STUDY ARTICLE 7
SONG 15 Praisem Firstborn Bilong God!
Forgiveness blo Jehovah—Gud Samting Iumi Kasem
“Taem iu forgive, iu barava forgive nao.”—PS. 130:4.
MAIN FOCUS
Lo disfala article, bae iumi storyim samfala klia tokpiksa lo Bible for helpem iumi understandim taem Jehovah forgive, hem barava forgive nao, datwan mekem each wan lo iumi appreciatim go moa forgiveness blo hem.
1. Why nao tingting blo iumi olketa man abaotem forgiveness hem no evritaem semsem?
“MI FORGIVIM IU.” Taem iu herem samwan sei hem forgivim iu, iu bae hapi tumas, especially taem iu nao talem or duim samting wea mekem hem feel nogud! Bat wat nao datfala person really minim taem hem sei “mi forgivim iu”? Hao, hem minim hem still acceptim iu olsem gud fren blo hem? Or hem just no laek for tok abaotem datfala situation moa? Tingting blo iumi olketa man abaotem wei for forgive, hem no evritaem semsem.
2. Hao nao Bible hem describem forgiveness blo Jehovah? (Lukim tu footnote.)
2 Wei wea Jehovah forgivim iumi pipol wea no perfect, hem barava difren from hao iumi forgivim each other. Forgiveness blo Jehovah hem barava spesol. Man wea raetem psalm sei olsem abaotem Jehovah: “Taem iu forgive, iu barava forgive nao, mekem pipol savve fraet lo iu.”a (Ps. 130:4) Yes, taem Jehovah forgive, hem “barava forgive nao.” Jehovah showim best example lo wat forgiveness hem really minim. Samfala taem, olketa Bible raeta iusim wanfala Hebrew word for describem forgiveness blo Jehovah and no enitaem olketa iusim datwan for describem hao olketa man forgive.
3. Hao nao forgiveness blo Jehovah difren from hao iumi forgive? (Isaiah 55:6, 7)
3 Taem Jehovah forgivim samwan, hem waepem aot sin blo hem. Datfala person savve garem moa gud relationship witim hem. Forgiveness blo Jehovah hem barava spesol bikos hem complete and showimaot hem kaen tumas.—Readim Isaiah 55:6, 7.
4. Hao nao Jehovah helpem iumi for understandim wat nao tru forgiveness?
4 From forgiveness blo Jehovah difren from iumi, wat nao savve helpem iumi pipol wea no perfect for understandim wat nao tru forgiveness? For helpem iumi, Jehovah iusim olketa klia tokpiksa for describem forgiveness blo hem. Lo disfala article, bae iumi storyim samfala. Bae iumi lukim hao Jehovah aotem sin, and lo semtaem, mekem iumi for garem gud relationship witim hem moa. Taem iumi discussim olketa tokpiksa hia, bae iumi appreciatim go moa hao loving Dadi blo iumi wea kaen tumas hem showimaot forgiveness lo staka difren wei.
JEHOVAH AOTEM SIN
5. Wat nao happen taem Jehovah forgivim olketa sin blo iumi?
5 Staka taem, Bible storyim hao sin hem olsem wanfala hevi load for man karem. King David sei olsem abaotem olketa sin blo hem: “Olketa mistek blo mi hem hip antap hed blo mi, hem olsem wanfala hevi load, wea hem tumas nao for mi karem.” (Ps. 38:4) Bat Jehovah forgivim sin blo olketa wea repent. (Ps. 25:18; 32:5) Hebrew word wea olketa transleitim for “forgivim” hem minim for “liftim ap” or “karem aot.” Maet iumi savve imaginim Jehovah olsem wanfala strong man wea liftim and karem aot sin blo iumi wea olsem hevi load lo shoulder blo iumi.
“Forgivim” (Ps. 32:5)
6. Hao farawe nao Jehovah karem go olketa sin blo iumi?
6 Nara tokpiksa Bible iusim, hem showim hao farawe nao Jehovah karem go olketa sin blo iumi. Psalm 103:12 sei: “Lo sem wei wea sunrise hem farawe from sunset, so hem putim olketa sin wea iumi duim farawe from iumi.” East hem barava farawe from west. No enitaem tufala savve meet. Diswan minim Jehovah putim olketa sin blo iumi farawe from iumi. Datwan hem nambawan wei for describem forgiveness blo Jehovah!
