Iumi Savve Garem Peace Nomata Iumi Feisim Hard Taem

1. Taem iumi garem “peace blo God,” hao nao datwan helpem iumi? (Philippi 4:6, 7)

STAKA pipol lo world no minim disfala “peace blo God” wea iumi kasem from iumi fren gud witim Dadi blo iumi lo heven. Taem iumi garem peace blo God, iumi savve hapi. (Readim Philippi 4:6, 7.) Iumi hapi from iumi garem olketa gudfala fren wea lovem Jehovah, and from iumi fren gud witim datfala “God wea givim peace.” (1 Thess. 5:23) Taem iumi savve lo God, trustim, and obeyim hem, datfala peace blo hem savve mekem iumi for no wari tumas taem iumi feisim eni hard taem.

2. Why nao iumi sure iumi savve garem peace blo God taem iumi feisim hard taem?

² Waswe, iumi savve garem peace blo God taem iumi feisim eni hard taem olsem aotbrek blo wanfala sik, natural disaster, pipol riot againstim gavman, or persecution? Iumi savve fraet taem olketa samting olsem happen. Bat Jesus sei lo olketa follower blo hem: “Iufala mas no wari and no fraet.” (John 14:27) Gud samting nao, olketa brata and sista followim disfala advaes blo Jesus. Jehovah helpem olketa for garem peace nomata olketa feisim hard taem.

IUMI SAVVE GAREM PEACE TAEM IUMI FEISIM OUTBREAK BLO WANFALA SIK

3. Hao nao wanfala pandemic or outbreak blo wanfala sik lo community savve spoelem peace blo iumi?

³ Taem wanfala pandemic happen or outbreak blo wanfala sik kamap lo community, datwan savve changem staka samting lo laef. Tingim hao COVID-19 affectim staka pipol. Wanfala survey showimaot hao winim haf lo pipol wea olketa interviewim no savve sleep gud lo taem blo pandemic. Datwan mekem pipol for stress, depress, ova tumas for iusim alcohol, or tekem drug. And tu, domestic violence hem kamap big, and samfala maet trae for suisaed. Sapos outbreak blo wanfala sik kamap lo community blo iu, wat nao savve helpem iu for no stress tumas and for garem peace blo God?

4. Taem iumi savve lo profesi blo Jesus abaotem olketa last day, hao nao datwan helpem iumi for no wari tumas?

⁴ Jesus profesi hao lo olketa last day olketa barava nogud sik bae “kasem plande pipol.” (Luke 21:11) Hao datwan helpem iumi for no wari tumas? Bae iumi no seke taem outbreak blo wanfala sik kamap, bikos iumi luksavve olketa samting hia happen olsem Jesus talem. So bae iumi followim advaes wea Jesus talem for olketa wea stap lo olketa last day for “no fraet.”​—Matt. 24:6.

5. (a) Olsem Philippi 4:8, 9 storyim, wat nao iumi shud prea abaotem sapos outbreak blo wanfala sik kamap? (b) Why nao hem gud for lisin lo olketa audio Bible reading taem iumi stress?

⁵ Taem outbreak blo wanfala sik kamap, iumi savve wari and stress tumas. Datwan nao happen lo wanfala sista wea nem blo hem Desi.b Uncle, kasin, and doctor blo hem dae lo COVID-19. Datwan mekem hem wari nogud bae hem kasem datfala sik and pasim lo mami blo hem wea olo. Hem wari tu nogud hem lusim waka blo hem and bae hem no fit for peim rent and kaikai. From hem warim olketa samting hia hem savve wekap lo naet. Hao nao gogo Desi garem peace? Hem prea lo Jehovah for helpem hem for no wari tumas and for garem gudfala tingting. (Readim Philippi 4:8, 9.) Hem lisin lo olketa audio Bible reading, wea olsem Jehovah story lo hem. Desi sei: “Taem mi lisin lo reading, datwan mekem mi no wari tumas and mi tingim hao Jehovah kea abaotem mi.”​—Sams 94:19, SIPB.

