Lane From Olketa Last Toktok blo Olketa Faithful Man

1. Why nao iumi shud lane from olketa wea olo winim iumi?

IUMI evriwan needim advaes for helpem iumi mekem olketa important disison lo laef. Staka taem, iumi savve kasem advaes from olketa elder and nara mature Christian. If olketa olo winim iumi, iumi shud no tingse advaes wea olketa givim hem aot of date. Jehovah laekem iumi for lane from olketa wea olo winim iumi. Olketa laef longtaem winim iumi so olketa garem moa experience, savve, and wisdom.—Job 12:12.

2. Wat nao iumi bae discussim lo disfala article?

² Lo taem blo Bible, Jehovah iusim olketa olo wea faithful for encouragem and givim advaes lo pipol blo hem. Tingim example blo Moses, David, and aposol John. Olketa laef lo olketa difren taem, and situation blo olketa no semsem. Taem olketa klosap for dae, olketa givim wise advaes for olketa narawan. Each wan lo olketa faithful man hia storyim hao hem barava important for obeyim God. Jehovah keepim lo Bible wise toktok wea olketa talem for helpem iumi distaem. Nomata iumi young or olo, iumi savve kasem gud samting taem iumi storyim advaes blo olketa. (Rome 15:4; 2 Tim. 3:16) Lo disfala article, bae iumi storyim olketa last toktok wea olketa faithful man hia talem and olketa leson wea iumi lanem from datwan.

“IU BAE LAEF LONGTAEM”

3. Wat nao samfala samting wea Moses duim?

³ Moses hem barava faithful and lovem Jehovah. Hem wanfala profet, judge, komanda, and man for raetem history. Moses lanem staka samting from wat hem experiencem lo laef. Hem leadim nation blo Israel for kamap free from wei for slave lo Egypt and lukim tu staka mirakol wea Jehovah duim. Jehovah iusim Moses for raetem first faevfala buk lo Bible and Psalm 90, and maet Psalm 91. And luk olsem, hem raetem tu Bible buk Job.

4. Hu nao Moses encouragem, and why nao olsem?

⁴ No longtaem bifor Moses dae, taem hem 120 years old, hem kolem kam evriwan lo Israel for remindim olketa lo evri samting wea olketa lukim Jehovah duim and wat olketa bin experiencem. Samfala wea lisin lo hem lo datfala taem, olketa young taem olketa lukim Jehovah duim olketa saen and mirakol, and olketa lukim tu olketa judgment blo Jehovah againstim Egypt. (Ex. 7:​3, 4) Olketa wakabaot thru lo datfala Red Sea and lukim taem Jehovah distroem army blo Pharaoh. (Ex. 14:​29-31) Lo wilderness, olketa experiencem wei wea Jehovah protectim and kea for olketa. (Deut. 8:​3, 4) Datfala nation blo Israel redi for go insaed Promis Land, and Moses iusim datfala last chance for encouragem olketa.a

5. Olketa last toktok blo Moses lo Deuteronomy 30:​19, 20 hem mekem olketa Israelite for sure lo wat?

⁵ Wat nao Moses talem? (Readim Deuteronomy 30:​19, 20.) Nation blo Israel garem chance for kasem wanfala nambawan future. Witim blessing blo Jehovah, olketa Israelite fit for laef longtaem lo datfala land wea hem promisim. Datfala Promis Land hem beautiful and garem staka kaikai! Moses describem olsem: “Land hia garem olketa naes and bigfala taon wea iufala nating buildim, olketa haos wea fulap lo enikaen gud samting wea iufala nating waka for hem, olketa ston cistern wea iufala nating digim, and olketa grape planteison and olive tree wea iufala nating plantim.”—Deut. 6:​10, 11.

