4 | Bible Givim Olketa Gud Advaes

Wat Datwan Minim

Bible hem no wanfala medical buk, bat hem givim olketa gud advaes wea savve helpem iumi. Olketa advaes hia savve helpem samwan wea deal witim sik lo mind. Tingim samfala example.

Hao Diswan Savve Help

“Pipol wea sik nao need for go lukim doctor, no olketa wea strong.”​—MATTHEW 9:12.

Bible storyim dat iumi need for kasem medical treatment. Staka pipol wea garem sik lo mind faendem hem help taem olketa go lukim doctor and kasem stret information abaotem sik blo olketa.

“Exercise hem gud for body.”​—1 TIMOTHY 4:8, Contemporary English Version.

Iusim taem and strong for duim samting wea bae mekem iu healthy. Olsem for exercise evritaem, kaikaim healthy kaikai, and garem inaf sleep.

“Man hemi hapi, laef hemi helti. Man hemi filnogud, laef hemi bagarap.”​—PROVEBS 17:22, SIPB.

For readim olketa story lo Bible and markem goal wea iu fit for kasem savve helpem iu for hapi. If iu garem positive tingting and hope dat evri samting bae gud moa lo future, datwan bae helpem iu for deal witim olketa challenge wea iu kasem from sik blo iu.

“Man hemi hambol, nao hemi waes.”​—PROVEBS 11:2, SIPB.

Maet iu faendem hem no isi for iuseleva duim evriting wea iu laekem, so willing for acceptim help from olketa narawan. Frens and famili maet laek for helpem iu, bat olketa no savve wat for duim. Letem olketa savve wat nao iu laekem olketa for duim for iu. No expectim tumas samting from olketa, and evritaem talem thankiu for help blo olketa.

Hao Advaes lo Bible Helpem Olketa wea Garem Mental Health Problem

“Mi savve samting hem no stret witim mi, so mi go lukim doctor. And hem faendaot lo sik blo mi. Diswan helpem mi for savve wat nao mekem mi for olsem and for savve lo treatment wea bae helpem mi.”—Nicole,a wea deal witim bipolar disorder.

“Mi lukim dat for readim Bible evritaem witim waef blo mi helpem mi for startim day witim wei for tingim gud samting. And lo samfala day wea hem no isi for deal witim sik blo mi, for readim wanfala verse barava comfortim mi.”—Peter, wea deal witim depression.

“Hem hard for talem olketa narawan abaotem sik blo mi bikos mi shame tumas. Bat wanfala klos fren blo mi barava lisin gud lo mi and trae for minim hao mi feel. Hem barava helpem mi for feel gud and no feel olsem mi stap seleva.”—Ji-yoo, wea deal witim eating disorder.

“Bible helpem mi for balance lo waka and rest. Wisdom lo Bible helpem mi for deal witim olketa problem lo feeling wea mi stragol witim.”​—Timothy, wea deal witim obsessive-compulsive disorder.