“Lo sem wei wea sunrise hem farawe from sunset” (Ps. 103:12)
7. Hao nao Bible describem wat Jehovah duim lo olketa sin blo iumi? (Micah 7:18, 19)
7 Hem tru, lo tokpiksa wei Jehovah tekem farawe olketa sin blo iumi, bat hao, hem still tingim yet? Nomoa. King Hezekiah sei olsem abaotem Jehovah: “Iu torowem evri sin blo mi [bihaen lo] iu.” Footnote sei: “Iu aotem evri sin blo mi mekem iu no lukim.” (Isa. 38:9, 17; ftn.) Disfala tokpiksa showim Jehovah tekem sin blo olketa wea repent and torowem mekem hem no lukim moa. Nara wei for transleitim diswan hem: “Iu mekem olketa sin blo mi olsem hem nating happen.” Bible iusim nara tokpiksa for storyim datfala sem point lo Micah 7:18, 19. (Readim.) Olketa verse hia storyim Jehovah torowem olketa sin blo iumi lo deep sea. Lo bifor, if eni samting olketa torowem insaed deep sea, hard for samwan tekem bak moa.
“Iu torowem evri sin blo mi lo baksaed blo iu” (Isa. 38:17)
“Iu bae torowem evri sin blo mifala go daon lo deep sea” (Mic. 7:19)
8. Wat nao samfala samting wea iumi lanem finis?
8 Olketa tokpiksa hia helpem iumi for savve taem Jehovah forgivim iumi, hem tekem aot olketa sin blo iumi and iumi no karem moa hevi load blo sin. Olsem David sei: “Olketa wea God forgivim sin bilong olketa and samting wea olketa duim wea hem no stret, bae hapi. Man wea Jehovah no tingim moa sin bilong hem bae hapi.” (Rome 4:7, 8) Diswan showim wei wea Jehovah forgive hem barava tru!
JEHOVAH WAEPEM AOT SIN
9. Hao nao disfala tokpiksa helpem iumi lukim dat forgiveness blo Jehovah hem complete?
9 Jehovah iusim samfala nara tokpiksa for describem hao hem iusim ransom sakrifaes for waepem aot sin blo olketa wea repent. Bible storyim Jehovah olsem, hem wasim and rinsim aot olketa sin. Taem Jehovah duim datwan, hem mekem wanfala sinner for kamap klin. (Ps. 51:7; Isa. 4:4; Jer. 33:8) Jehovah seleva storyim hao hem duim datwan, hem sei: “Nomata olketa sin blo iufala hem olsem braet red kala, olketa bae kamap white olsem snow. Nomata olketa barava red olsem dark red kaleko, olketa bae kamap white olsem wool.” (Isa. 1:18) Hem barava no isi for wasim aot braet red or dark red stain from kaleko. Bat, Jehovah iusim tokpiksa hia for helpem iumi luksavve dat hem savve barava wasim klin olketa sin blo iumi gogo no eni mark hem stap.
“Nomata olketa sin blo iufala hem olsem braet red kala, olketa bae kamap white olsem snow” (Isa. 1:18)
10. Wat nao nara tokpiksa wea Jehovah iusim for describem kaenfala wei wea hem forgivim iumi?
10 Olsem iumi studyim lo last article, sin hem olsem kaon. (Matt. 6:12; Luke 11:4) So evritaem iumi sin againstim Jehovah, hem olsem iumi addim go moa kaon blo iumi. Gogo, kaon blo iumi lo hem big tumas! Bat taem Jehovah forgivim iumi, hem olsem Jehovah cancelim kaon wea olketa shud chargem lo account blo iumi. Hem bae no demandim moa payment for sin wea hem forgivim finis. Disfala naes tokpiksa describem feeling wea iumi garem taem Jehovah forgivim iumi.
“Forgivim kaon bilong mifala” (Matt. 6:12, ftn.)
