No Enitaem Iumi Stap Seleva

1-2. (a) Why nao iumi fit for sei no enitaem iumi deal witim olketa hard taem seleva? (b) Wat nao bae iumi storyim lo disfala article?

TAEM iumi feisim olketa barava hard taem lo laef, maet iumi feel olsem iumi stap seleva insaed wanfala smol boat lo raf sea. Bat really, iumi no feisim olketa hard taem seleva. Loving Dadi blo iumi lo heven hem lukim hard taem wea iumi kasem and hem promis for helpem iumi for deal witim. Jehovah hem promis olsem lo olketa loyal servant blo hem: “Mi bae helpem iu.”—Isa. 41:10.

² Lo disfala article bae iumi storyim hao Jehovah helpem iumi lo fofala wei, (1) Hem leadim iumi, (2) provaed for iumi, (3) protectim iumi, and (4) comfortim iumi. Jehovah promisim iumi dat nomata wat kaen challenge iumi feisim lo laef, hem bae no enitaem forgetim iumi. Hem bae no enitaem lusim iumi. So no enitaem iumi bae stap seleva.

JEHOVAH LEADIM IUMI

3-4. Hao nao Jehovah leadim iumi? (Psalm 48:14)

³ Readim Psalm 48:14. Jehovah no expectim iumi for leadim iumiseleva. So hao nao hem leadim olketa wea loyal for worshipim hem distaem? Wanfala wei, hem thru lo Bible. (Ps. 119:105) Jehovah iusim Bible for helpem iumi mekem olketa disison and garem olketa quality wea savve helpem iumi for hapi distaem and for laef olowe lo future.a For example, hem teachim iumi for no keepim kros, for mas honest lo evri samting, and for barava lovem narawan from heart. (Ps. 37:8; Heb. 13:18; 1 Pet. 1:22) Wei for showimaot olketa naes quality olsem hem mekem iumi kamap olketa beta parents, marit partner, and frens.

⁴ And tu, Jehovah includim lo Bible olketa story abaotem pipol wea kasem olketa hard taem and garem sem feeling olsem iumi. (1 Cor. 10:13; Jas. 5:17) Taem iumi readim olketa tru laef story olsem, and followim olketa leson wea iumi lanem, datwan savve helpem iumi lo tufala wei. First, hem helpem iumi for luksavve dat iumi no stap seleva, olketa narawan tu feisim olketa sem situation olsem iumi, and witim help blo Jehovah olketa no givap. (1 Pet. 5:9) And second, hem helpem iumi for savve hao for deal witim olketa hard taem.—Rom. 15:4.

5. Hu nao Jehovah iusim for leadim iumi lo road for kasem laef?

⁵ Jehovah iusim tu olketa brata and sista for leadim or givim advaes for iumi.b For example, olketa circuit overseer savve visitim kongregeson evritaem for encouragem iumi. Olketa tok wea olketa givim savve strongim faith blo iumi and helpem iumi for gohed wan mind. (Acts 15:40–16:5) Olketa elder lo kongregeson tu waka hard for lukaftarem each wan lo iumi. (1 Pet. 5:​2, 3) Olketa parents leadim pikinini blo olketa lo spiritual wei, olketa teachim pikinini for garem gud tingting and olketa gudfala wei. (Prov. 22:6) And olketa mature Christian sista savve helpem olketa young sista taem olketa showimaot gud example, talem practical advaes, and provaedem loving encouragement.—Titus 2:​3-5.

6. Wat nao iumi mas duim for kasem gud samting from wei wea Jehovah leadim iumi?

⁶ Jehovah givim iumi staka direction wea iumi needim. So wat nao iumi savve duim for showimaot iumi tinghae lo wat hem duim ? Proverbs 3:​5, 6 sei: “Trustim Jehovah lo full heart blo iu, and no depend lo savve blo iuseleva.” Taem iumi duim datwan, ‘hem bae showim iumi stretfala road,’ wea minim, hem bae helpem iumi for misstim staka problem and for enjoyim laef. Iumi hapi tumas bikos Jehovah provaedem gudfala advaes for iumi each wan!—Ps. 32:8.

