Wat Nao Iu Need for Duim for Kasem Laef Olowe?

1. Wat nao tingting blo samfala pipol abaotem laef olowe?

STAKA pipol savve careful lo wat olketa kaikaim and trae for exercise olowe mekem olketa stap healthy. Nomata olketa duim olketa samting hia, olketa no expectim for olketa laef olowe. Staka tingse man hard for laef olowe and if olketa olo and laef olowe, bae laef hem hard tumas. Bat wat Jesus talem abaotem “laef olowe” hem difren, olsem iumi lukim lo John 3:16 and John 5:24.

2. Wat nao John chapter 6 sei abaotem laef olowe? (John 6:​39, 40)

² Tingim taem wea Jesus duim mirakol for provaedem bred and fish for feedim staka thousand pipol.a Datwan hem sapraesing samting, bat wat hem talem lo next day hem mekem olketa for barava sapraes go moa. Jesus talem datfala crowd wea followim hem go lo Capernaum, klosap lo saedsea lo Galilee, dat pipol savve resurrect and enjoyim laef olowe. (Readim John 6:​39, 40.) Tingim hao datwan hem includim tu olketa frens and loved wans blo iu wea dae. Wat Jesus talem showim dat staka wea dae savve resurrect, and tu, iu and loved wans blo iu savve enjoyim laef for olowe. Bat taem Jesus talem olketa nara toktok lo John chapter 6, staka no minim. Distaem bae iumi storyim wat hem talem.

3. Olsem John 6:51 storyim, wat nao Jesus teachim abaotem hemseleva?

³ Datfala crowd lo Capernaum luksavve hao bred wea Jesus provaedem for olketa hem olsem manna wea Jehovah provaedem for olketa grani blo olketa bifor. Bible kolem datfala manna “bred from heven.” (Ps. 105:40; John 6:31) Jesus iusim manna olsem example for teachim nara important point. Nomata datfala manna hem mirakol from God evriwan wea kaikaim gogo olketa dae nomoa. (John 6:49) Bat, Jesus kolem hemseleva “trufala bred from heven,” “bred wea God givim,” and “datfala bred wea mekem pipol laef.” (John 6:​32, 33, 35) Jesus storyim difference between hem and datfala manna. Hem sei: “Mi nao datfala bred wea kam daon from heven wea mekem man laef. Sapos eniwan kaikaim disfala bred bae hem laef olowe.” (Readim John 6:51.) Olketa Jew konfius taem olketa herem datwan. Hao kam nao Jesus sei hem “bred” wea kam daon from heven, and hem winim datfala manna wea God provaedem for olketa grani blo olketa bifor? Jesus talem wanfala interesting samting wea helpem iumi for minim, hem sei: “Bred wea bae mi givim hem body bilong mi.” Wat nao Jesus minim? Iumi shud laek for faendem ansa for datfala kwestin bikos laef olowe hem samting wea iumi and olketa loved wans blo iumi savve kasem. Distaem bae iumi storyim wat nao Jesus minim.

WAT JESUS MINIM TAEM HEM SEI ‘BRED WEA MEKEM MAN LAEF’ AND ‘BODY BLO MI’

4. Why nao samfala seke lo wat Jesus talem?

⁴ Samfala lo olketa wea lisin lo Jesus seke taem hem sei bae hem ‘givim body blo hem for mekem pipol lo world savve laef.’ Hao, datwan mekem olketa tingse Jesus bae givim real body blo hem for olketa kaikaim, olsem hao olketa heathen pipol savve kaikaim man bifor? (John 6:52) Tingim nara sapraesing toktok wea Jesus talem: “Sapos iufala no kaikaim body bilong Son bilong man and drinkim blood bilong hem, bae iufala no kasem laef.”—John 6:53.

5. Why nao iumi savve sure dat Jesus no talem pipol for drinkim really blood blo hem?

⁵ Lo taem blo Noah, God stopem for pipol kaikaim blood. (Gen. 9:​3, 4) And Jehovah repeatim datwan taem hem givim Law lo Israel. Eniwan wea kaikaim blood, olketa “mas killim hem dae.” (Lev. 7:27) Jesus teachim olketa for obeyim datfala Law. (Matt. 5:​17-19) So hem hard tumas for Jesus talem datfala crowd blo olketa Jew, for kaikaim real body blo hem or for drinkim real blood blo hem. Bat really, Jesus iusim datfala sapraesing toktok for teachim pipol abaotem wat olketa need for duim for kasem “laef olowe.”—John 6:54.