6. Why nao God letem olketa nara nation for tekovarem Israel?

⁶ Moses warnim tu olketa Israelite. For olketa gohed stap lo datfala beautiful land wea garem staka kaikai, olketa mas gohed for obeyim olketa komand blo Jehovah. Moses encouragem olketa for “mas chusim laef” taem olketa gohed lisin lo Jehovah and for “hol strong lo hem.” Bat, olketa Israelite rejectim Jehovah. So gogo God letem olketa blo Assyria and bihaen olketa blo Babylon, for tekovarem Israel and tekem olketa for kamap prisoner.—2 Ki. 17:​6-8, 13, 14; 2 Chron. 36:​15-17, 20.

7. Wat nao iumi savve lanem from toktok blo Moses? (Lukim tu piksa.)

⁷ Wat nao leson wea iumi lanem? Wei for obey hem mekem man kasem laef. Olsem olketa Israelite wea redi for go insaed Promis Land, iumi tu redi for go insaed lo niu world wea God promisim, and iumi bae lukim full earth kamap paradaes. (Isa. 35:1; Luke 23:43) Satan and olketa demon blo hem bae no stap. (Rev. 20:​2, 3) False religion bae nomoa nao, so hard for hem laea lo pipol for mekem olketa lusim Jehovah. (Rev. 17:16) Bae no eni gavman blo man hem stap for spoelem pipol. (Rev. 19:​19, 20) Pipol wea raf and bighed bae no stap lo Paradaes. (Ps. 37:​10, 11) Pipol wea stap evriwea lo earth bae obeyim olketa raeteous law blo Jehovah wea mekem iumi wan mind and garem peace. So, evriwan bae lovem and trustim each other. (Isa. 11:9) Datwan hem nambawan future! And tu, taem iumi gohed for obeyim Jehovah bae iumi savve laef lo paradaes earth no just for samfala handred years nomoa, bat for olowe.—Ps. 37:29; John 3:16.

8. Hao nao promis for laef olowe hem helpem wanfala missionary? (Jude 20, 21)

⁸ If iumi evritaem tingim promis blo God for laef olowe, bae iumi gohed for hol strong lo Jehovah nomata wat kaen hard taem nao iumi feisim. (Readim Jude 20, 21.) Olketa promis blo Jehovah savve strongim iumi for faet againstim eni wik point wea iumi garem. Wanfala brata wea missionary for longtaem lo Africa, storyim hao hem no isi for hem againstim feeling for duim samting wea no stret, hem sei: “Taem mi luksavve hao diswan affectim hope blo mi for laef olowe, mi disaed strong for faet againstim datfala feeling and for barava prea strong lo Jehovah. Witim help blo hem, mi fit for winim datfala problem.”

“BAE IU WIN”

9. Wat nao olketa hard taem wea David kasem lo laef blo hem?

⁹ David hem wanfala gud king. And tu, hem musician, raetem poetry, warrior, and wanfala profet. Hem kasem staka hard taem lo laef blo hem. For samfala year, hem mas haed and ranawe from King Saul wea jealous. Bihaen David kamap king, hem mas ranawe moa for sevem laef blo hem bikos son blo hem Absalom laek for kamap king. Nomata David kasem olketa hard taem and mas deal witim wik point blo hemseleva, hem gohed for loyal lo God go kasem end lo laef blo hem. Jehovah storyim David olsem man wea ‘barava wan mind witim hem.’ Dastawe hem barava fitim for iumi lisin lo advaes wea David talem!—Acts 13:22; 1 Ki. 15:5.

10. Why nao David givim advaes lo son blo hem Solomon wea bae kamap next king?

¹⁰ For example, tingim advaes wea David givim lo son blo hem Solomon wea bae kamap next king. Jehovah chusim datfala young man bikos hem laekem hem for mekhae lo tru worship and buildim wanfala temple for pipol worshipim Jehovah. (1 Chron. 22:5) Datwan hem barava big waka for Solomon duim. Wat nao David talem hem? Bae iumi storyim.

11. Olsem 1 Kings 2:​2, 3 storyim, wat nao advaes wea David givim lo Solomon, and hao nao olketa toktok hia hem tru? (Lukim tu piksa.)