11. Lo original languis, wat nao Bible minim taem hem sei Jehovah bae rabemaot sin blo iumi? (Acts 3:19)
11 Jehovah no just cancelim olketa kaon or sin blo iumi, bat hem forgivim or rabemaot. (Readim Acts 3:19.) Taem iumi herem hao samwan cancelim wanfala kaon, maet iumi imaginim hem raetem big X for krosimaot datfala kaon. Bat nomata hem raetem X antap, bae iumi still savve lukim record blo datfala kaon. Bat wei for rabemaot samting hem difren. Lo original languis, olketa iusim wanfala toktok lo disfala verse wea minim for rabemaot. For understandim gud diswan, iumi need for remember hao lo bifor, olketa iusim ink wea olketa mekem from carbon, gum, and wata. Man savve tekem wet sponge and rabem antap lo raeting for mekem raeting hia aot. So taem olketa rabemaot wanfala kaon, hem disappear nao. Hard for man lukim moa raeting wea bin stap lo datfala pepa. So no eni record hem stap nao. Iumi hapi tumas for savve dat Jehovah no just cancelim olketa sin blo iumi, bat hem barava rabemaot completely!—Ps. 51:9.
“Jehovah savve forgivim [or rabemaot] olketa sin bilong iufala” (Acts 3:19)
12. Wat nao iumi lanem from tokpiksa abaotem thik cloud?
12 Jehovah iusim nara tokpiksa wea klosap semsem for describem hao hem waepem aot sin blo iumi. Hem sei: “Mi bae tekem aot olketa rong blo iu olsem mi kavarem witim cloud and tekem aot olketa sin blo iu olsem mi kavarem witim thik cloud.” (Isa. 44:22) Taem Jehovah forgive, hem olsem hem iusim wanfala thik cloud for haedem olketa sin blo iumi mekem olketa disappear.
“Mi bae tekem aot olketa rong blo iu olsem mi kavarem witim cloud” (Isa. 44:22)
13. Hao nao iumi feel taem Jehovah forgivim olketa sin blo iumi?
13 Wat nao iumi lanem from olketa tokpiksa hia? Iumi lanem hao taem Jehovah forgivim iumi, iumi shud no gohed feel guilty lo sin wea iumi duim bifor, and no ting lo hem olsem stain wea stap for full laef blo iumi. Jehovah iusim blood blo Jesus Christ for completely cancelim olketa kaon or sin blo iumi. And even record blo olketa kaon hia bae man no savve lukim nao. Diswan showim taem iumi repent from sin blo iumi, Jehovah barava forgivim iumi.
JEHOVAH DUIM SAMTING FOR IUMI GAREM BAK GUD RELATIONSHIP WITIM HEM
Forgiveness blo Dadi blo iumi lo heven, hem mekem iumi garem gud relationship witim hem (Lukim paragraf 14)
14. Why nao iumi savve trustim forgiveness blo Jehovah? (Lukim tu olketa piksa.)
14 Tru forgiveness blo Jehovah hem mekem wei for iumi garem bak gud relationship witim hem. Hem helpem iumi for no gohed feel guilty. Iumi no need for fraet and tingse Jehovah gohed feel nogud lo iumi and laek for panisim iumi. Hard for Jehovah duim datwan. Why nao iumi savve trustim Jehovah taem hem sei hem forgivim iumi? Jehovah sei olsem lo profet Jeremiah: “Mi bae forgivim rong samting wea olketa duim, and mi bae no tingim moa sin blo olketa.” (Jer. 31:34) Aposol Paul quotem toktok blo Jehovah wea hem sei: “Bae mi no tingim moa sin bilong olketa.” (Heb. 8:12) Bat wat nao datwan really minim?
