Hao Nao Iumi Savve Winim Wei for Daot?

1-2. (a) Wat nao samfala daot wea olketa servant blo Jehovah garem? (b) Wat nao bae iumi storyim lo disfala article?

IUMI evriwan, nomata iumi young or olo, samfala taem iumi savve garem daot.a For example, tingim thrifala situation hia: First situation, tingim wanfala young Witness wea wonder if Jehovah really interest lo hem. Datwan mekem hem no sure if hem shud baptaes. Second, tingim wanfala mature brata wea taem hem young, hem chus for putim Kingdom first lo laef instead for garem wanfala gud waka lo world. Bat distaem from hem no garem inaf selen for provaed for famili blo hem, maet hem wonder if hem mekem stret disison. And third, tingim wanfala sista wea hem olo and hem no strong nao. Maet hem feel discourage bikos hem no savve duim staka samting olsem bifor. Enitaem iu garem olketa kwestin olsem: ‘Hao, Jehovah hem really interest mi tu? Hao, mi kasem eni gud samting from olketa sakrifaes wea mi mekem for Jehovah? Waswe, mi still fit for duim eni samting for Jehovah tu?’

² If iumi no kasem ansa for olketa kwestin olsem, hem savve affectim worship blo iumi for Jehovah. Lo disfala article, bae iumi storyim olketa Bible principle wea savve helpem iumi if (1) iumi daotem dat Jehovah hem interest lo iumi, (2) daotem if disison blo iumi bifor hem stret, or (3) daotem if iumi still fit for duim samting for Jehovah.

WAT NAO SAVVE HELPEM IU FOR WINIM DAOT?

3. Wat nao wanfala samting wea iumi savve duim for helpem iumi for winim olketa daot?

³ Wanfala samting wea savve helpem iumi for winim olketa daot, hem nao for iusim Bible for kasem ansa for olketa kwestin blo iumi. If iumi duim datwan, bae hem strongim iumi, iumi kamap mature lo spiritual wei, and bae hem helpem iumi for “gohed for faithful.”—1 Cor. 16:13.

4. Wat nao iumi savve duim for “mek sure long wanem hem tru”? (1 Thessalonica 5:21)

⁴ Readim 1 Thessalonica 5:21. Disfala verse encouragem iumi for “chekim evri samting for mek sure long wanem hem tru.” Hao nao iumi savve duim datwan? Iumi shud comparem wat Bible talem witim wanem iumi tingse hem tru. For example, tingim situation blo datfala young person wea wonder if Jehovah really interest lo hem. Hao, hem shud ignorem nomoa datwan and acceptim kaen tingting for sei Jehovah no really kea abaotem hem? Nomoa, hem shud faendem tingting blo Jehovah abaotem datwan and “mek sure long wanem hem tru.”

5. Hao nao iumi savve “herem” ansa blo Jehovah for olketa kwestin blo iumi?

⁵ Taem iumi readim Bible, hem olsem iumi “herem” Jehovah toktok kam for iumi. Bat iumi need for duim moa samting for faendem tingting blo Jehovah lo wanfala specific kwestin. Iumi need for readim olketa scripture wea fitim situation blo iumi. Iumi savve duim research lo datfala subject, and iusim olketa study tul wea organization blo Jehovah provaedem. (Prov. 2:​3-6) Prea lo Jehovah for helpem iumi taem iumi duim research and for faendem tingting blo hem abaotem kwestin wea iumi garem. Then lukaotem olketa Bible principle and information wea fitim situation blo iumi. Iumi savve lanem staka gud samting tu from olketa story lo Bible abaotem olketa wea feisim sem samting.

6. Hao nao olketa meeting savve helpem iumi for winim olketa daot wea iumi garem?

⁶ Lo olketa meeting tu, iumi savve “herem” Jehovah toktok kam for iumi. If iumi attendim olketa meeting evritaem, maet iumi herem wanfala tok or koment from samwan lo audience wea savve helpem iumi for winim olketa daot. (Prov. 27:17) Distaem bae iumi storyim hao iumi savve winim samfala specific daot wea iumi maet garem.

TAEM IU DAOTEM DAT JEHOVAH INTEREST LO IU

7. Wat nao kwestin wea maet samfala garem?

⁷ Hao, enitaem iu wonder if Jehovah really interest lo iu tu? If iu feel olsem iu no important, maet hem hard for iu bilivim dat iu savve kamap fren blo Creator blo universe. Luk olsem King David tu garem kaen tingting olsem. Hem barava sapraes dat Jehovah interest lo iumi olketa man, dastawe hem sei: “O Jehovah, why nao olketa man important lo iu, why nao iu shud interest lo son blo man wea savve dae nomoa?” (Ps. 144:3) Wea nao iu savve faendem ansa for disfala kwestin?

