Waswe, Iu Savve Finis?
Hao nao olketa brik wea olketa faendem lo Babylon bifor and hao olketa mekem olketa brik hia showimaot Bible hem accurate?
OLKETA archaeologist discoverim staka million brik wea olketa beikem wea olketa iusim for buildim city blo Babylon bifor. Robert Koldewey, wanfala archaeologist storyim olketa wakem olketa brik hia insaed olketa bigfala oven ‘aotsaed lo taon, wea garem gud clay and staka firewood.’
Olketa archaeologist discoverim pruv wea showim hao olketa gavman official lo Babylon iusim olketa oven hia tu for duim barava nogud samting. Paul-Alain Beaulieu lo University of Toronto, wea expert lo history and languis blo Assyria bifor sei samfala raeting blo Babylon showim king savve givim order for bonem insaed olketa oven hia pipol wea no obeyim hem or wea no respectim olketa holy samting. For example, wanfala raeting lo taem blo King Nebuchadnezzar sei: ‘Distroem, bonem, roastim olketa insaed oven, mekem smoke blo olketa go ap, torowem olketa insaed fire for killim olketa dae.’
Diswan remindim olketa Bible reader abaotem wanem Daniel chapter 3 storyim. Chapter hia storyim hao King Nebuchadnezzar wakem wanfala maeti gold image and standapim lo flat ples lo Dura, aotsaed lo city blo Babylon. Nebuchadnezzar kros tumas lo thrifala young Hebrew hia, Shadrach, Meshach, and Abednego wea no baodaon lo datfala image. So hem givim order for olketa hotem datfala oven “sevenfala taem hot winim normal hot blo hem” and for torowem thrifala hia insaed “datfala big fire wea hot tumas.” Wanfala paoaful angel sevem olketa for no dae.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Brik wea olketa beikem wea garem nem blo Nebuchadnezzar
Olketa brik wea olketa discoverim lo Babylon showim tu hao Bible hem accurate. Staka lo olketa brik hia garem raeting wea praisem king. Wanfala raeting sei: “Nebuchadnezzar, King blo Babylon . . . Mi nao paoaful king wea buildim datfala palace. Mi laekem olketa lo laen blo mi for rul insaed for olowe.” Disfala raeting klosap semsem witim Daniel 4:30, wea Nebuchadnezzar tok praod olsem: “Hao, diswan ino bigfala Babylon wea miseleva nao buildim for haos blo king witim paoa and strong blo mi mekem datwan mekhae lo glory blo mi?”