6. Taem outbreak blo wanfala sik kamap, why nao hem gud for gohed duim personal study and attendim olketa meeting?

⁶ Taem outbreak blo wanfala sik kamap, maet iumi no savve duim evri samting wea iumi duim bifor. Nomata olsem, hem gud for gohed duim personal study and attendim olketa meeting. Iumi savve lukim lo olketa video experience blo olketa brata and sista wea gohed faithful, nomata olketa kasem semkaen hard taem, and iumi savve read abaotem tu lo olketa pablikeson blo iumi. (1 Pet. 5:9) Olketa meeting savve helpem for ting abaotem olketa gud samting from Bible. And tu, bae iumi garem chance for encouragem narawan and for olketa narawan encouragem iumi. (Rome 1:11, 12) Taem iumi ting raonem hao Jehovah helpem olketa wea worshipim hem taem olketa sik, fraet, or lonely, datwan bae strongim faith blo iumi and iumi savve trustim hao Jehovah bae helpem iumi tu.

7. Wat nao iumi savve lanem from aposol John?

⁷ Taem outbreak blo wanfala sik kamap, nomata iumi stap witim olketa brata and sista maet iumi need for duim social distancing, bat hem important for gohed story witim olketa. Maet iu feel olsem aposol John wea laekem tumas for go lukim fren blo hem Gaius. (3 John 13, 14) Bat John no savve duim datwan, so hem raetem wanfala leta lo Gaius. Sapos iumi no savve go lukim olketa brata and sista, iumi savve ringim olketa, mekem video kol, or textim olketa. Taem iumi duim datwan, bae iumi no feel lonely and bae iumi garem peace. If iumi barava warim samting, iumi savve story witim olketa elder and olketa bae hapi for encouragem iumi.​—Aesaea 32:1, 2.

IUMI SAVVE GAREM PEACE TAEM DISASTER HAPPEN

8. Taem disaster happen, wat nao samfala samting wea maet mekem iumi no garem peace?

⁸ If iumi kasem samfala nogud samting lo taem blo wanfala flood, earthquake, or fire, maet datwan savve mekem iumi wari tumas. For example, maet samwan wea iumi lovem hem dae or iumi lusim haos and evri samting blo iumi. Maet datwan savve mekem iumi sorre tumas, hopeles, or kros tu. If iumi feel olsem, datwan no minim iumi tinghae tumas lo olketa material samting or faith blo iumi no strong. Taem iumi feisim hard taem, hem normal nomoa for iumi feel olsem. (Job 1:11, SIPB) Bat nomata iumi feisim hard taem, hao nao iumi savve garem peace?

9. Wat nao Jesus talem for redyim iumi for olketa disaster?

⁹ Hem gud for tingim profesi blo Jesus. Samfala pipol tingse hard for disaster kasem olketa, bat iumi expectim staka disaster for happen lo taem blo iumi and samfala lo olketa disaster hia savve affectim iumi. Jesus sei: “Olketa bigfala earthquake” and olketa nara disaster bae happen bifor end hem kam. (Luke 21:11). Jesus profesi tu abaotem hao “plande pipol” bae “duim olketa samting wea no stret,” and iumi lukim diswan gohed happen distaem. For example, iumi lukim crime kamap big, pipol raf tumas, and olketa terrorist attak. (Matt. 24:12) Staka wea faithful lo Jehovah kasem olketa nogud samting and disaster affectim olketa. Jesus no sei if iumi kasem olketa nogud samting olsem, datwan hem bikos Jehovah no kea for iumi. (Isa. 57:1; 2 Cor. 11:25) Jehovah bae no duim mirakol for protectim iumi from olketa disaster, bat hem bae givim help wea iumi needim for no wari tumas and for garem peace.

