1 | Prea—“Putim Evri Wari Bilong Iufala Long Hand Bilong Hem”

BIBLE SEI: “Putim evri wari bilong iufala lo hand blo [God], bikos hem tingim iufala.”—1 PETER 5:7.

Wat Datwan Minim

Jehovah God invaetem iumi for story lo hem abaotem eni samting wea mekem iumi wari. (Psalm 55:22) Iumi savve prea abaotem eni problem wea iumi kasem. If hem important lo iumi, hem important lo Jehovah tu. For prea lo Jehovah hem important samting wea savve mekem iumi garem peace lo mind.—Philippi 4:6, 7.

Hao Diswan Savve Help

Taem iumi deal witim sik lo mind, iumi savve feel olsem iumi stap seleva. Olketa nara pipol no evritaem minim gud wat hem kasem iumi. (Proverbs 14:10) Bat taem iumi storyim feeling blo iumi lo Jehovah lo prea, iumi savve hem bae evritaem lisin gud and minim iumi. Jehovah lukim iumi, hem savve lo pain and stragol wea iumi kasem, and hem laekem iumi for prea lo hem abaotem eni samting wea mekem iumi wari.—2 Chronicles 6:29, 30.

For story lo Jehovah lo prea mekem iumi barava sure hem tingim iumi. Iumi feel olsem man wea raetem psalm wea prea olsem: “Yu luksave dat mi safa tumas, an yu save long olketa trabol blong mi tu.” (Sams 31:7, SIPB) For savve dat Jehovah lukim wat iumi deal witim, savve barava helpem iumi for no givap lo olketa hard taem wea iumi kasem. Bat hem no just lukim nomoa olketa hard taem blo iumi. Winim eni narawan, Jehovah minim situation blo iumi and helpem iumi for kasem comfort and encouragement from Bible.

Hao Bible Hem Helpem Julian

Hao Wei for Wari Tumas Affectim Mi

“Mi stragol witim wei for wari tumas and obsessive-compulsive disorder (OCD). Mi savve wari tumas lo olketa taem wea mi no expectim. For lelebet taem mi olraet and then mi wari tumas nomata no eniting happen. Mi savve wari tumas taem mi stap witim olketa narawan. Mi warim tumas hao olketa bae ting lo mi.

“Olketa wea savve lo wat mi deal witim barava helpem mi. For tok stret, samfala taem wat olketa talem hem no wat mi laek herem. Bat mi tinghae lo hao olketa trae for helpem mi.

“Samfala taem, from mi garem wei for wari tumas and OCD, datwan mekem hem hard for prea. Mi mas traem best for concentrate and story lo Jehovah lo prea. Taem mi tingim wanfala samting, mi kwiktaem for tingim nara samting moa so staka taem datwan mekem mi for barava konfius. Taem mi no savve kontrolem tingting blo mi, hem hard for storyim tingting and feeling blo mi lo Jehovah.”

Hao Bible Helpem Mi

“Taem mi studyim Bible mi lanem dat prea hem no need for long tumas or mi mas savve gud hao for story mekem God acceptim. Samfala taem, taem mi no savve storyim nao feeling blo mi, mi just prea and sei: ‘Jehovah, plis helpem mi.’ Nomata olsem, mi luksavve Jehovah minim mi and givim help wea mi needim lo datfala taem. And, mi go for lukim doctor tu. Mi hapi and tinghae lo tufala samting hia bikos hem helpem mi. Mi kasem gud samting from mi prea lo Dadi blo mi lo heven, and mi sure hem lovem mi and laek helpem mi.”