Helpem Olketa Narawan for Deal Witim Hard Taem

1. Hao nao Jehovah ansarem prea blo olketa brata and sista wea needim help?

TAEM samwan prea lo Jehovah for help, Jehovah savve iusim iumi for ansarem prea blo hem. Jehovah savve iusim wanfala elder, ministerial servant, pioneer, or wanfala pablisa lo kongregeson for helpem samwan. Iumi evriwan savve help tu, nomata olketa young or olketa olo, or wanfala brata or sista. Taem samwan wea lovem Jehovah prea lo hem for help, God savve iusim olketa elder and olketa faithful brata and sista for “comfortim” hem. (Col. 4:11) Hem nambawan privilege for Jehovah iusim iumi for helpem olketa brata and sista! Iumi savve helpem and comfortim olketa brata and sista lo taem blo outbreak blo wanfala sik, disaster, or persecution.

HELPEM NARAWAN LO TAEM BLO OUTBREAK BLO WANFALA SIK

2. Why nao maet hem no isi for helpem olketa narawan lo taem blo outbreak blo wanfala sik?

² Hem no isi for helpem each other taem outbreak blo wanfala sik hem kamap. For example, maet iumi laek visitim olketa frens, bat hem no sef. Maet iumi laek invaetem olketa narawan wea stragol witim selen for kam lo haos for kaikai, bat hem hard tu. Maet iumi laek for helpem olketa narawan, bat hem no isi if olketa lo famili blo iumi tu feisim hard taem. Nomata olsem, iumi laek for helpem olketa brata and sista, and Jehovah hapi taem iumi duim best blo iumi for help. (Provebs 3:27; 19:17, SIPB) Hao nao iumi savve help?

3. Wat nao iumi lanem from example blo olketa elder lo kongregeson blo Desi? (Jeremiah 23:4)

³ Wanem olketa elder savve duim. Hem gud for olketa elder savve gud lo olketa brata and sista. (Readim Jeremiah 23:4.) Desi, wea iumi storyim lo last article sei, “Olketa elder lo field service grup blo mi savve waka witim mi and olketa narawan lo ministry and olketa savve joinim mifala lo olketa hapitaem.”b Datwan mekem hem isi for olketa elder hia helpem Desi lo taem blo COVID-19 pandemic and taem samfala lo famili dae lo datfala virus.

4. Why nao hem isi for olketa elder helpem Desi, and wat nao leson for olketa elder?

⁴ Desi sei, “From mi savve gud lo olketa elder, hem isi for mi storyim feeling and wari blo mi lo olketa.” Wat nao leson for olketa elder? Hem gud for duim shepherding lo olketa brata and sista insaed field service grup blo iufala and fren gud witim olketa, bifor hard taem kamap. If outbreak lo wanfala sik kamap and hem hard for iufala go visitim olketa, iufala savve duim nara samting. Desi sei, “Olketa difren elder savve ringim and textim mi insaed lo wanfala day. Olketa scripture wea olketa sharem witim mi barava helpem mi, nomata mi savve finis lo olketa verse hia.”

5. Hao nao bae olketa elder savve lo wanem olketa brata and sista needim and for helpem olketa?

⁵ Hem gud for olketa elder faendaot lo wanem nao olketa brata and sista needim. (Provebs 20:5, SIPB) Hao, olketa garem inaf kaikai, medicine, and olketa nara samting wea olketa needim? Waswe, maet bae olketa lusim waka, or haos blo olketa from olketa no garem inaf selen? Hao, olketa needim help for requestim help from gavman? Desi kasem help from olketa brata and sista. Bat from olketa elder strongim hem lo spiritual wei and encouragem hem, datwan barava helpem hem lo hard taem wea hem feisim. Hem sei: “Olketa elder prea witim mi. Nomata mi no rememberim wat olketa talem, datwan barava strongim mi. Hem olsem Jehovah sei, ‘Iu no stap seleva.’”​—Isa. 41:10, 13.

6. Wat nao olketa lo kongregeson savve duim for helpem olketa nara brata and sista? (Lukim piksa.)

⁶ Wanem olketa narawan savve duim. Iumi expectim olketa elder for lead insaed kongregeson. Bat Jehovah laekem iumi evriwan for encouragem and helpem olketa brata and sista. (Gal. 6:10) Nomata iumi duim smol samting for helpem samwan wea sik datwan savve encouragem hem. For example, pikinini savve go witim dadi taem hem visitim eni brata wea sik. Maet wanfala young wan savve duim shopping or olketa nara samting for eni sista wea sik. Samfala lo kongregeson savve kukim kaikai for samwan wea sik and tekem go lo haos blo hem. Bat taem wanfala sik spred lo community, evriwan needim encouragement. Maet hem gud for stay lelebet longtaem bihaen meeting for story witim olketa brata and sista nomata lo Kingdom Hall or lo videoconferencing. Olketa elder tu needim encouragement. Samfala pablisa raetem card for sei thankiu lo olketa elder wea busy tumas for helpem olketa brata and sista lo taem blo outbreak blo wanfala sik. Iumi hapi tumas taem iumi “gohed for encouragem and strongim narawan”!​—1 Thess. 5:11.

