Hao for Helpem Olketa wea Garem Mental Health Problem

Wat Datwan Minim

Hem isi for tingse iumi no fit for helpem wanfala fren wea garem mental health problem. Bat iumi savve showim iumi tingim olketa fren blo iumi taem iumi helpem olketa for deal witim datwan. Hao?

Hao Diswan Savve Help

“Mas willing for lisin.”​—JAMES 1:19.

Wanfala best wei for helpem fren blo iu hem for lisin taem hem laek for story. No ting iu mas talem samting for evriting wea hem storyim. Helpem hem for luksavve iu willing for lisin and tingim hem. Trae for minim feeling blo hem and no judgem hem. Tingim, maet hem talem samting wea hem no minim and regretim bihaen.—Job 6:2, 3.

“Comfortim olketa.”​—1 THESSALONICA 5:14.

Maet fren blo iu hem wari, or hem stragol witim feeling for feel iusles. Taem iu talem hem iu tingim hem, datwan savve comfortim and encouragem hem nomata iu no savve wat for talem.

“Fren blong yu, hemi lavem yu olowe.”​—PROVEBS 17:17, SIPB.

Duim samting for help. Instead for tingse iu savve hao for help, askem hem wat iu savve duim. If fren blo iu faendem hard for talem wat hem needim, trae storyim samting wea iutufala savve duim tugeta, olsem for go wakabaot. Or iu savve helpem hem for shopping, klining, or duim olketa nara samting.​—Galatia 6:2.

“Patient.”​—1 THESSALONICA 5:14.

Maet samfala taem fren blo iu no laek for story. Talem fren blo iu dat iu willing for lisin taem hem feel laek for story. From fren blo iu sik, hem maet talem or duim samting wea mekem iu feel nogud. Hem maet cancelim plan blo iutufala or hem no hapi. Mas patient and minim hem taem iu helpem hem.​—Proverbs 18:24.

Sapot wea Iu Givim Savve Helpem Fren blo Iu

“Mi mek sure mi wanfala fren wea hem feel free for story lo hem. Nomata mi no savve duim samting for finisim sik blo hem, mi evritaem trae for lisin lo wat hem bae talem. Samfala taem only samting wea savve mekem hem feel gud hem for samwan lisin lo hem.”​—Farrah,a wea fren blo hem deal witim eating and anxiety disorder and clinical depression.

“Wanfala fren blo mi hem kaen tumas and savve encouragem mi. Hem invaetem mi lo haos blo hem for kaikaim naes kaikai. Hem barava lovem mi, and datwan mekem hem isi for mi storyim feeling blo mi. Datwan barava encouragem mi!”​—Ha-eun, wea deal witim clinical depression.

“Hem important tumas for patient. Taem waef blo mi duim samting wea mekem mi feel nogud, mi remindim miseleva dat sik blo hem nao mekem hem for olsem. Diswan helpem mi for no kros lo hem bat kaen lo hem.”​—Jacob, wea waef blo hem deal witim clinical depression.

“Waef blo mi hem barava sapotim and comfortim mi. Taem mi barava stress tumas, hem no forcem mi for duim eniting wea mi no laek for duim. Datwan minim, samfala taem hem no duim nao olketa samting wea hem laek tumas for duim. Hem barava spesol lo mi bikos hem kaen tumas and tingim mi.”​—Enrico, wea deal witim anxiety disorder.