JEHOVAH PROVAED FOR IUMI

7. Wat nao samfala wei wea Jehovah provaed for iumi? (Philippians 4:19)

⁷ Readim Philippians 4:19. Olsem iumi lanem, Jehovah hem leadim iumi lo spiritual wei, bat hem duim nara samting tu, hem blessim hard waka blo iumi for kasem olketa need blo iumi olsem kaleko, kaikai, and ples for stap. (Matt. 6:33; 2 Thess. 3:12) Iumi evriwan savve wari abaotem olketa samting iumi needim lo laef, nomata olsem, Jehovah encouragem iumi for no wari tumas abaotem olketa samting hia. (Lukim English study note lo Matthew 6:25.) Why nao olsem? Bikos Dadi blo iumi bae no enitaem lusim olketa wea faithful for worshipim hem taem olketa kasem problem. (Matt. 6:8; Heb. 13:5) So iumi savve barava trustim promis wea hem talem dat hem bae provaed for iumi.

8. Wat nao Jehovah duim for David?

⁸ Tingim hao Jehovah helpem David. Lo taem wea David mas ranawe from King Saul, Jehovah provaedem wat David and olketa man blo hem needim for olketa stap laef. Taem David ting bak lo olketa years wea Jehovah lukaftarem hem, David sei: “Bifor tu mi young and distaem mi olo nao, bat no enitaem mi lukim God lusim eniwan wea raeteous, or pikinini blo hem no garem kaikai.” (Ps. 37:25) Olsem David, iu tu lukim hao Jehovah showimaot love and provaed for olketa wea worshipim hem.

9. Taem disaster kamap, wat nao Jehovah duim for provaed for pipol blo hem distaem? (Lukim tu olketa piksa.)

⁹ Jehovah savve provaed tu for pipol blo hem lo taem blo disaster. For example, taem wanfala bigfala hangere kamap lo first century, olketa Christian lo olketa nara ples sendem relief supply for helpem olketa brata and sista wea garem need. (Acts 11:​27-30; Rom. 15:​25, 26) Pipol blo God distaem tu garem sem feeling for laek helpem olketa brata and sista. Taem disaster happen, lo loving wei Jehovah muvim pipol blo hem for provaedem olketa samting olsem kaikai, wata, kaleko, and medicine for helpem olketa brata and sista lo ples wea disaster kasem. Olketa construction team savve help for repairim olketa haos and Kingdom Hall wea damage. And pipol blo Jehovah kwiktaem for provaedem emotional and spiritual sapot for olketa wea lusim olketa loved wans or olketa haos blo olketa.c

10-11. Wat nao iu lanem from experience blo Borys?

¹⁰ Jehovah hem willing tu for provaed for pipol wea no worshipim hem yet. Iumi tu laek for olsem hem, and duim samting for kaen lo olketa wea no worshipim Jehovah. (Gal. 6:10) Taem iumi duim datwan, hem savve givim gud witness lo olketa narawan. Tingim experience blo Borys, hem wanfala principal blo wanfala skul lo Ukraine. Nomata Borys no wanfala Jehovah’s Witness, hem evritaem kaen lo olketa Witness student and respectim biliv blo olketa. Taem Borys disaed for ranawe from area wea war gohed and go stap lo nara part lo kantri wea moa sef, olketa Witness nao helpem hem. Bihaen, Borys attendim Memorial lo dae blo Christ. Taem Borys tingim wat olketa brata duim for hem, hem sei: “Olketa Witness kaen tumas lo mi and lukaftarem mi. Mi thankiu lo Olketa Jehovah’s Witness.”