HELPEM NARAWAN TAEM DISASTER HAPPEN

7. Bihaen disaster, wat nao maet samfala challenge wea olketa brata and sista feisim?

⁷ Disaster savve seknomoa spoelem laef blo pipol. Maet samfala lusim haos, evri samting wea olketa ownim, or samwan wea olketa lovem hem dae. Olketa nogud samting hia happen tu lo olketa brata and sista. Wat nao iumi savve duim for helpem olketa?

8. Wat nao olketa elder and famili hed savve duim bifor eni disaster happen?

⁸ Wanem olketa elder savve duim. Olketa elder helpem olketa brata and sista for prepare bifor eni disaster happen. Mek sure evriwan lo kongregeson savve wat for duim for stap sef and hao for contactim olketa elder. Margaret wea iumi storyim lo last article sei: “Olketa elder arrangem wanfala need part and warnim mifala hao area blo mifala no sef yet from fire. Olketa sei if gavman talem mifala for lusim haos or situation kamap worse, mifala mas kwiktaem lusim ples.” Olketa kasem datfala information lo raet taem, bikos faev week bihaen wanfala big fire bone lo ples wea olketa stap. Lo famili worship, famili hed savve storyim wanem each wan lo famili bae duim. If famili prepare firstaem, olketa bae no stress tumas taem disaster happen.

9. Wat nao olketa elder savve duim bifor and bihaen disaster happen?

⁹ Hem gud for olketa grup overseer mek sure olketa garem stretfala contact information blo evriwan lo grup blo olketa bifor eni disaster happen. Mekem list and keepim up-to-date. Then taem disaster happen, datwan bae helpem iufala for contactim each pablisa for savve wanem olketa needim. Iufala savve givim datfala information lo coordinator blo body of elders, then hem bae contactim circuit overseer. Taem olketa brata hia waka tugeta, datwan savve helpem olketa pablisa lo kongregeson. Tingim wanem circuit overseer lo circuit blo Margaret duim. Bihaen datfala fire, hem no sleep for 36 hour bikos hem busy for organizem olketa elder wea trae for contactim and helpem 450 brata and sista wea displace. (2 Cor. 11:27) From olketa organize olsem, olketa fit for helpem evriwan wea needim ples for stap.

10. Why nao hem important for olketa elder visitim olketa brata and sista? (John 21:15)

¹⁰ Hem responsibility blo olketa elder for strongim spiritual saed blo olketa brata and sista and for encouragem olketa. (1 Pet. 5:2) Taem disaster happen, first samting wea olketa elder shud duim hem for mek sure olketa brata and sista stap sef, garem kaikai, kaleko, and ples for stap. Bat bihaen datwan, olketa pablisa hia maet bae olketa still needim encouragement. (Readim John 21:15.) Harold wanfala Branch Komiti member wea visitim staka brata and sista wea disaster affectim olketa, hem sei: “Hem savve tek taem for laef hem kam bak normal. Nomata maet laef kam bak normal, olketa no savve forgetim samwan wea olketa lovem wea dae, eni spesol samting wea olketa inheritim wea disaster spoelem, or eni danger samting wea olketa feisim. Staka taem datwan savve mekem olketa sorre tumas. Diswan hem normal feeling nomoa, and hem no minim olketa no garem strongfala faith.”

11. Bihaen disaster, wat nao olketa brata and sista gohed needim?

¹¹ Hem gud for olketa elder followim disfala kaonsel: “Taem pipol krae, iufala mas krae witim olketa.” (Rome 12:15) Olketa elder need for remindim olketa brata and sista wea kasem disaster hao Jehovah and olketa nara brata and sista lovem olketa. Olketa bae laek for helpem olketa famili for gohed duim personal study, prea, attendim meeting, and preaching waka. Olketa savve encouragem tu parents for helpem pikinini for tingim samting wea disaster no savve spoelem. Parents savve explainim lo pikinini hao Jehovah bae evritaem fren witim olketa, Jehovah no savve lusim olketa, and olketa part lo wanfala big famili blo olketa brata and sista evriwea lo world wea stanbae for helpem olketa.​—1 Pet. 2:17.

12. Wat nao iumi savve duim for help lo disaster relief waka? (Lukim piksa.)

¹² Wanem olketa narawan savve duim. If disaster happen klosap, askem olketa elder wat nao iumi savve duim for help. Maet iumi savve provaedem ples for stap for olketa wea displace or olketa construction volunteer. Or maet iumi savve help for distributim kaikai and olketa nara samting wea olketa pablisa needim. If disaster happen lo nara kantri, hao nao iumi savve help? Iumi savve prea for olketa. (2 Cor. 1:8-11) Maet iumi savve sapotim relief waka taem iumi givim donation for waka raonem world. (2 Cor. 8:2-5) If iu fit for go lo ples wea disaster happen for help, askem olketa elder for wat nao iu savve duim. If iu kasem invitation for go, bae iu need for kasem training mekem iu fit for helpem olketa brata and sista.