10. If iumi prepare distaem for disaster, waswe, datwan showimaot iumi no garem faith lo Jehovah? (Provebs 22:3, SIPB)

¹⁰ Iumi bae no wari tumas taem disaster happen if iumi planim gud firstaem wanem for duim. If iumi duim olsem, waswe, datwan showim iumi no garem faith lo Jehovah? Nomoa. If iumi prepare for disaster, datwan showim iumi trustim hao Jehovah bae lukaftarem iumi, bikos Bible encouragem iumi redi for disaster wea maet happen. (Readim Provebs 22:3, SIPB.) And tu, organization blo God iusim olketa meeting, announcement, and olketa article lo olketa magasin for gohed remindim iumi for redi for taem blo disaster.c Waswe, iumi trustim Jehovah? Sapos olsem, iumi bae followim datfala advaes distaem bifor eni disaster hem happen.

11. Wat nao iumi lanem from example blo Margaret?

¹¹ Tingim experience blo wanfala sista wea nem blo hem Margaret. Police talem hem for mas lusim haos blo hem from bigfala fire hem bone lo ples wea hem stap. From staka pipol trae for ranawe lo semtaem lo car blo olketa, road full blok and evriwan stuck lo traffic. Air hem fulap lo blak smoke and Margaret no savve go aot from car blo hem. Bat Margaret hem sef bikos hem keepim wanfala map insaed basket blo hem, wea helpem hem for faendem nara road. Hem even draev followim datfala road tu bifor fire hia hem bone, wea mekem hem isi for hem followim road hia. From Margaret prepare firstaem, hem sef from datfala fire.

12. Taem iumi kasem olketa instruction for stap sef lo taem blo disaster, why nao hem gud for followim?

¹² For keepim iumi and olketa narawan sef, gavman maet askem iumi for obeyim wanfala curfew, lusim haos blo iumi, or followim olketa nara instruction. Samfala pipol no obeyim or isisi for followim olketa instruction hia bikos olketa no laek for leavim bihaen olketa material samting blo olketa. Wat nao iumi shud duim? Bible sei: “Iufala mas stap anda long evriwan wea garem paoa and iufala mas duim datwan for Lord bilong iumi. Stap anda long king wea hem garem hae position and olketa bigman bilong hem wea hem sendem.” (1 Pet. 2:13, 14) Iumi kasem tu direction from organization blo God for protectim iumi. Evritaem iumi kasem reminder for givim contact information blo iumi lo olketa elder mekem olketa savve contactim iumi taem disaster happen. Waswe, iu duim finis? Maet iumi kasem direction tu for stap lo haos or muv lo nara ples, hao for kasem relief supply, or hao for helpem olketa narawan and wat taem for duim datwan. Sapos iumi no obey, iumi bae putim laef blo iumi and laef blo olketa elder lo danger. Hem important for iumi tingim hao olketa faithful brata hia lukaftarem iumi. (Heb. 13:17) Margaret sei: “From mi obeyim direction wea kam from olketa elder and organization blo Jehovah, datwan nao sevem laef blo mi.”

13. Wat nao helpem staka brata and sista wea displace for gohed hapi and garem peace?

¹³ Staka brata and sista wea displace bikos lo disaster, war, or pipol riot againstim gavman duim best blo olketa for deal witim niu laef blo olketa and olketa duim moa samting lo waka blo Jehovah. Olsem olketa Christian lo first century wea go stap lo olketa difren ples bikos lo persecution, olketa brata and sista hia gohed “talemaot gud nius.” (Acts 8:4) Preaching waka helpem olketa for gohed tingim Kingdom and no tingim tumas hard taem wea olketa feisim. From datwan, olketa hapi and garem peace.

IUMI SAVVE GAREM PEACE TAEM IUMI KASEM PERSECUTION

14. Taem iumi kasem persecution, hao nao datwan savve spoelem peace blo iumi?

¹⁴ Taem iumi kasem persecution, staka samting savve spoelem peace blo iumi. For example, iumi hapi taem iumi free for attendim olketa meeting, duim preaching waka, and duim olketa samting wea iumi savve duim evriday and no wari sapos police bae arrestim iumi. If iumi no savve duim olketa samting hia, datwan savve mekem iumi fraet and warim wat nao maet happen lo iumi. And hem normal for feel olsem. Nomata olsem, iumi mas careful. Wanem Jesus talem showimaot persecution savve mekem iumi for lusim hem. (John 16:1, 2) So wat nao savve helpem iumi for garem peace taem iumi kasem persecution?