¹¹ Taem iumi showimaot love lo olketa wea needim help, nomata olketa wea worshipim God or nomoa, iumi followim example blo Dadi blo iumi lo heven wea showim mercy. (Luke 6:​31, 36) Iumi hope wei wea iumi traem best for showimaot love lo pipol bae helpem olketa for kamap disaepol blo Christ. (1 Pet. 2:12) Nomata pipol kamap disaepol or nomoa, iumi bae barava hapi bikos iumi givim samting for helpem narawan.—Acts 20:35.

JEHOVAH PROTECTIM IUMI

12. Wat kaen protection nao Jehovah promis for givim lo pipol blo hem? (Psalm 91:​1, 2, 14)

¹² Readim Psalm 91:​1, 2, 14. Jehovah promis for protectim pipol blo hem distaem lo spiritual wei. Hem bae no letem Satan for spoelem tru worship. (John 17:15) And lo taem blo “big trabol,” iumi savve barava trustim dat Jehovah bae fulfillim promis blo hem for protectim pipol blo hem lo spiritual and lo physical wei.—Rev. 7:​9, 14.

13. Wat nao samfala wei wea Jehovah savve protectim each wan lo iumi?

¹³ Hao nao Jehovah savve protectim each wan lo iumi? Jehovah iusim Bible for helpem iumi for luksavve lo wat hem stret and no stret. (Heb. 5:14) Taem iumi followim olketa Bible principle, hem kamap olsem shield wea protectim iumi from olketa samting wea savve spoelem iumi lo spiritual and physical wei. (Ps. 91:4) And tu, Jehovah iusim kongregeson for protectim iumi. (Isa. 32:​1, 2) Taem iumi associate witim olketa wea lovem Jehovah and followim olketa Bible principle, datwan savve encouragem and strongim iumi for gohed stap klia lo olketa nogud samting.—Prov. 13:20.

14. (a) Why nao God no protectim iumi from evri hard taem? (b) Wat nao promis wea Psalm 9:10 storyim? (Lukim tu footnote.)

¹⁴ Lo bifor, samfala taem Jehovah protectim olketa wea worshipim hem from pipol wea laek spoelem or killim olketa dae. Bat, hem no duim datwan evritaem. Samfala taem, samting wea iumi “no expectim” savve happen. (Eccl. 9:11) And for pruvim Satan hem man for laea, Jehovah letem olketa servant blo hem lo bifor for kasem persecution and samfala olketa dae tu. (Job 2:​4-6; Matt. 23:34) Sem samting hem happen distaem tu. Nomata Jehovah maet no finisim olketa hard taem wea iumi kasem, iumi sure hem bae no enitaem lusim olketa wea lovem hem.d—Ps. 9:10.

JEHOVAH COMFORTIM IUMI

15. Hao nao prea, Bible, and olketa brata and sista savve comfortim iumi? (2 Corinthians 1:​3, 4)

¹⁵ Readim 2 Corinthians 1:​3, 4. Samfala taem iumi savve sorre, wari, or stress. Maet iu gohed for deal witim wanfala hard situation distaem wea mekem iu feel olsem iu stap seleva. Hao, eniwan stap wea savve understandim feeling blo iu? Jehovah nao minim feeling blo iu. Hem no just feelim pain wea iumi kasem bat hem “comfortim iumi lo evri hard taem wea kasem iumi.” Wat nao hem duim? Taem iumi prea and askem Jehovah for help, hem savve givim iumi “peace blo God wea winim nao wanem man savve minim.” (Phil. 4:​6, 7) Iumi savve kasem comfort tu taem iumi readim toktok blo Jehovah for iumi insaed lo Bible. Toktok blo hem wea showim love, wisdom, and givim iumi hope savve barava encouragem iumi. And lo olketa Christian meeting iumi savve kasem comfort bikos iumi associate witim olketa brata and sista wea lovem iumi and kasem encouragement from Bible.

