2 | “Olketa Holy Raeting . . . Comfortim Iumi”

BIBLE SEI: “Evri samting wea olketa raetem bifor hem for teachim iumi. Hem givim iumi hope bikos olketa Holy Raeting hia helpem iumi for no givap and comfortim iumi.”—ROME 15:4.

Wat Datwan Minim

Bible garem olketa comforting toktok wea savve strongim iumi for no givap taem iumi deal witim olketa negative tingting. And tu, message lo Bible givim hope dat klosap feeling for barava sorre bae nomoa nao.

Hao Diswan Savve Help

Samfala taem iumi evriwan savve deal witim samting wea mekem iumi sorre. Bat olketa wea safa from depression or stress savve barava feel sorre evritaem. Hao nao Bible savve help?

Bible garem staka gud toktok wea savve helpem iumi for no garem negative tingting. (Philippi 4:8) Hem savve comfortim iumi and mekem iumi garem peace wea datwan bae helpem iumi for kontrolem feeling blo iumi.—Psalm 94:18, 19.
Bible savve helpem iumi for no tingse iumi iusles.—Luke 12:6, 7.
Staka story lo Bible mekem iumi sure dat iumi no stap seleva and God wea hem Creator blo iumi, barava minim feeling blo iumi.—Psalm 34:18; 1 John 3:19, 20.
Bible promisim dat God bae mekem iumi for no tingim moa olketa nogud memory. (Isaiah 65:17; Revelation 21:4) Taem iumi deal witim olketa nogud tingting and feeling, disfala promis savve strongim iumi for no givap.

Hao Bible Hem Helpem Jessica

Hao Depression Affectim Mi

“Taem mi 25 years old, mi stress tumas and olketa faendaot mi garem depression. Mi safa from mi gohed for tingim olketa nogud samting wea happen lo laef blo mi bifor. Olketa doctor helpem mi for savve mi depress bikos mi gohed for tingim datwan. Witim treatment wea mi kasem finis, mi needim doctor for helpem mi luksavve and stretem olketa negative tingting wea mi garem.”

Hao Bible Helpem Mi

“Taem mi barava depress, mi kasem panic attak, barava wari, and no savve sleep. Staka taem lo naet, mi savve tingting tumas abaotem olketa samting wea mekem mi wari wea mi no savve kontrolem. Olsem Psalm 94:19 storyim, God savve comfortim and mekem iumi garem peace taem iumi tingting tumas abaotem olketa samting wea mekem iumi wari. So mi putim Bible blo mi and wanfala notebuk wea mi raetem olketa scripture wea savve encouragem mi saed lo bed blo mi. Taem mi no savve sleep, mi readim samfala Bible verse and datwan comfortim mi.

“Bible encouragem iumi for no garem tingting wea againstim wat iumi lanem abaotem God. Lo bifor, mi garem tingting dat mi iusles and no eniwan lovem mi. Bat mi lanem hao kaen tingting olsem hem no followim wat Bible talem wea storyim God hem love, and hem Dadi wea kaen and tingim each wan lo iumi. Isisi mi kontrolem tingting blo mi, instead for letem tingting blo mi nao kontrolem mi. Mi lane for ting lo miseleva olsem hao God ting lo mi. Diswan barava helpem mi for no garem negative tingting abaotem miseleva.

“Mi luk forward for taem wea evri nogud memory and wei for garem olketa negative tingting bae nomoa nao. For savve dat mental disorder hem samting wea bae finis, hem helpem mi for no givap distaem and luk forward for future taem mi bae no garem depression.”