HELPEM OLKETA BRATA AND SISTA LO TAEM BLO PERSECUTION

13. Lo olketa kantri wea gavman banim waka blo iumi, wat nao olketa challenge wea olketa brata and sista feisim?

¹³ Lo olketa kantri wea gavman banim waka blo iumi, persecution savve mekem laef blo olketa brata and sista hard tumas. Olketa savve feisim tu problem saed lo selen, sik, or samwan wea olketa lovem hem dae. Bat from waka blo iumi hem ban, olketa elder maet no fit for visitim olketa pablisa wea needim encouragement. Datwan nao happen lo Andrei wea iumi storyim lo last article. Wanfala sista lo field service grup blo hem stragol saed lo selen. From hem accident lo wanfala car, hem needim tu-thri operation and no fit for waka tu. Nomata waka blo iumi hem ban and COVID-19 pandemic hem gohed, olketa elder duim wanem olketa fit for duim for help and Jehovah tu lukim situation blo sista hia and iusim olketa brata for help.

14. Hao nao olketa elder savve showimaot example for depend lo Jehovah?

¹⁴ Wanem olketa elder savve duim. Andrei prea and duim wanem hem fit for duim. Hao nao Jehovah ansarem prea blo hem? Jehovah iusim olketa lo kongregeson wea fit for help for helpem datfala sista. Samfala tekem hem for olketa medical appointment, and olketa narawan help saed lo selen. From olketa pablisa hia duim best blo olketa for help, Jehovah blessim datwan and sista kasem wanem hem needim. (Heb. 13:16) Olketa elder, taem waka blo iumi hem ban, askem narawan for help. (Jer. 36:5, 6) Hem barava important for depend lo Jehovah, bikos hem bae helpem iufala for lukaftarem olketa brata and sista.

15. Taem iumi kasem persecution, wat nao iumi savve duim for gohed wan mind?

¹⁵ Wanem olketa narawan savve duim. Taem gavman banim waka blo iumi, maet iumi need for meet lo olketa smol grup. So hem barava important for stap gud witim evri brata and sista. Iumi faet againstim Satan, no faetem each other. Hem gud for forgivim each other and kwiktaem stretem problem witim narawan. (Provebs 19:11, SIPB; Eph. 4:26) Stanbae for helpem each other. (Titus 3:14) From olketa narawan helpem datfala sista wea iumi storyim lo last paragraf, datwan mekem datfala field service grup for fren gud tugeta olsem wanfala famili.​—Sams 133:1, SIPB.

16. Olsem Colossae 4:3, 18 storyim, hao nao iumi savve helpem olketa brata and sista wea kasem persecution?

¹⁶ Staka thousand brata and sista gohed faithful for worshipim Jehovah nomata olketa stap lo kantri wea gavman banim waka blo iumi. Olketa putim samfala lo olketa lo prison. Iumi savve prea for olketa hia, famili blo olketa, and olketa brata and sista wea putim laef blo olketa lo danger for sapotim olketa lo spiritual wei, provaedem wanem olketa needim, and defendim olketa lo kot.c (Readim Colossae 4:3, 18.) Tingim, olketa prea blo iumi savve barava helpem olketa!​—2 Thess. 3:1, 2; 1 Tim. 2:1, 2.

17. Wat nao iumi savve duim distaem for redi for persecution?

¹⁷ Iumi and famili blo iumi savve redi distaem for persecution. (Acts 14:22) No imaginim olketa nogud samting wea maet happen, bat strongim frenship blo iumi and olketa pikinini blo iumi witim Jehovah. If iumi wari samfala taem, prea lo Jehovah from heart. (Sams 62:7, 8, SIPB) Hem gud for famili discussim tugeta olketa reason why iumi savve trustim Jehovah.d If iumi redi for persecution olsem hao iumi redi for eni disaster, datwan bae helpem olketa pikinini for no fraet and wari tumas, bikos iumi teachim olketa for trustim Jehovah.

18. Wat nao bae iumi enjoyim lo future?

¹⁸ Peace blo God hem mekem iumi feel sef. (Phil. 4:6, 7) From Jehovah givim iumi datfala peace, iumi no fraet and wari nomata lo taem blo outbreak blo wanfala sik, or lo taem blo disaster and persecution. Jehovah iusim olketa elder for lukaftarem iumi, and hem givim iumi privilege for helpem each other. From iumi garem peace distaem, iumi savve redi for feisim olketa barava hard taem wea bae kam, and tu, datfala ‘big trabol.’ (Matt. 24:21) Lo datfala taem, iumi need for gohed garem peace and helpem olketa narawan for duim sem samting. Bihaen datwan, bae iumi no feisim moa eni hard taem wea savve mekem iumi wari. Iumi bae garem perfect peace wea bae stap for olowe, and datwan nao Jehovah laekem iumi for enjoyim.​—Isa. 26:3, 4.