16. Wat nao iu lanem from experience blo Nathan and Priscilla?

¹⁶ For helpem iumi lukim hao Jehovah provaedem comfort and encouragement thru lo Bible, tingim experience blo Nathan and Priscilla, wea stap lo United States. Samfala year go finis, tufala disaed for muv go lo ples wea garem big need for olketa Kingdom pablisa. Nathan sei: “Mitufala trustim dat Jehovah bae blessim mitufala.” Bat, bihaen tufala arrive lo niu assignment, tufala kasem samfala problem wea tufala no expectim saed lo health and selen. Gogo tufala mas go bak hom, nomata olsem, tufala still garem problem saed lo selen. Nathan sei: “Mi wonder why nao God no blessim disison blo mitufala. And mi start for wonder if mi duim eni samting wea no stret.” Bat gogo, Nathan and Priscilla luksavve God hem no lusim tufala. Nathan sei: “During olketa hard taem hia, Bible hem kamap olsem wanfala wise fren wea givim encouragement and direction lo mitufala. Taem mitufala focus lo wat Jehovah duim for helpem mitufala for no givap and mitufala no focus lo hard taem, datwan helpem mitufala for garem faith and redi for olketa challenge wea bae kamap lo future.”

17. Hao nao wanfala sista wea nem blo hem Helga kasem comfort? (Lukim tu piksa.)

¹⁷ Iumi savve kasem comfort tu from olketa brata and sista. Wat nao olketa savve duim? Tingim example blo Helga, wea stap lo Hungary. For staka year, hem deal witim staka challenge wea mekem hem feel sorre and feel iusles. Bat taem hem ting bak, hem lukim hao Jehovah iusim kongregeson for comfortim hem. Hem sei: “Jehovah hem evritaem helpem mi taem hem lukim mi taed tumas bikos mi mas waka for selen, lukaftarem pikinini blo mi wea sik, and mi deal witim olketa nara hard taem. Lo 30 years wea go pas, no eni day hem miss for keepim promis blo hem for comfortim mi. Staka taem hem iusim olketa brata and sista for talem olketa kaenfala toktok and naes koment for sei thankiu lo mi. Staka taem mi kasem wanfala message, card, or samwan talem toktok for encouragem mi lo taem wea mi barava needim.”

18. Hao nao iumi savve comfortim narawan?

¹⁸ Hem wanfala privilege for followim example blo God blo iumi for comfortim olketa narawan. Wat nao iumi savve duim? Iumi savve patient for lisin lo olketa, story kaen, and duim samting for helpem olketa. (Prov. 3:27) Iumi laek for gohed for comfortim olketa wea safa, wea includim tu olketa wea no worshipim God. Taem pipol deal witim sorre bikos samwan hem dae, sik, or wari, iumi savve visitim olketa, lisin lo olketa, and sharem olketa encouraging toktok lo Bible witim olketa. Taem iumi followim example blo Jehovah wea hem “God blo evri comfort,” iumi helpem olketa brata and sista for no givap lo olketa hard taem, and tu, maet iumi savve helpem olketa wea no worshipim Jehovah for laek lane abaotem hem.—Matt. 5:16.

JEHOVAH REDI EVRITAEM FOR HELPEM IUMI

19. Wat nao Jehovah duim for iumi, and hao nao iumi savve followim example blo hem?

¹⁹ Jehovah hem tingim tumas olketa wea lovem hem. Hem no lusim iumi taem iumi stragol for deal witim wanfala hard situation. Olsem wanfala loving dadi wea lukaftarem pikinini blo hem, Jehovah lukaftarem olketa wea faithful for worshipim hem. Hem leadim iumi, provaed for iumi, protectim iumi, and comfortim iumi. Iumi followim example blo loving Dadi blo iumi taem iumi sapotim and encouragem olketa narawan lo olketa hard taem wea olketa feisim. Nomata iumi bae feisim olketa challenge and samfala sorre situation, iumi savve barava trustim dat Jehovah hem stap witim iumi. Hem promis finis: “Iu no fraet, bikos mi stap witim iu.” (Isa. 41:10) Datwan barava encouragem iumi! No enitaem bae iumi stap seleva.