Hao for Deal Witim Wanfala Health Problem wea Iu No Expectim

Hao, health blo iu seknomoa gogo daon? Then iu bae savve dat wanfala health problem savve mekem iu taed saed lo mind and feeling, and treatment hem expensive tu. Wat nao savve helpem iu for deal witim datwan? Hao nao iu savve helpem famili member or fren wea deal witim wanfala health problem? Nomata Bible hem no wanfala medical textbuk, hem storyim olketa practical principle wea savve helpem iu for deal witim challenging situation olsem.

Olketa tip for helpem iu deal witim wanfala health problem

• Faendem medical treatment

  Wat Bible talem: “Pipol wea sik nao need for go lukim doctor, no olketa wea strong.”—Matthew 9:12.

  Hao for followim: Faendem help from olketa doctor taem iu needim.

  Traem diswan: Faendem best medical kea wea available for iu. Samfala taem, hem gud for askem opinion blo nara doctor. (Proverbs 14:15) Story gud witim olketa doctor—mek sure iu understandim wat olketa talem, and iu storyim klia olketa symptom blo iu. (Proverbs 15:22) Faendaot abaotem sik blo iu, and olketa treatment wea iu savve kasem tu. Taem iu understandim wat nao kasem iu, datwan bae helpem iu for redi lo emotional saed for deal witim situation blo iu and for mekem olketa gud disison saed lo treatment blo iu.

• Maintainim olketa healthy habit

  Wat Bible talem: “Exercise hem gud for body blo iu.”—1 Timothy 4:8, Contemporary English Version.

  Hao for followim: Iu bae benefit if iu maintainim olketa healthy habit, olsem regular physical exercise.

  Traem diswan: Followim regular exercise routine, garem healthy diet, and kasem inaf sleep. Nomata maet iu still adjust lo health problem blo iu, olketa expert sei for iusim taem and energy lo olketa healthy habit hem savve benefitim iu. Bat nomata iu bae duim olketa samting hia, iu mas tingim tu hao datwan bae affectim sik blo iu and hem no spoelem medical treatment wea iu kasem.

• Acceptim sapot blo olketa narawan

  Wat Bible talem: “Wanfala tru fren hem showim love evritaem, and hem kamap wanfala brata blo iu lo taem blo trabol.”—Proverbs 17:17.

  Hao for followim: Olketa fren blo iu savve helpem iu for go thru lo olketa hard taem.

  Traem diswan: Story witim wanfala fren wea iu trustim wea iu feel free for storyim feeling blo iu lo hem. If iu duim datwan, bae iu no stress tumas and bae iu hapi. Olketa fren and famili blo iu maet laek for helpem iu lo olketa nara wei, bat maet olketa no savve wat for duim. So storyim klia wat nao olketa savve duim for helpem iu. No expectim tumas samting, and evritaem tinghae lo help wea olketa givim for iu. Bat iu mas tingim dat nomata olketa fren blo iu laek for helpem iu, samfala taem maet olketa duim samting wea ova tumas. So maet iu bae need for putim samfala spialaen, olsem for wat taem nao olketa savve visitim iu and hao long nao olketa savve kam stap.

• Keepim positive attitude

  Wat Bible talem: “Heart wea hapi hem gudfala medicine, bat tingting wea wikdaon hem finisim strong blo man.”—Proverbs 17:22.

  Hao for followim: Positive attitude and wei for garem hope savve helpem iu for balance saed lo feeling and for deal witim health problem wea savve kosim stress.

  Traem diswan: Taem iu change for fitim niu situation blo iu, focus nomoa lo wat iu fit for duim, no lo olketa samting wea iu no fit for kontrolem. Avoidim wei for comparem iuseleva witim narawan or witim laef blo iu bifor iu kasem problem saed lo health. (Galatia 6:4) Markem olketa goal wea iu fit for kasem—diswan savve helpem iu for garem positive tingting abaotem future. (Proverbs 24:10) Duim samting wea iu fit for duim for olketa narawan. Hapi wea iu kasem from wei for give savve katem daon negative tingting.—Acts 20:35.

Hao, God bae helpem iu for deal witim health problem?

Bible storyim dat Jehovah Goda savve helpem man for deal witim olketa health problem. Nomata iumi no expectim Jehovah for duim mirakol for kiurim iumi, God savve helpem olketa wea worshipim hem lo olketa wei hia:

Peace. Jehovah savve givim “peace bilong God wea winim nao wanem man savve minim.” (Philippi 4:6, 7) Disfala peace, or peace lo mind, savve helpem man for no stress and wari tumas. God givim peace hia lo olketa wea prea lo hem and storyim evri wari blo olketa lo hem.—1 Peter 5:7.

Wisdom. Jehovah savve givim wisdom for helpem iumi mekem gud disison. (James 1:5) Man savve kasem wisdom olsem taem hem lane and applyim olketa principle wea hem readim insaed Bible.

Wanfala nambawan hope for future. Jehovah promisim dat lo future “no eniwan wea stap lo there bae sei: ‘Mi sik.’” (Isaiah 33:24) Disfala hope helpem staka for garem positive tingting nomata olketa experiencem olketa serious health problem.—Jeremiah 29:11, 12.