¹¹ Wat nao David talem? (Readim 1 Kings 2:​2, 3.) David talem son blo hem dat if hem obeyim Jehovah bae hem win lo evri samting wea hem duim. For staka year, Jehovah mekem Solomon for barava successful. (1 Chron. 29:​23-25) Hem buildim wanfala temple wea barava luk naes and hem raetem samfala Bible buk and toktok blo hem stap tu lo olketa nara Bible buk. Hem barava famous bikos hem garem wisdom and riches. (1 Ki. 4:34) Bat olsem David explainim lo Solomon, hem bae only succeed if hem gohed for obeyim Jehovah God. Sorre samting nao, taem Solomon start for olo hem worshipim olketa nara god. Jehovah no hapi lo hem, and from datwan hem no gohed givim wisdom lo Solomon for showimaot justice and rul lo raeteous wei.—1 Ki. 11:​9, 10; 12:4.

12. Wat nao iumi savve lanem from olketa toktok blo David?

¹² Wat nao leson wea iumi lanem? Wei for obey helpem iumi for win lo eni samting wea iumi duim. (Ps. 1:​1-3) Hem tru, Jehovah no promis for mekem iumi kamap rich and famous olsem Solomon. Bat if iumi obeyim God, hem bae givim wisdom wea helpem iumi for mekem olketa gud disison. (Prov. 2:​6, 7; Jas. 1:5) Advaes blo Jehovah savve helpem iumi for mekem gud disison saed lo waka, education, entertainment, and selen. Taem iumi followim wisdom blo God, hem bae protectim iumi from eni samting wea savve spoelem iumi for olowe. (Prov. 2:​10, 11) Bae iumi fren gud witim olketa narawan. And famili blo iumi bae hapi bikos iumi garem gud advaes wea iumi needim.

13. Wat nao helpem Carmen for kasem successful laef?

¹³ Carmen, wea stap lo Mozambique, tingse hae education nao bae helpem man for garem successful laef. Hem go lo university and studyim hao for designim olketa building. Hem sei: “Mi interest tumas lo wat mi lanem. Bat hem tekem tumas taem and strong blo mi. Mi start skul from 7:30 a.m. go kasem 6:00 p.m. Datwan affectim wei wea mi attendim olketa meeting, and spiritual saed blo mi hem gogo daon. Mi luksavve dat mi trae for servem tufala boss.” (Matt. 6:24) Carmen prea abaotem situation blo hem and duim research lo olketa pablikeson. Hem sei: “Bihaen mi kasem gud advaes from olketa mature brata and mami blo mi, mi disaed for lusim university and servem Jehovah full-taem. Datwan helpem mi for mekem olketa best choice lo laef blo mi, and mi no regretim datwan.”

14. Wat nao important samting wea Moses and David talem?

¹⁴ Moses and David lovem Jehovah and luksavve hao wei for obeyim Jehovah hem barava important. Lo lastfala toktok wea tufala talem, tufala encouragem olketa wea lisin, for followim example blo tufala for hol strong lo Jehovah, God blo olketa. Tufala talem warning tu hao if eniwan lusim Jehovah, bae Jehovah no hapi lo olketa and bae olketa no kasem blessing wea hem promisim. Datfala advaes hem important for iumi distaem tu. Staka handred years bihaen, nara servant blo Jehovah storyim tu hao hem important for faithful lo God.

“MI BARAVA HAPI”

15. Wat nao aposol John experiencem lo laef blo hem?

¹⁵ John nao hem aposol wea Jesus Christ lovem tumas. (Matt. 10:2; John 19:26) John followim Jesus taem hem duim ministry blo hem, hem lukim olketa mirakol, and hem no lusim Jesus nomata lo olketa hard taem. Hem lukim taem olketa killim dae Jesus, and lukim Jesus bihaen hem resurrect. Hem lukim tu olketa Christian lo first century start olsem wanfala smol grup and hao olketa talemaot datfala gud nius go kasem “evriwan long earth.”—Col. 1:23.