6. Hao nao iumi luksavve toktok blo Jesus hem no minim for olketa kaikaim real body and drinkim blood blo hem?

⁶ Wat nao Jesus minim? Hem klia, Jesus iusim diswan olsem tokpiksa, olsem taem hem story lo datfala Samaritan woman, and sei: “Eniwan wea drinkim wata wea mi givim, bae no need for drink moa. Wata wea mi givim long hem bae hem olsem springwata insaed long hem for mekem hem laef olowe.” (John 4:​7, 14)b Jesus no minim, if datfala Samritain woman hem drinkim wanfala real wata bae hem kasem laef olowe. Lo sem wei tu, wat hem talem lo datfala crowd lo Capernaum, no minim dat bae olketa laef olowe if olketa kaikaim real body and drinkim real blood blo hem.

DIFFERENCE BETWEEN TUFALA EVENT

7. Wat nao samfala talem abaotem toktok blo Jesus lo John 6:53?

⁷ Samfala pipol lo religion sei toktok blo Jesus lo John 6:53 abaotem wei for kaikaim body and drinkim blood blo Jesus, hem join witim Evening Kaikai blo Lord bikos lo datfala taem hem iusim olketa toktok wea klosap semsem. (Matt. 26:​26-28) Olketa sei evriwan wea attendim Evening Kaikai blo Lord shud kaikaim bred and drinkim wine wea olketa pasim lo datfala taem. Hao, datwan hem stret? Hem important for iumi lukim klia if wat olketa talem hem tru or nomoa, bikos each year staka million pipol raonem world hipap witim iumi for datfala event. Distaem iumi bae lukim samfala difference between wat Jesus talem lo John 6:53 and wat hem talem lo Evening Kaikai blo Lord.

8. Wat nao samfala difference between tufala event hia? (Lukim tu olketa piksa.)

⁸ Distaem bae iumi lukim difference between tufala event hia. First, wat taem and wea nao Jesus talem olketa toktok wea stap lo John 6:​53-56? Hem storyim datwan lo wanfala crowd blo olketa Jew wea stap lo Galilee lo 32 C.E. Datwan samting olsem wan year bifor hem startim datfala Evening Kaikai blo Lord lo Jerusalem. Second, hu nao hem story lo olketa? Staka wea lisin lo Jesus lo Galilee interest for satisfaem nomoa physical need blo olketa wea hem for lelebet taem, winim wei for satisfaem spiritual need. (John 6:26) And taem Jesus talem samting wea hem hard for olketa understandim, kwiktaem nomoa olketa no garem faith lo hem nao. Even samfala disaepol blo hem tu stop for followim hem. (John 6:​14, 36, 42, 60, 64, 66) Comparem datwan witim wat hem happen samting olsem wan year bihaen lo 33 C.E, taem Jesus startim datfala Evening Kaikai blo Lord witim olketa aposol blo hem. Lo datfala taem, 11-fala faithful aposol blo hem nao stap witim hem nomata olketa no barava understandim evri samting wea hem teachim. Olketa faithful aposol blo hem no olsem olketa lo Galilee, olketa convince dat Jesus hem Son blo God wea kam daon from heven. (Matt. 16:16) Hem praisem olketa and sei: “Iufala nao nating lusim mi taem mi kasem hard taem.” (Luke 22:28) So tufala difference wea iumi storyim hem pruvim dat wat Jesus talem lo John 6:​53, hem no join witim Evening Kaikai blo Lord, olsem hao samfala pipol tingim. And samfala nara pruv tu hem stap.

WAT JESUS TALEM HEM INCLUDIM IU

9. Toktok wea Jesus talem lo Evening Kaikai blo Lord hem for hu?

⁹ During lo Evening Kaikai blo Lord, Jesus givim bred wea no garem yeast lo olketa aposol blo hem and sei datwan representim body blo hem. Then hem givim lo olketa datfala wine and sei datwan representim “blood bilong datfala agreement.” (Mark 14:​22-25; Luke 22:20; 1 Cor. 11:24) Diswan hem barava important. Jesus no mekem datfala niu agreement witim just eni pipol nomoa, bat hem mekem witim spiritual “Israel” wea hem minim olketa wea bae rul insaed “Kingdom bilong God.” (Heb. 8:​6, 10; 9:15) Lo datfala taem, olketa aposol no minim gud yet, bat no longtaem bihaen holy spirit anointim olketa and olketa kamap part lo datfala niu agreement for stap witim Jesus lo heven.—John 14:​2, 3.

10. Why nao toktok wea Jesus talem lo Galilee hem difren from wat hem talem during lo Evening Kaikai blo Lord? (Lukim tu piksa.)

¹⁰ Tingim, hao during lo Evening Kaikai blo Lord, Jesus focus nomoa lo datfala “smol sekson bilong olketa sheepsheep.” Olketa faithful aposol wea stap witim hem lo datfala rum nao olketa first wan lo datfala smol sekson. (Luke 12:32) Only olketa aposol and olketa narawan wea kamap part lo datfala smol grup nomoa fit for kaikaim datfala bred and wine. Olketa nao bae stap witim Jesus lo heven. Wat Jesus talem lo olketa aposol lo datfala event hem specific for datfala smol grup, wea datwan hem difren from wat hem talem lo datfala crowd lo Galilee. Wat hem talem lo datfala taem hem for staka pipol.

