehovah. Datwan hem barava sorre samting!​—2 Corinthians 13:⁠5.

“Hope Long Jehovah”

17. Hao nao olketa wea trustim Jehovah olketa kasem blessing nomata distaem tu?

¹⁷ Plande taem Bible showimaot hao olketa wea hope and trust long Jehovah bae kasem gud samting evritaem. (Proverbs 3:​5, 6; Jeremiah 17:7) Hem tru, samfala taem maet olketa no garem staka material samting, bat olketa ting long diswan olsem wanfala smol sakrifaes sapos olketa markem witim olketa blessing wea olketa bae kasem. So olketa showimaot olketa “hope long Jehovah” and trustim wei wea, gogo, hem bae givim olketa loyal wan bilong hem evri raeteous samting wea heart bilong olketa laekem. (Psalm 37:​4, 34) So, nomata distaem tu, olketa barava hapi. “Hope bilong raeteous pipol hem hapi samting, bat hope bilong wicked pipol bae finis.”—Proverbs 10:28.

18, 19. (a) Wanem nao Jehovah talem for helpem iumi garem fasin for no fraet? (b) Hao nao iumi mekem Jehovah gohed stap long “raet saed” bilong iumi?

¹⁸ Taem wanfala smol boy holem hand bilong dadi bilong hem and wakabaot, hem feel sef. Iumi feel olsem tu taem iumi wakabaot witim Dadi bilong iumi long heven. Jehovah hem sei long olketa Israelite: “No fraet, bikos mi stap witim iu. . . . Mi bae barava helpem iu. . . . Bikos mi, God bilong iu Jehovah, mi holem strong raet hand bilong iu, Datwan wea sei long iu, ‘No fraet. Mi nao bae helpem iu.’”—Isaiah 41:10, 13.

¹⁹ Taem iumi tingim wei wea Jehovah holem hand bilong man, datwan mekem iumi feel gud tumas! David hem sei: “Mi putim Jehovah front long mi evritaem. From hem stap long raet saed bilong mi, mi bae no seksek.” (Psalm 16:8) Long wanem wei nao iumi mekem Jehovah gohed stap long “raet saed” bilong iumi? Iumi duim olsem long tufala wei. First wei, iumi obeyim wanem Word bilong hem talem long evri part long living bilong iumi; and mek-tu wei, iumi tingting strong long nambawan reward wea Jehovah givim for iumi. Asaph, wanfala man wea raetem psalm, hem sei: “Mi stap witim iu evritaem; iu holem nao raet hand bilong mi. Iu bae leadim mi witim kaonsel bilong iu, and bihaen bae iu blessim mi.” (Psalm 73:23, 24) From iumi savve trustim Jehovah olsem, iumi no fraetem samting wea bae happen long future.

‘Taem for Sevem Iufala Klosap Nao’

20, 21. Wanem kaen future nao olketa wea hope long Jehovah bae garem?

²⁰ From end hem klosap tumas, hem barava important for iumi mekem Jehovah gohed stap long raet saed bilong iumi. Start long taem wea false religion hem distroe, wea datwan hem klosap nao, world bilong Satan bae kasem barava bigfala trabol wea winim enitaem bifor. (Matthew 24:21) Olketa man wea no garem faith bae fraet fogud. Bat, olketa servant bilong Jehovah bae nating fraet, bae olketa hapi from hope wea olketa garem! Jesus hem sei: “Taem evri samting hia start for happen, standap stret and liftimap hed bilong iufala, from taem for sevem iufala hem klosap nao.”—Luke 21:28.

²¹ So iumi mas hapi long hope wea God givim iumi and no letem olketa samting wea Satan iusim for pullim tingting bilong pipol for giamanim or testim iumi. Long semtaem, iumi mas waka hard for mekem grow faith, love, and wei for fraet long God. Sapos iumi duim datwan, bae iumi no fraet for obeyim Jehovah evritaem and againstim Devil. (James 4:​7, 8) Tru nao, “no fraet, and mekem heart bilong iufala strong, iufala evriwan wea weit long Jehovah.”—Psalm 31:24.

[Footnote]

Waswe, Iu Savve Ansa?

• Hao nao hope helpem Jesus for garem fasin for no fraet?

• Hao nao faith and hope join tugeta?

• Hao nao hope and faith mekem Christian no fraet for markem olketa samting wea moa important long living?

• Why nao olketa wea “hope long Jehovah” no fraetem future?

[Piksa long page 30]

Nomata iu young or olo, waswe, iu savve ting raonem hao wanday iu bae stap long Paradaes?