Kwestin From Reader

Hu nao “olketa angel wea God chusim” wea 1 Timothy 5:21 hem storyim?

Aposol Paul raet lo Timothy wea hem wanfala elder tu and sei: “Mi talem iu front long God, and front long Christ Jesus, and olketa angel wea God chusim, for iu mas followim olketa toktok hia, and bifor iu disaedem eni samting, lukluk gud long evri samting and no favorim eniwan.”—1 Tim. 5:​21, footnote.

First, bae iumi storyim olketa angel wea no include insaed disfala grup. Hem klia hao Paul hem no story abaotem olketa blo 144,000. Taem Paul raet lo Timothy, datfala resurrection blo olketa anointed Christian for go lo heven hem no start yet. Olketa aposol and nara anointed wan no kamap olketa spirit lo heven yet, so disfala toktok “olketa angel wea God chusim” hem no refer lo olketa.—1 Cor. 15:​50-54; 1 Thess. 4:​13-17; 1 John 3:2.

And tu, “olketa angel wea God chusim” hem no minim olketa angel wea no obey lo taem blo Flood. Olketa angel hia saedem Satan and kamap olketa demon, wea againstim Jesus. (Gen. 6:2; Luke 8:​30, 31; 2 Pet. 2:4) Lo future, olketa bae stap insaed hol for 1,000 years and bihaen olketa bae distroe evribit witim Devil.—Jude 6; Rev. 20:​1-3, 10.

“Olketa angel wea God chusim” wea Paul storyim hem olketa angel lo heven wea sapotim ‘God and Christ Jesus,’ wea datfala verse hem mentionim.

Staka thousand faithful angel nao stap. (Heb. 12:​22, 23) Bat hem no minim evriwan lo olketa garem sem assignment lo semtaem. (Rev. 14:​17, 18) Tingim, wantaem wanfala angel nomoa hem distroem 185,000 man lo army blo Assyria. (2 Ki. 19:35) Luk olsem, samfala angel kasem assignment for “aotem from Kingdom bilong [Jesus] pipol wea mekem olketa narawan for sin, and pipol wea duim olketa nogud samting.” (Matt. 13:​39-41) Olketa nara angel maet kasem assignment for “hipimap olketa” wea bae go lo heven. (Matt. 24:31) And maet olketa nara angel garem assignment ‘for gaedem iumi lo evri ples wea iumi go.’—Ps. 91:11; Matt. 18:10; comparem Matthew 4:11; Luke 22:43.

Luk olsem “olketa angel wea God chusim” wea 1 Timothy 5:21 storyim, hem olketa angel wea kasem assignment for duim olketa spesol waka wea join witim wei for lukaftarem kongregeson. Taem iumi luk lo context, Paul givim wise kaonsel for olketa elder, and sei olketa lo kongregeson shud respectim olketa. And hem storyim hao olketa elder shud duim responsibility blo olketa lo wei wea “no favorim eniwan” and shud lukluk gud firstaem bifor olketa mekem eni disison or givim eni judgment. Wanfala main reason for olketa obeyim disfala toktok blo God wea Paul talem hem bikos olketa duim datfala waka “front long God, and front long Christ Jesus, and olketa angel wea God chusim.” So hem klia dat samfala angel kasem assignment for duim waka lo kongregeson, olsem for provaedem protection, lukaftarem preaching waka, and for report go bak lo Jehovah.—Matt. 18:10; Rev. 14:6.