16. Hu nao kasem gud samting from olketa leta blo John?

¹⁶ Klosap lo end blo laef blo John, hem kasem privilege for raetem samfala Bible buk. Hem raet abaotem olketa spesol samting wea “Jesus Christ showimaot klia” lo buk blo Revelation. (Rev. 1:1) John raetem datfala Gospel wea garem nem blo hem. And tu, hem raetem thrifala leta. Lo mek-thri leta blo hem, hem raet for datfala faithful Christian wea nem blo hem Gaius, wea John ting lo hem olsem spiritual pikinini blo hem wea hem lovem tumas. (3 John 1) Kasem taem wea hem olo, masbi John garem staka spiritual pikinini. Samting wea disfala faithful man raetem hem encouragem evri follower blo Jesus kam kasem distaem.

17. Olsem 3 John 4 storyim, wat nao mekem man barava hapi?

¹⁷ Wat nao John raet abaotem? (Readim 3 John 4.) John raet abaotem hapi wea man kasem taem hem obeyim God. Taem John raetem mek-thri leta blo hem, samfala gohed spredim false teaching and mekem kongregeson for no wan mind. Bat, staka lo kongregeson gohed “followim olketa tru teaching.” Olketa obeyim Jehovah and “gohed for obeyim olketa law bilong hem.” (2 John 4, 6) Olketa faithful Christian hia mekem John for hapi and Jehovah tu.—Prov. 27:11.

18. Wat nao iumi savve lanem from toktok blo John?

¹⁸ Wat nao leson wea iumi lanem? Wei for faithful mekem man hapi. (1 John 5:3) For example, taem iumi savve iumi mekem Jehovah hapi, datwan mekem iumi hapi. Taem Jehovah lukim iumi rejectim olketa temptation blo world and iumi acceptim truth, datwan mekem hem hapi. (Prov. 23:15) Olketa angel lo heven tu hapi. (Luke 15:10) Taem iumi lukim olketa narawan feisim hard taem and temptation bat olketa gohed faithful, iumi tu savve hapi. (2 Thess. 1:4) Then bihaen disfala system finis, iumi bae hapi bikos iumi pruvim dat iumi loyal lo Jehovah nomata iumi stap lo world wea Satan hem rulim.

19. Wat nao Sista Rachel talem abaotem wei for teachim truth lo olketa narawan? (Lukim tu piksa.)

¹⁹ Taem iumi sharem truth witim olketa narawan, datwan mekem iumi barava hapi. Rachel, wea stap lo Dominican Republic, ting lo wei for teachim olketa narawan abaotem nambawan God blo iumi olsem wanfala spesol privilege. Taem Rachel ting abaotem olketa spiritual pikinini blo hem, hem sei: “Hem hard for mi describem hapi wea mi kasem taem mi lukim olketa wea mi teachim lovem Jehovah, mekem hem kamap anka blo olketa, and changem laef blo olketa for mekem hem hapi. Datfala hapi hem winim eni hard waka and sakrifaes wea mi mekem for teachim olketa.”

KASEM GUD SAMTING FROM OLKETA LAST TOKTOK BLO OLKETA FAITHFUL MAN

20. Wat nao samfala samting wea iumi semsem lo hem witim Moses, David, and John?

²⁰ Moses, David, and John stap lo olketa difren taem period and situation blo olketa difren from iumi. Bat lo staka samting, iumi semsem. Iumi distaem servem tru God, and olketa tu. Olsem olketa, iumi prea lo Jehovah, depend lo hem, and followim advaes blo hem. And olsem olketa faithful man hia, iumi trustim Jehovah bae barava blessim olketa wea obeyim hem.

21. Taem iumi obeyim advaes blo olketa faithful man olsem Moses, David, and John, wat nao olketa blessing wea bae iumi kasem?

²¹ Dastawe, iumi laek for followim olketa lastfala toktok blo olketa faithful man hia taem iumi obeyim olketa komand blo Jehovah. Taem iumi duim datwan, bae iumi barava win lo evri samting wea iumi duim. Bae iumi “laef longtaem,” yes laef olowe! (Deut. 30:20) And bae iumi kasem hapi from iumi mekem loving Dadi blo iumi lo heven for hapi, wea hem bae fulfillim evri promis blo hem lo wei wea winim wat iumi expectim or imaginim.—Eph. 3:20.