“Mi bae no tingim moa sin blo olketa” (Jer. 31:34)
15. Wat nao Bible minim taem hem sei Jehovah no tingim moa olketa sin blo iumi?
15 Lo Bible, datfala toktok “tingim moa” hem no just minim wei for samwan rememberim or tingim samting. Bat, hem minim tu for samwan duim samting. Datfala criminal wea hange lo post next lo Jesus ask olsem: “Jesus, plis, iu tingim mi taem iu King.” (Luke 23:42, 43) Datfala criminal no minim dat taem Jesus kamap King, Jesus bae just tingim hem bak nomoa, bat hem laekem Jesus for duim samting for hem. And toktok wea Jesus talem lo hem, showim bae hem duim samting for ressurectim datfala criminal. So, taem Jehovah sei bae hem no tingim moa sin blo iumi, hem minim lo future bae hem no duim eni samting for panisim iumi for olketa sin wea hem forgivim finis.
16. Hao nao Bible describem freedom wea iumi kasem from forgiveness blo Jehovah?
16 Bible iusim nara tokpiksa for helpem iumi understandim hao tru forgiveness blo Jehovah hem mekem iumi kamap free. Bikos iumi born sin and savve laek for duim sin, iumi kamap “slave bilong sin.” Bat from forgiveness blo Jehovah, Bible sei iumi olsem slave wea “kamap free from olketa sin” blo iumi. (Rome 6:17, 18; Rev. 1:5) Tru nao, forgiveness blo Jehovah mekem iumi hapi tumas olsem olketa slave wea kamap free.
“Iufala free nao from wei for slave long sin” (Rome 6:18)
17. Hao nao forgiveness blo Jehovah healim iumi lo spiritual wei? (Isaiah 53:5)
17 Readim Isaiah 53:5. Last tokpiksa wea bae iumi discussim, hem hao Bible comparem iumi olketa man wea sin witim pipol wea garem wanfala serious sik. From ransom sakrifaes wea Jehovah provaedem thru lo Son blo hem, lo tokpiksa wei hem olsem Jehovah healim iumi. (1 Pet. 2:24) Sin hem olsem wanfala sik wea spoelem relationship blo iumi witim Jehovah. Bat ransom mekem hem possible for iumi heal, or garem gud relationship witim Jehovah moa. Taem samwan wea sik hem gud bak, hem hapi tumas. Lo sem wei tu, iumi savve hapi taem iumi gud bak lo spiritual wei and kasem bak approval blo Jehovah bikos hem forgivim iumi.
“Bikos lo olketa garekil blo hem, iumi gud bak moa [or heal]” (Isa. 53:5))
GUD SAMTING IUMI KASEM FROM FORGIVENESS BLO JEHOVAH
18. Wat nao iumi lanem from olketa tokpiksa lo Bible abaotem forgiveness blo Jehovah? (Lukim tu box “Hao Jehovah Forgivim Iumi.”)
18 Wat nao iumi lanem from olketa tokpiksa lo Bible wea iumi bin discussim abaotem forgiveness blo Jehovah? Taem Jehovah forgive, hem barava forgive and forgiveness blo hem, hem for olowe. Diswan mekem iumi savve garem gud relationship witim Dadi blo iumi lo heven. And iumi remember tu, hao tru forgiveness blo Jehovah hem wanfala present. Iumi kasem bikos lo love and kaeness blo Jehovah for iumi olketa sinner, and hem no bikos iumi garem eni raet for kasem datwan.—Rome 3:24.
19. (a) Wat nao iumi shud barava appreciatim? (Rome 4:8) (b) Wat nao bae iumi discussim lo next article?
19 Readim Rome 4:8. Iumi shud barava appreciatim hao Jehovah hem God wea savve “barava forgive”! (Ps. 130:4) Bat for kasem forgiveness hem depend lo wanfala important samting. Jesus sei: “Sapos iufala no forgivim nara pipol wea sin againstim iufala, Dadi bilong iufala bae no forgivim sin bilong iufala.” (Matt. 6:14, 15) So hem important for iumi followim example blo Jehovah for forgive. Bat hao nao iumi savve duim datwan? Next article bae storyim.
SONG 46 Thankiu Nao, Jehovah
a Lo original Hebrew languis, toktok wea olketa iusim lo disfala verse for “barava forgive,” hem showim hao diswan nomoa hem only tru forgiveness, nomata olketa nara wei for forgive hem stap tu. Staka Bible transleison missim disfala important point, bat New World Transleison blo Holy Scripture hem keepim datwan taem olketa transleitim Psalm 130:4.