8. Olsem iumi lanem lo 1 Samuel 16:​6, 7, 10-12, wat nao Jehovah luk for hem?

⁸ Lo Bible, iumi lanem hao Jehovah showimaot hem interest lo pipol wea olketa narawan tingse olketa no important. For example, Jehovah sendem Samuel lo haos blo Jesse for anointim wanfala lo olketa son blo hem for kamap future king blo Israel. Jesse garem eitfala son and hem kolem kam sevenfala for meetim Samuel, bat hem no includim David wea hem last born.b Nomata olsem, David nao Jehovah chusim. (Readim 1 Samuel 16:​6, 7, 10-12.) Jehovah lukim wat kaen person nao David. Hem luksavve David hem wanfala young man wea barava lovem olketa spiritual tings.

9. Why nao iu savve sure Jehovah hem interest lo iu? (Lukim tu piksa.)

⁹ Ting abaotem wat Jehovah duim finis for showim hem interest lo iu. Hem givim advaes wea barava fitim situation blo iu. (Ps. 32:8) Hard for hem duim datwan if hem no savve gud lo iu. (Ps. 139:1) Taem iu followim advaes blo Jehovah and iu lukim hao datwan helpem iu, bae iu convince dat Jehovah interest lo iu. (1 Chron. 28:9; Acts 17:​26, 27) Jehovah lukim evri samting wea iu duim for hem. Hem lukim tu evri wei blo iu and datwan mekem hem laek for fren witim iu. (Jer. 17:10) Hem laekem iu for kamap fren blo hem.—1 John 4:19.

TAEM IU DAOTEM IF OLKETA DISISON WEA IU MEKEM BIFOR HEM WISE

10. Taem iumi ting abaotem olketa disison wea iumi mekem bifor, wat nao olketa kwestin wea maet kamap?

¹⁰ Samfala taem, samfala maet ting bak and wonder if olketa disison wea olketa mekem bifor hem stret or nomoa. Maet olketa disaed for lusim wanfala gud waka or successful bisnis for duim moa samting lo service blo Jehovah. Bat maet staka year hem go pas since olketa mekem datfala disison. And maet olketa lukim samfala wea bin mekem disison for aftarem olketa material samting bifor, distaem olketa garem staka selen and luk olsem olketa enjoyim gud laef. Datwan maet mekem olketa for ting, ‘Hao, mi kasem eni gud samting from olketa sakrifaes wea mi mekem for Jehovah? Or datwan mekem mi for misstim staka chance for kasem olketa gud samting?’

11. Wat nao man wea raetem Psalm 73 wari abaotem?

¹¹ If iu garem olketa kwestin olsem, tingim hao man wea raetem Psalm 73 hem feel. Hem lukim olketa narawan enjoyim laef wea luk olsem hem healthy, rich, and no garem stress. (Ps. 73:​3-5, 12) Taem hem lukim evriting lo laef blo olketa luk olsem hem gud nomoa, hem feel dat taem hem servem Jehovah hem hard waka nating. From hem ting olsem, datwan mekem hem for “wari nomoa full day.” (Ps. 73:​13, 14) Hao nao hem deal witim olketa negative feeling olsem?

12. Olsem Psalm 73:​16-18 storyim, hao nao man wea raetem psalm hem deal witim negative tingting blo hem?

¹² Readim Psalm 73:​16-18. Datfala man wea raetem psalm hem go lo nambawan temple blo Jehovah. Taem hem lo there, tingting blo hem klia. Hem luksavve dat even if laef blo samfala pipol luk olsem hem isi, really, olketa bae no kasem eni gud samting lo future. Taem hem luksavve lo datwan, hem garem peace lo mind and hem savve dat wei for duim olketa spiritual samting hem nao best disison. From datwan, hem disaed strong for gohed for servem Jehovah.—Ps. 73:​23-28.