11. Wat nao Jesus talem lo Galilee wea showim dat hem no story for wanfala smol grup nomoa?

¹¹ Taem Jesus lo Galilee lo 32 C.E., olketa main wan hem story for olketa hem olketa Jew wea laek for kaikaim bred nomoa. Nomata olsem, hem trae for teachim olketa abaotem wanfala samting wea moa important winim real kaikai. Hem storyim samting wea Jehovah provaedem for helpem olketa kasem laef olowe. And Jesus talem hao olketa wea dae savve resurrect lo judgment day and laef for olowe. Hem no just story for wanfala smol grup nomoa, olsem lo taem blo Evening Kaikai blo Lord. Bat lo Galilee, hem story abaotem olketa blessing wea evri pipol savve kasem. Hem sei olsem: “Sapos eniwan kaikaim disfala bred bae hem laef olowe. . . . Bred wea bae mi givim hem body bilong mi wea mi givim for mekem pipol long world savve laef.”—John 6:51.c

12. Wat nao iumi need for duim for kasem gud samting from wat Jesus storyim?

¹² Taem Jesus story lo olketa Jew lo Galilee, hem no sei disfala blessing hem samting wea evri pipol wea laef bifor or wea born kam bihaen, bae kasem. Only olketa wea “kaikaim disfala bred” wea minim for showimaot faith, olketa nao bae kasem gud samting. Staka pipol wea sei olketa Christian tingse olketa bae sev if olketa “biliv lo [Jesus]” and ting lo hem olsem savior blo olketa. (John 6:​29, King James Version) Bat, samfala pipol lo datfala crowd wea biliv lo Jesus tu, lusim hem. Why?

13. Wat nao olketa tru disaepol blo Jesus need for duim?

¹³ Staka lo datfala crowd wea Jesus feedim, hapi for followim hem only if hem gohed provaedem wat olketa laekem. Olketa interest nomoa for lukim hem duim olketa mirakol for healim sik pipol, kasem free kaikai, or for hem teachim samting wea fitim tingting blo olketa. Bat, Jesus showim dat olketa tru disaepol blo hem need for duim moa samting. Jesus no kam lo earth for just satisfaem olketa physical samting wea pipol laekem. Hem laekem pipol for acceptim invitation blo hem for “kam long” hem, wea minim for olketa lisin and obeyim evri samting wea hem teachim.—John 5:40; 6:44.

14. Wat nao iumi mas duim for kasem gud samting from body and blood blo Jesus?

¹⁴ Jesus mekhae lo wei wea datfala crowd need for showimaot faith. Wat nao olketa need for showimaot faith lo hem? Olketa need for showimaot faith dat body and blood blo Jesus wea hem bae sakrifaesim, hem savve sevem olketa. Hem important for olketa Jew bifor garem diskaen faith, and hem still important for iumi distaem tu. (John 6:40) So, for kasem gud samting from body and blood blo Jesus, olsem John 6:53 storyim, iumi need for showimaot faith lo ransom. Datfala chance for kasem blessing hem available for staka pipol.—Eph. 1:7.

15-16. Wat nao olketa important samting wea iumi lanem from John chapter 6?

¹⁵ Story lo John chapter 6, hem important for iumi and olketa loved wans blo iumi. Iumi lanem hao Jesus hem kaen lo pipol. Taem hem lo Galilee, hem healim olketa wea sik, teach abaotem Kingdom, and mek sure evriwan kasem kaikai wea hem samting wea pipol needim. (Luke 9:11; John 6:​2, 11, 12) Samting wea moa important, Jesus teachim dat hem nao “bred wea mekem pipol laef.”—John 6:​35, 48.

¹⁶ Evri year during lo Evening Kaikai blo Lord, olketa wea Jesus kolem lo “nara sheepsheep” no kaikaim datfala bred and wine and olketa shud no kaikaim. (John 10:16) Nomata olsem, olketa tu kasem gud samting from body and blood blo Jesus Christ. Olketa duim diswan taem olketa showimaot faith lo sakrifaes blo Jesus wea savve sevem man. (John 6:53) Bat, olketa wea shud kaikaim bred and drinkim wine showimaot dat olketa insaed lo datfala niu agreement and olketa garem hope for kamap olketa king lo Kingdom lo heven. So nomata iumi blo anointed or nara sheepsheep, story lo John chapter 6 hem garem big mining for iumi. Hem teachim iumi hao hem barava important for showimaot faith and datwan mekem iumi for kasem laef olowe.