Waswe, Iu Tingim Yet?
Waswe, iu tingim yet samfala gud point from olketa Wastaoa blo disfala year? Trae ansarem olketa kwestin hia:
Why nao hem gud for iusim taem blo iumi for prea lo Jehovah, studyim Bible, and ting raonem olketa samting iumi lanem abaotem Jehovah?
Datwan bae helpem iumi for mekem olketa gud disison, teach gud, garem strongfala faith, and strongim love blo iumi for Jehovah.—w22.01, p. 30-31.
Sapos iumi trustim Jehovah and olketa brata wea lead, hao nao datwan savve helpem iumi?
Iumi need for trustim God lo evri samting distaem and no daotem olketa disison and direction wea iumi kasem from olketa elder. Datwan bae helpem iumi for trustim eni direction wea iumi kasem lo taem blo bigfala trabol, nomata maet hem no mek sense lo iumi or hem no isi for followim.—w22.02, p. 4-6.
Wat nao angel minim taem hem talem Zechariah hao Governor Zerubbabel “mekem las ston blong Tambuhaos ya fo hemi stret”? (Sekaraea 4:8-10, SIPB)
Disfala vision helpem olketa Jew for luksavve hao datfala niu temple bae hem complete and Jehovah bae hapi lo datfala temple.—w22.03, p. 16-17.
Hao nao iumi savve showimaot gudfala example lo toktok blo iumi? (1 Tim. 4:12)
Iumi savve story kaen and showimaot respect taem iumi duim ministry blo iumi, no fraet for singsing and koment lo evri meeting, and no iusim nogud toktok bat talem tru samting and talem toktok wea strongim narawan.—w22.04, p. 6-9.
Why nao Daniel chapter 7 storyim fofala wild animal (olketa gavman) bat Revelation 13:1, 2 storyim nomoa wanfala wild animal?
Datfala wild animal wea Revelation 13 storyim hem no stand for wanfala gavman nomoa, olsem Rome. Bat hem stand for evri gavman wea rulim olketa man kam kasem distaem.—w22.05, p. 9.
Wat nao wanfala main wei wea iumi savve showimaot iumi trustim God for duim stret samting?
Sapos samwan tok spoelem iumi, mekem iumi feel nogud, or sin againstim iumi, iumi trae for no keepim kros and leavim evri samting lo hand blo Jehovah. Hem nao bae stretem evri nogud samting wea kamaot from sin.—w22.06, p. 10-11.
Wat nao wanfala brata wea prea bifor and bihaen lo meeting shud tingim?
Prea hem no for kaonselem kongregeson or for mekem announcement. And brata shud no talem “plande toktok” taem hem prea. (Matt. 6:7)—w22.07, p. 24-25.
Taem “olketa wea duim nogud samting” laef bak and “kasem judgment,” wat nao datwan minim? (John 5:29)
Olketa bae no kasem judgment from olketa samting wea olketa duim bifor olketa dae. Bat Jesus bae lukluk sapos olketa willing for changem wei blo olketa bihaen olketa laef bak.—w22.09, p. 18.
Lo wanfala convention lo September 1922, wat nao Brata Rutherford encouragem olketa Bible Student for duim?
Lo wanfala convention lo Cedar Point, Ohio, U.S.A., hem sei: “King hem rul finis! Iumi nao mas talem evriwan abaotem hem. So, advertisem, advertisem, advertisem King and Kingdom blo hem!”—w22.10, p. 3-5.
Olsem Isaiah chapter 30 storyim, wat nao thrifala samting wea God duim for helpem iumi for no givap?
Datfala chapter storyim hao (1) Jehovah lisin gud and ansarem olketa prea blo iumi, (2) hem teachim iumi, and (3) iumi kasem olketa blessing from hem distaem and lo future tu.—w22.11, p. 9.
Why nao iumi savve sei Sams 37:10, 11, 29 (SIPB) hem kamap tru lo bifor and bae hem kamap tru lo future tu?
David raet abaotem gudfala laef wea pipol lo Israel bifor garem, olsem lo taem wea Solomon hem rul. Taem Jesus storyim paradaes lo future, hem quotem Sams 37:11 (SIPB). (Matt. 5:5; Luke 23:43)—w22.12, p. 8-10, 14.