15. Why nao iumi shud no fraetem persecution? (John 15:20; 16:33)

¹⁵ Bible sei: “Pipol bae spoelem tu eniwan wea laek for faithful long God and followim Christ Jesus.” (2 Tim. 3:12) Bihaen gavman banim waka blo iumi lo wanfala kantri, wanfala brata lo there wea nem blo hem Andrei no savve bilivim hao evriwan wea worshipim Jehovah bae kasem persecution. Hem sei: ‘Staka Witness nao stap lo kantri. Hao nao bae gavman arrestim evriwan?’ From Andrei garem tingting olsem, datwan spoelem peace blo hem and hem savve wari tumas staka taem. Bat olketa nara brata trustim Jehovah and savve maet gavman bae arrestim olketa, and datwan mekem olketa no wari tumas olsem Andrei. So Andrei disaed for followim example blo olketa brata hia and barava trustim Jehovah. Datwan mekem hem hapi moa and garem peace nomata hem feisim staka hard samting. Diswan savve happen lo iumi tu. Jesus sei bae iumi kasem persecution, bat hem sei tu iumi savve gohed faithful.​—Readim John 15:20; 16:33.

16. Wanem direction nao iumi need for obeyim taem iumi kasem persecution?

¹⁶ Taem gavman banim waka blo iumi, maet iumi savve kasem samfala instruction from branch office and olketa elder. Diswan hem for protectim iumi, for mek sure iumi kasem spiritual kaikai, and for helpem iumi gohed duim preaching waka. Hem important for obeyim direction wea iumi kasem, nomata iumi no minim why iumi kasem datfala direction. (Jas. 3:17) And tu, iumi mas no givim eni information abaotem olketa brata and sista, or abaotem kongregeson lo olketa wea no garem raet for kasem.—Eklesiastes 3:7.

17. Olsem olketa aposol lo first century, wat nao iumi disaed strong for duim?

¹⁷ Main reason why Satan faet againstim pipol blo God hem bikos olketa “duim waka for talem pipol tru samting abaotem Jesus.” (Rev. 12:17) Iumi mas no fraetem Satan and world blo hem, bikos taem iumi preach lo pipol and teachim olketa nomata olketa narawan againstim iumi, iumi savve hapi and garem peace. Taem olketa bigman blo olketa Jew stopem olketa aposol for no preach, olketa faithful man hia obeyim God and gohed for preach. And datwan mekem olketa hapi tumas. (Acts 5:27-29, 41, 42) Bat taem gavman banim waka blo iumi, iumi mas careful taem iumi preach. (Matt. 10:16) If iumi duim best blo iumi, bae iumi garem peace bikos iumi mekem Jehovah hapi and iumi talemaot message wea savve sevem laef blo pipol.

“GOD WEA GIVIM PEACE” BAE STAP WITIM IUMI

18. Hu nao savve givim iumi tru peace?

¹⁸ Iumi savve sure hao nomata iumi feisim barava hard taem, iumi savve garem peace. Iumi needim peace blo God lo olketa taem olsem, and Jehovah nomoa savve givim iumi datfala peace. So trustim Jehovah lo taem blo aotbrek blo wanfala sik, taem iumi feisim natural disaster, or persecution. Gohed followim direction wea iumi kasem from organization blo hem. And luk forward for nambawan laef wea iumi bae kasem lo future. Taem iumi duim olsem, “God wea givim peace” bae stap witim iumi. (Phil. 4:9) Lo next article, iumi bae storyim hao iumi savve helpem olketa brata and sista wea feisim hard taem for garem peace blo God.