13. If iu no sure abaotem olketa disison blo iu bifor, hao nao iu savve kasem peace lo mind? (Lukim tu piksa.)

¹³ Bible savve helpem iu for garem peace lo mind tu. Hao? Ting raonem value blo olketa samting wea iu garem finis, olsem olketa blessing wea Jehovah givim iu, and comparem datwan witim wat pipol lo world kasem distaem wea hem nomoa reward blo olketa wea world offerim. Olketa maet depend nomoa lo wat olketa achivim distaem bikos olketa no garem hope for future. Bat, Jehovah givim iu staka blessing and iu garem hope lo olketa nambawan promis blo hem for future. (Ps. 145:16) And tu, tingim diswan: Hao, iu really sure dat if iu mekem olketa difren disison lo bifor, situation blo iu bae hem barava olsem wat iu tingim? Wanfala samting wea iumi sure lo hem nao: Olketa wea mekem disison wea base lo love wea olketa garem for God and narawan, bae evritaem kasem gud samting.

TAEM IU DAOTEM DAT IU NO FIT FOR DUIM STAKA SAMTING FOR JEHOVAH

14. Why nao samfala maet feel olsem olketa no fit, and wat kaen kwestin nao olketa maet garem?

¹⁴ Samfala servant blo Jehovah olketa mas deal witim old age, sik, or maet disable. Datwan maet mekem olketa feel olsem olketa no important nao lo Jehovah. Olketa maet ting, ‘Waswe, mi still fit for duim samting for Jehovah?’

15. Wat nao man wea raetem Psalm 71 sure lo hem?

¹⁵ Man wea raetem Psalm 71 garem sem tingting tu. Hem prea olsem: “No lusim mi taem strong blo mi hem gogo daon.” (Ps. 71:​9, 18) Nomata olsem, datfala man wea raetem psalm barava sure if hem gohed loyal for servem Jehovah, bae Jehovah leadim hem and sapotim hem. Hem luksavve Jehovah hapi lo olketa wea duim best blo olketa for servem Hem nomata situation blo olketa mekem hem hard for duim staka samting.—Ps. 37:​23-25.

16. Hao nao Jehovah savve iusim olketa wea olo? (Psalm 92:​12-15)

¹⁶ Hem gud for olketa olo garem tingting blo Jehovah abaotem situation blo olketa. Jehovah savve helpem iu for gohed faithful for worshipim hem nomata iu stragol for deal witim wei for olo. (Readim Psalm 92:​12-15.) Winim wei for tingting tumas lo wat iu no savve duim, concentrate lo wat iu fit for duim. For example, wei wea iu gohed faithful and showim interest lo olketa narawan savve strongim olketa. Storyim hao Jehovah lukaftarem iu for staka year and storyim strongfala hope blo iu for olketa promis blo God kamap tru lo future. And no daotem hao olketa prea blo iu from heart savve barava helpem olketa narawan. (1 Pet. 3:12) Nomata wat nao situation blo iu, iumi evriwan savve duim samting for Jehovah and olketa narawan.

17. Why nao iumi shud no comparem iumiseleva witim narawan?

¹⁷ If iu feel nogud bikos iu no fit for duim staka samting lo service blo Jehovah, remember hem tinghae lo wat iu fit for duim for hem. Maet iu garem tingting for laek comparem wat iu duim witim wat olketa narawan duim. No ting olsem! Why? Bikos Jehovah no savve comparem wat iumi duim witim wat olketa narawan duim. (Gal. 6:4) For example, Mary givim wanfala expensive perfume oil olsem present for Jesus. (John 12:​3-5) Bat datfala poor widow woman, hem givim tufala smol coin nomoa wea value blo hem smol tumas. (Luke 21:​1-4) Nomata olsem, Jesus luksavve wat tufala duim hem showimaot tufala garem faith. Dadi blo hem, Jehovah barava tinghae lo wat iu fit for duim bikos iu lovem and garem faith lo hem, nomata iu tingse wat iu givim hem smol tumas.

18. Wat nao bae helpem iumi for winim olketa daot wea iumi garem? (Lukim tu box “Bible Savve Helpem Iu for Winim Olketa Daot.”)

¹⁸ Iumi evriwan savve garem daot samfala taem. Bat olsem iumi lanem lo disfala study, Word blo God, Bible, hem truth wea savve helpem iumi for winim datwan. So traem best for kasem ansa for olketa kwestin wea iu garem and datwan bae helpem iu for confident and no discourage. Jehovah hem interest and savve gud lo hu nao iu. Hem appreciatim olketa sakrifaes wea iu mekem for hem and hem laek for rewardim iu. Jehovah lovem and kea for each wan lo olketa loyal servant blo hem.